Read Uab Meto YESAYA 45 Bible Online

YESAYA 45 - Uab Meto bible

YESAYA 45

¹UISNENO anbeti nalali Nai Kores anfani kesel; UISNENO anlek in he nis ma anbe'u ale uf-uf ma he naipu ale kesel sin kuasat. UISNENO of anfai ale eno kot naek sin neu in, katit fa es he maeka. UISNENO nakua In a'an neu in nak,

²“Au of uloitan lanan neu ko; tubu ma neten of Au unel ani, eno-eno besi of Au upe' ani sin, ma ale senit-senit besi of Au ipu ani sin.

³Of Au fe neu ko maus ma mu'if le natol'on, he nati' ho muhin Au le i UISNENO Kau, atoni Israel sin Uisneno, le Au boin ulali ko eki ho kanam.

⁴Au boin ko ma fe ko kanaf, maski ho ka muhin Kau fa. Au fe ko sutais he hom bab Israel Au ate, natuin sin le nane Au nonot mabeti.

⁵Au UISNENO Kau, katit fa es anteni, Au Uisneno mese kun. Au pake ulali ko eki bale makenat, maski ho ka muhin Kau fa.

⁶Ale lasi nane Au tao ma mo'e he nati' na'ko neno saen talan te neno tesan ale uf nahin nak Au kun UISNENO Kau, katit fa uisneno teta al Au mes.

⁷Au es a'tao ma mo'e meusine ma mesokan. Au es usanut tetus ma amle'ut, Au UISNENO Kau Au es tao ma mo'e ale lasi nane oke.

⁸Na'ko neno tunan Au usanut lasi mnisat on ulan, pah pinan natfai neu hen simo nani, oke te namonib lasi aomina ma lasi fetin; Au UISNENO Kau Au es tao ma mo'e ale lasi nane anbol.”

⁹Amle'ut neu atoni le anmaban ma anmatoe nok in Apakaet; in onle nai' le anlaban ameput le anmepu in. Ai afu kele natoti neu ameput nai' nak, “Ho mo'e sa' ka?” Ai nai' ansakoi nak in ameput nane kan mu'i fa mahine?

¹⁰Amle'ut neu atoni le nak neu sin mnasi nak, “Nansa' talan te nahonis kau onle i?”

¹¹UISNENO knino Israel nakua a'an nak, “Mitoti neu Kau antom neno amnemat. Mes kais hi mitoti neu anah-anah sin, ai amlelu Kau he mo'e sa'-sa' es.

¹²Au UISNENO Kau Au es mo'e pah pinan, ma pakae atoni pah pinan he natua anbine. Nok Au kuasat Au u'ben obet neno tunan, ma Au es uplenat manas, funan ma afkun-afkun abit neno tnanan.

¹³Au es ufena Nai Kores he nanaoba Au lomik ma nahakeb amneot. Of Au unel ale lanan le in anao nokan. In of nafena nafani Yerusalem ma nafetin Au to le mapolin, ka nok fa noni poh fefaf ma ka nok fa baen.” UISNENO Akuasat Afinit nakua nalali In a'an.

¹⁴UISNENO nakua In a'an neu Israel nak, “Hom pal pah Mesir in afan nai ma bale mnisat na'ko Sudan. Atoni na'ko Syeba le matani ma amanoet anfani ho ini kun; sin anao natuin ho kotim nok makolen besi. Of sin naluli ma nabes neu ko ma nak, ‘Uisneno namneo-namneo nok ko; katit fa uisneno al In kun anmese kun.

¹⁵Uisneno le nafetin Israel In le nane Uisneno le natol'on.

¹⁶Atoni le anmo'e le'u mahuma; of namaebon ma nasi'ut sin.

¹⁷Mes UISNENO nafetin Israel; nafetin sin nabal-bal. Of ka namaeba ki fa talan te nabal-ba.’ ”

¹⁸UISNENO es anmo'e obet neno tnanan, In le nane Uisneno kun! In es anmo'e ma anpakae pah pinan, nahel matani ma anhake na'ki. In kan mo'e fa hen fani bale tena maten, mes bale he natua nani. In es nakua a'an nak, “Au UISNENO Kau, katit fa es anteni.

¹⁹Au ka umolok utolo' fa, ai ka eki fa lasi le natol'on. Au ka lelu fa Au to Israel he nami Kau lum-luman. Au, UISNENO Kau Au umolok lasi amneot, ma Au uton sa' le namneo.”

²⁰UISNENO nakua In a'an nak, “Mibua nai ma aim nai ok-oke, hi al-al ki le nafetin ki na'ko uf-uf! Amonot kun neu atoni-atoni le sin anao ma nauban fun anloi le'u mahuma, ma sin onen toti neu uisneno teta le ka nafetin nit fa sin.

²¹Meki ho lasi nem nai ma muton ale ho amneot sin, ma maut nai sin al-al sin namolok ho lasi. Sekau es nabeno lasi nane ma naton nani na'ko ahunut? Au lo Uisneno amnonot ma Afetin, katit fa bian anteni al Au! Ai ka Au UISNENO Kau fa? Katit fa uisneno al Au mes!

²²Hoi, to pah pinan ok-oke, mite'un nai meu Kau he nati' nafetin ki natuin al Au es Uisneno Kau, katit fa es anteni!

²³Au manta'en ulalien, ma Au lasi manta'en nane of Au ka pukai ani fa; Au sup eki Au aok: Atoni mese-mese of anli'tu anbi Au humak, ma anbi sin a'at mese-mese sin anmanta'en he na'ki neu Kau.

²⁴Ale atoni of nak, ‘Lasi amneot ma be'it matani al na'ko kun UISNENO!’ Ale atoni le na'un to'an neu Kau of nem neu Kau ma napeni ma'e.

²⁵Mes Nai Yakub in sufan of nafetin sin, ma sin of naliatas Kau.