Read Uab Meto YESAYA 40 Bible Online

YESAYA 40 - Uab Meto bible

YESAYA 40

¹Hi Uisneno nakua in a'an nak on i, “Mimela nai, mimela nai, Au to sin!

²Amfe tainine nai neu atoni Yerusalem sin nekan, miton nai mak sin aetnok nane nasupo nalalien. Au sako ulali sin sanat, ale sin tanhais Au kas ulali anfani hae nua.”

³Anmu'i han hunun nak, “Miloitan nai lanan anbi mnela snaen neu UISNENO. Ma mineo nai lan opat anbi mnela hufui neu kit Uisneno!

⁴Ale nonof mes amnae mani, tubu ma neten minel mani sin. Nain le anmu'i neten of anfani mnela, ma le apenut nati' amha'eki mani.

⁵UISNENO In apinat of nalil'on, ale nonot ok-oke of ansaksi nani. Namneo, UISNENO In neknon kun es anba'an nalali.”

⁶Anmu'i hanaf le nak, “Muton nai!” Au utae ak, “Au he uton sa' ka?” “Muton nai mak atoni pah pinan onle hun, onle tuna le in alekon nane al smel es.

⁷Hun anmeto ma tuna anmaknene, leka UISNENO anfu neki anin maputu. Namneo, to le nane onle hun.

⁸Hun anmeto ma tuna anmaknene, mes hit Uisneno In a'an knino anhake nabal-bal.”

⁹Amsae nai meu tubu amnanut, ma muton nai beno alekot neu Yerusalem! Amhunun nai nok hana naek, ma muton nai beno alekot neu Sion! Muton nai neu kot-kot Yehuda mak sin Uisneno of nanoebon nem!

¹⁰Amkiso Uisneno nem neki kuasat he nanaoba plenat nok matani. Atoni-atoni le In nafetin nalali sin natuin In.

¹¹On atukus mese anpanat in mu'it puken mese; In neknon kun anabul sin. Ale bibi ankase In nasnono sin, ale ainfen In antopu sin anao babaun.

¹²Sekau ka es ansu' tasi naek neki in niman, ai ansu' neno tunan neki in lakat? Sekau ka es ansu' afu pah pinan neki poni ai antai tubu ma neten neki atnais?

¹³Sekau ka es antopu UISNENO, ai nanoina In on in afainekat?

¹⁴UISNENO antoti fainekat na'ko sekau ka he nati' In napeni mahine ma nek menuan? Sekau ka es naton neu In lanan he nati' In nanaoba plenat nok alekot?

¹⁵UISNENO ankiso uf-uf nane onle oe loli mese anbi oe, on on skuku an-ana mese anbi tnais; pah-pah sin makafken papmese nok afu skuku.

¹⁶Ale mu'it anbi nasi Libanon ka nanokab fa hen fani fua mnotu; in haunu ka nanokab fa hen fani hau mnotu.

¹⁷Ale uf ka maota fa neu In, onle katit fa sin anbi In human.

¹⁸Es nane te ho he muleta Uisneno nok sekau ka? Ho mutenab In papmese nok sekau ka?

¹⁹In ka onfa ameput le anmo'e le'u mahuma, ma anpakae mnatu le anamu nani neki mnatu ma noni muti.

²⁰Atoni amamu'it le kan sos nabe'i fa noni mnatu ai noni muti, anbeti hau alekot le ka namle'u fa nok manoe. In nami amepu ahinet ma anmo'e le'u mahuma le ka naktuli nit fa.

²¹Ait ho ka muhin fa ma ho kam nen fa, ma ka naton neu ko fa na'ko ahun-hunut neu afi pah pinan nabalbon ka? Onme ho ka muhin fa nahunu neu onme le pah pinan in fatan.

²²Le anmo'e pah pinan In antunon anbi pah pinan fafon, in tuafen onle fokat an-ana. In naben obet neno tunan on pilu muti, ma nahakeb on um-ume he natua anbine.

²³In anmo'e ana' kuasat sin ma ka nabloli fa, ma ale anaet sin kuasat namneku.

²⁴Sin onle luat le fe ansenan le sin a'ba'an fe anmoni. Ma leka UISNENO anfu nani neki anin, sin anmeto ma anpene neki sin on ane ta'u ametos.

²⁵Ho mutenab Uisneno knino knao matani on sekau ka? Ho he muleta In nok sekau ka?

²⁶Miaiti hi matmenu nai neu neno tunan, ma amkiso nai! Sekau ka es anmo'e ale afkun? In es anlek sin on solalus pukan mese, In es nahin sin amfaukenu ok-oke, ma anboin sin mese-mese nok sin kankenu. Kait fa es amsa le he namneku, natuin UISNENO In kuasat lo nae le'uf kun!

²⁷Es nane te Israel, nansa' hom sakoi ma munoi, onle UISNENO ka nahin fa ho susal nukat sin ka? Onle In ka namnau fa ho monim, ma kan kiso fa ho hak ka?

²⁸Ait ho ka muhin fa ma kam neun fa ka? UISNENO In kun es anmo'e pah pinan ok-oke. In kan hae nit fa ai kan ole nit fa; In tenab ne'ob ka masu'ak fa.

²⁹In anfe matani neu ahaet sin, In ansato be'it neu a'olet sin.

³⁰Ale atoni munif anhae ma anole ma ale li'ana anpastun ma anbel.

³¹Mes atoni le ansonlaiton neu UISNENO, of napeni be'it ma matani fe'u. Sin onle kol teme le naplele neki ansae mnanu le'uf neki in ninen matanin. Sin naen mes kan hae nit fa, sin anao mes kan ole nit fa.