Read Uab Meto YESAYA 43 Bible Online

YESAYA 43 - Uab Meto bible

YESAYA 43

¹Israel, UISNENO nakua In a'an nak on i, “Au es anmo'e ko ma pakae ko, kais mumtau, namneo Au mes ufetin ko! Au boin ulali ko ma Au tek ho kanam, ho Au ini ko.

²Kalu hom lak oe, of Au ok ko, of ho kam lem fa ambi ho susal nukat sin. Kalu hom nao mok ai, of ho kam put fa, lasi-lasi su'at mafena of ka nale'un ko fa.

³Natuin Au UISNENO Kau, ho Uisneno, Uisneno knino atoni Israel, ho afetin es Kau. Au fe Mesir anfani ho afetin, Sudan ma Syeba, anseka ko.

⁴Ho maupa ko anbi Au matak, Au utola ko ma Au nek umnau ko; ma Au fe mansian anseka ko, uf-uf anseka ho monim.

⁵Kais mumtau, natuin Au umafo ko. Na'ko neno tesan ma na'ko neno saen Au lelu ho sufam sin nem nabuan.

⁶Ma Au fe plenat neu bian a'li ma neu bian a'ne'u he nati' nafetin sin nok manoe. Maut he ho anmone sin anfani nem na'ko bale lo ma ho anfeto sin anfani nem na'ko pah in tu'an.

⁷Natuin sin al-al sin anboin sin neki Au kanak, Au mo'e sin he neki apinat neu Kau.”

⁸Uisneno nakua In a'an nak, “Amlelu sin anhake anbi Au to matfolo sin matkenu, maski sin mamata, le antono, maski sin maluke.

⁹Amlelu ale to sin nabuan ma ale uf sin niubnon. Sekau ka anbi sin uisneno teta le naton nalali sa' le hen bol anbi tabu i? Leko sin nahakeb sin asaksit, ma naton nak sin namneo, he nati' al sin le sin nauab, nak namneo onane teb!

¹⁰Hoi Au to, hi le nane es asaksit-asaksit neu Kau, Au beti ani ki amfani Au ate, he nati' nahin Kau ma anpalsai neu Kau, ma nahin nak Au lo Uisneno Kau. Au Uisneno mese kun, katit fa esle' he nahunun Kau, ma le namuni na'ko Kau.

¹¹Au meskuk UISNENO Kau, al Au mese es ufetin katit fa es he nafetin naikoti kau.

¹²Au uton ulali neu ki, Au es ufetin ki, ma ka uisneno teta fa le anbi hi atnanam; Au asaksit-asaksit es ki. Ma Au, le i Uisneno Kau,

¹³talan te nabal-bal Au Uisneno Kau. Katit fa es he nafetnon na'ko Au kuasat, ai hen ek au mepu.”

¹⁴UISNENO hi Afetin, Le'u Knino Israel, nakua In a'an nak, “Natuin hi Au sonu solalus neu Babel, ma nape' eno besi ume o'of; han hunun atoni Kasdim Au ubaina ma anfani han kaet.

¹⁵Au UISNENO Kau, hi Uisneno knino, hi Kesel le anmo'e ko, hoi Israel!”

¹⁶UISNENO anmo'e nalali lanan mese anao nok tasi, anao nok oe le anfoe ma namaunu.

¹⁷In anlenu in solalus sin ma nakaf makenat sin hen maken, ma sin anao mat nok aklet ma bikase. Mes sin anbel, ma kan fen fa, sin anmate on paku anmate.

¹⁸UISNENO nakua In a'an nak, “Ka maota fa he mimnau lasi un-unu, luman kun he mimnau sa'-sa' afinit.

¹⁹Amkiso nai, Au mo'e lasi fe'u mese; in anfatnonen, ai ho ka mit fa ka? Of Au mo'e lanan anbi mnela snaen, ma noe anbi mnela hufui.

²⁰Mu'i fui of naliatas Kau; meo asu ma kol paha snaen of anpules Kau, natuin Au fe oe neu mnela snaen, ma oe anbi mnela hufui he Au uinut Au to mabeti sin.

²¹Au pakae to i neu Kau, he nati' sin neki pules ma liatas neu Kau.”

²²UISNENO nakua In a'an nak, “Mes ho Israel, ho kam onen toti fa neu Kau, ma ka mululi mubes amteni fa neu Kau.

²³Ho ka meki fa bibi kase neu fua tulu mnotu, ma ka munaeb Kau fa meki ho tulu tnatas. Mes Au ka ubeku ko fa eki tulu tnatas, ai ususab ko nok he toti atu fomeni.

²⁴Ho kam sos Kau fa atu fomeni le fomen le'uf neu Kau, ma ka munokab fa Au lomik meki ho fua lolot in balun. Mes hom ha'fen Kau meki ho sanat-sanat sin, ma ho mususab Kau meki Ho tusa sanat sin.

²⁵Mes Au Uisneno Kau le Au nose ho sanat sin, Au sako ho sanat sin natuin Au monik onle nane; Au ka umnau fa ho sanat sin.

²⁶So hi mimnauba Kau, aim he hit atnao teu alef lasi sin, muton ho lasi nai, he nati' teb nak ho mumneo.

²⁷Ho bei ma ho nai ahunut sin nasanab nalalilen, ho atopu to sin anlaban Kau,

²⁸ho ana' fua tulu sin nale'un nalali Au Ume. Es nane te Au una'at Israel he nati' nasi'ut sin, Nai Yakub sufan Au ufetin sin he nati' nale'un sin.”