Read Uab Meto YESAYA 39 Bible Online

YESAYA 39 - Uab Meto bible

YESAYA 39

¹Anbi neno nane kesel Babel, Nai Merodakh Baladan Nai Baladan anmone, in nen nak Kesel Nai Hizkia fe naleko na'ko menas. Ma in ansonu haef ma neki sulat ma tnatas neu Nai Hizkia.

²Nai Hizkia ansimo haefen nane nok nek amlilat oke te nalile ma naton neu sin ale in mu'in ok-oke, he noni mnatu ma noni muti, atu fomeni, ma in bale makenat solalus ok-oke. Katit fa sa' esle' anbi in sonaf ma anbi in plenat le in ka nalile nani fa neu sin ok-oke.

³Namuni te Mafefa Knino Nai Yesaya nem neu Kesel Nai Hizkia ma natoti in nak, “Ale atoni nane sin nem na'ko me ka? Sin nak sa' ka?” Nai Hizkia natae nak, “Sin nem na'ko Babel, na'ko pah a'lo.”

⁴“Sin nit sa' ka anbi sonaf?” Nai Yesaya natoti anteni. “Sin nit ale sa' ok-oke,” Nai Hizkia natae onane. “Katit fa sa' es anbi au maus anbi au sonaf nanan le au ka ulile ani fa neu sin.”

⁵Oke te Nai Yesaya nak neu kesel nak, “UISNENO Akuasat Anesit nakua a'an nak,

⁶‘Of antia in tabu ale ho mu'im anbi ho sonaf nanan, ma ale sa' le ho mnasi sin nabuab nani talan te neno i, of naiti neki sin neu Babel. Katit fa neu he namaika ko sa' es.

⁷Na'ko ho sufam bian of naiti sin ma anfani ate anbi sonaf ma antuthae kesel Babel.’ ”

⁸Kesel Nai Hizkia natae nak, “Han ba'an UISNENO neu kau leko amsa.” In natae onane natuin in natenab nak: “Lamun au plenat anmu'i halan ma tainine leka au fe moni.”