Read Uab Meto YESAYA 44 Bible Online

YESAYA 44 - Uab Meto bible

YESAYA 44

¹UISNENO nakua In a'an nak, “Amnen nai, hoi Yakub Au ate, hoi Israel Au to mabeti!

²Au UISNENO Kau le Au es anmo'e ko, le Au pakae ko na'ko ho aina apun, ma le Au bab ko. Kais mumtau, Au ate es ko, Au to mabeti le Au nek ani.

³Natuin of Au of oe neu nain ametos, ma Au usaiba noe sin neu mnela snaen. Of Au fe Au kuasat neu ho sufam sin, ma Au fe tetus neu ho anah sin ma ho upuf sin.

⁴Sin of anmoni namlia on hun anhaumak oe ninen, on hau aijob anbi noe ninen.

⁵Es-es of an au nak in aon nane Au ini kun, ma nem namesbon nok Nai Yakub in sufan sin. Ma es-es antui anbi in niman nak: UISNENO Ini kun, ma antek in aon nak lokif taluf nonot Uisneno.”

⁶I a'an UISNENO Akuasat Afinit, Kesel ma aneot ahafot Israel, “Au Uisneno mese kun, Au ahunut Kau ma amunit Kau.

⁷Sekau in on Au ka? Amlenu in hen hake mat nai! Maut he in naton ma nalile nani neu Kau! Sekau ka es nahin nalali lasi neno amnemat na'ko neno ahunut talan te neno amsoput?

⁸Au to kais hi mimtau, ai hi miskek, ait ka na'ko fa neno ahunut talan te muni i, Au uton ulali neu ki lasi sa' le of anbol anbi neno amnemat? Hi Au saksi ki. Katit fa aneot ahafot bian ma Au ka uhin fa sin.”

⁹Atoni le anmo'e le'u mahuma nane ka maota fa, ma uisneno teta le sin nabes neu sin nane ka maota fa. Sin le nabes neu le'u mahuma nane sin matan anfolo ma ka nahin fa sa'-sa', es nane te sin mes napeni lasi mae.

¹⁰Luman kun neu le anmo'e ma antosi le'u mahuma ma nabes neune on uisneno teta!

¹¹Namneo ale atoni le sin nabes neu le'u mahuma of sin napeni mae. Atoni le anmo'e le'u mahuma nane sin atoni a'lafu kun. Amlelu sin anfen ok-oke; of sin namtau ma namaebon.

¹²Apakae besi naiti noni molo tuka mese ma anpakae nani anhaumak ai ma antutu nani neki besi tutu. In anmepu neki in matanin oke. Leka fe in fe anmepu, in namnah, anmeno ma anhae.

¹³Apakae hau ansu' hau. In anlun hau neki ao lunat, ma anlun nani neki bale lunat ma anmo'e nani le'u mahuma mas atoni leok le'uf, ma antao nani anbi in ume nanan.

¹⁴Hau le in anpakae oni na'ko aijob, ai hau matani bian le in nafae anbi nasi nanan. Ai oni in ansen hau aminat ma anpao ulan he namonib nani.

¹⁵Hau bian na'ko hau nane in naiti anfani hau mnotu neu hen lal ai, ma antunu u tunu, ma anse'i sisi, oke te in nekan naleko. In anlal ma in nak, “Koi, min le'uf, ma maputu! Namneo ai i in neki alekot!” Hau in nesin nane in anpake hen mo'e le'u mahuma. In naluli ma nabes neune ma in onen nak, “Ho au uisneno es ko, mufetin kau nai!”

¹⁸Atoni-atoni onle nane namneo sin amonot kun. Sin antobe sin matan ma sin nekan, talan te sin ka nahin fa sa'-sa'.

¹⁹Anmo'e le'u mahuma nane sin ka natenab ante fa, “Hau nane in bian au otu ani, ma sin atu nane au pake he tunu utunu' ma se'i sisi neu au mnahat. Oke te hau bian sin au mo'e le'u mahuma. Es nane te au ubes neu hau tuka mese!”

²⁰Taos mo'et nane papmese on neku afu. Nasekeb atoni nane natuin in tenab amonot, talan te kan bab fa in anteni. In ka nabe'i fa he nauab nak le'u mahuma le anbi in niman nane nahenu nok fulit ma poi.

²¹UISNENO nakua In a'an nak, “Mumnau ale lasi i, hoi Israel, natuin Au ate es ko. Au pakae ko, Au ate es ko, Israel, of Au ka nikan ko faa!

²²Au li'u ho tanhais on nope, Au uneku ho sanat on nipu. Amfani amu nai meu Kau, natuin Au es ufetin ko!”

²³Mumlil ma mumoke nai, hoi neno tunan, amhunun ma amkoa nai, hoi pah pinan kuni peni! Mimlil ma mim oke nai, hoi tubu-tubu sin! Ma nasi sin ma ale hau le anmoni anbine! Natuin UISNENO nalile nalali In anpinat natuin In nafetin Israel In to.

²⁴UISNENO hit asoit Afetin nakua a'an on i le anpakae ko na'ko hoi aina apun, nak, “Au UISNENO Kau le Au es tao ma mo'e ale sa'-sa' ok-oke, ma Au es u'ben obet neno tunan, ma Au mo'e pah pinan fun es kan bab Kau fa.

²⁵Au es a'eka Mafefa knino moel sin na'ko sin ote naus, na Au es uneku mat mahine moel sin. Uab a'at atoni mahine Au es uneku mat mahine moel sin. Uab a'at atoni mahine Au es ukain sin, sin mahine Au ubaina ma anfani lasi mono.

²⁶Au es umepan a'at na'ko Au ate, ma Au es unaoba lasi le Au haef sin naton nalali, Au ak of natua nafani Yerusalem, ma kot-kot Yehuda of Au ufena ufani sin; sin fatu tutnaes of Au uleko ufani sin.

²⁷Au es ak neu tasi ametak ak: Ameti nai! Au he umeto ho noe sin.

²⁸Au es ak neu Nai Kores, Ho es of muplenat Au to, ma munaoba ale Au lomik. Mupoitan plenat nai he nati' nafena nafani Yerusalem, ma Ume knino UISNENO nahakeb nafani in fatu naif.’ ”