Read Uab Meto YESAYA 42 Bible Online

YESAYA 42 - Uab Meto bible

YESAYA 42

¹UISNENO nakua In a'an nak, “I Au ate le Au tuntaku ani, Au atoni mabeti le anhalin Au nekak. Au fe ulali Au kuasat neu in, neu he neki lasi amneot neu ale uf mese-mese.

²In of kan hunun fa ai kan hunun fa nok hana naek, in hanan of ka manena fa anbi lanan.

³Akmeo le anluinon of ka na'ipu nani fa, paku le an-anak of ka namate nani fa. Nok aki'at in of naton lasi amneot,

⁴in nekan ka naoni fa ai kan ole fa, talan te in nahakeb lasi amneot anbi pah pinan. Pah-pah a'lot sin ansinmakan in lasi noina.”

⁵UISNENO anmo'e ma na'ben neno tunan; In anmo'e pah pinan ma ale amonit le anmoni anbine. In anfe snasaf ma snasaf amonit neu atoni pah pinan. In natiaba han ba'an i neu In ate, nak,

⁶“Au, UISNENO Kau, Au boin ma lelu ko neu he munaoba lasi amneot. Au tuntaku ko, ma Au panat ko he nati' ho amfani manta'en neu to pah pinan, ma meusine neu ale uf-uf.

⁷Neu hen fai atoni matfolo sin matken, ma nafetin atoni o'of na'ko mesokan nanan.

⁸Au, UISNENO Kau, Au kanak esle' nane; Au apinat Kau, Au ka fe ani fa neu sekau amsa. Au kanak mateka Au ka una'at ani fa neu le'u mahuma sin.

⁹Lasi ahunut le afi Au uton ani neno i nalile ma natonon nalalien; Au lomi he uton a'teni lasi-lasi fe'u; nahunu na'ko lasi nane fe ka natonon fa, Au uton ulali neu ko.”

¹⁰Amsi nai sit fe'u neu UISNENO, miliatas In nai, hoi ale uf pah pinan! Tasi nok in nesan ok-oke, hoi mi'lu nai, pah-pah a'lot ma ale in tuafenu!

¹¹So ale paha snaen ma ale in kot-kot sin ampules nai UISNENO, tuafen Kedar leko hi ampules In nai! Tuafen kot Sela so leko him hunun ma miba' nai, ma amkoa nai mi'ko tubu in tunan!

¹²So leko sin naliatas UISNENO nai, ma amsaksi In kanan neu pah-pah a'lot sin.

¹³UISNENO In anao mat ma In anmaken on meo pa'e mese, on solalus le nahenu nok nek sinmakat makenat. In ankoa han sakanat neu makenat, ma In nalile lasi mnisat neu In musu sin.

¹⁴Uisneno nakua In a'an nak, “Fun a lo leufen Au ka umolok fa; Au uten'ok ma utaunok. Mes tabu antelen neu Au he fen, Au he anbai onle bife amahonit.

¹⁵Tubu ma neten Au mo'e sin anfani monas, ma sin luat Au mo'e sin anmolok. Ale sin noe Au ubaina sin anfani mnela snaen, ale sin nifu of Au mo'e ma anmeti oke.

¹⁶Au to le matfolo of Au topu sin anao nok lanan le sin ka nahine fa. Au mo'e mesokan anfani meusine neu sin, ma ale lan akloput of Au u'naek ani. Lasi nane esle' of Au mo'e ani neu sin, ma namneo of Au unaoba ani.

¹⁷Atoni le nafnekan neu le'u mahuma ma nausi neune on sin uisneno of nasi'u sin ma namaeba sin.”

¹⁸UISNENO nakua In a'an nak, “Amnen nai, hoi atoni-atoni luke tono ma akosot! Amkiso nai, hoi atoni-atoni matfolo!

¹⁹Sekau ka es anfolo nesin Israel Au ate? Sekau ka es antono ma ankoso nesin Au haef?

²⁰Israel, ho mit lasi namfau, mes ho kam panat mani fa, ho lukem sin natfai mes ho kam nen fa.”

²¹UISNENO anlomi he nafetin; In lomi he nati' hom tola ma muliatas In aplenat.

²²Mes to nane nasik nalali sin, natam sin anbi ke'an-ke'an afu pinan, ma natam sin anbi ale o'of. Sin anfani osaf masikat ma katit fa es he nem, ma anfe babat neu sin.

²³Sekau anbi ki anlomi he nen lasi i, ma anpanat neu in amsopun?

²⁴Sekau ka es nana'at Israel neu he nasik nani? Ait ka UISNENO fa ka? Hit tasanab talali neu In, hit moni ka tatuin fa In aplenat, kat nen ma ka tatuin fa In a'an.

²⁵Es nane te In anmo'e kit het naben In to'as maputu, ma atsutai mafena natuin makenat a naek. In to'as maputu notu Israel on ai, mes hit kat naben tahin fa, ma ka tanoina fa na'ko sa' le hit tatef tokan.