Read Uab Meto YESAYA 47 Bible Online

YESAYA 47 - Uab Meto bible

YESAYA 47

¹UISNENO nakua In a'an nak, “Hoi, Babel, amsanu nai mu'ko ho toko, ma amtoko nai meu afu. Ho ka matani ko fa ma ka mumas fa on afi neno ahunut.

²Amfole ut meki fatu; musanut ho soba, muaiti ho abtais talan te ho fitim anpoi, ma amlak noenu nai.

³Atoni of nit ho monas ko, nasi'u ko ma namaeba ko. Au mes seunbanin ko, ma katit fa es he nafetin ko.”

⁴Uisneno knino Israel nafetin kit, In kanan UISNENO Akuasat Afinit.

⁵UISNENO nakua In a'an neu Babel nak, “Mutena nai, ma amtam nai meu mesokan. Of kan tek ko fa anteni nak ‘Kesel fenai neu ale pah-pah.’

⁶Afi neno ahunut Au uto'an Au to, Au ka kiso fa sin on Au to mabeti. Oke te Au una'at sin neu ko, ma ho kam nek mumnau fa sin, mes ale mnasi sin hom hamu'i sin nok maufinu.

⁷Ho mak of hom fani kesel talan te nabal-bal, ma ho kam naben fa ai ka mutenab fa in amsopun.

⁸Es nane te amnen nai neu Kau, ho le amlomi he mami amlilat! Ho mutenab mak ho monim antainine, ma katit fa es on ho. Ho mutenab of ho kam banu fa, ma ho sufam of ka namle'u fa.

⁹Mes tabu al pal-pala, al anbi neno mese, lasi nono nua en nane of anbol. Maski hom pake le'u ma ela lisan, ho mone ma ho anah sin of nasik nani sin amsa.

¹⁰Hom naben tainine anbi ho mo'et amle'ut, ho mutenab ho mo'et nane es ka nit nani fa. Ho nek manoe ma mahine es nasekeb ko, ho mak katit fa es he on ho.

¹¹Mes amle'ut of nem neu ko, ho ela lisan sin of ka nafetin ko fa na'kone. Lasi amle'ut of nem neu ko nok askeken, ma ho ka muhin mani fa na'ko neno ahunut.

¹²Muhelnom piut nok ho le'u ma ho ela lisan sin, le nahaebon neu ko na'ko ho fe an-ana ko. Sekau nahin lasi nane maota neu ko, hen hakatau ho musu sin.

¹³Hom ole natuin ale fainekat amfau le'uf nane. Amlelu sin le naton nahin hi monim anfen he nafetin ko; sin le antae nalek-leko obet neno tunan ok-oke. Ma le anlilo ma antae afkun-afkun, ma anbi ale funan fe'u naton nahin sa' le of anbol neu ho monim.

¹⁴Amkiso, sin anfani on hau meto le notu sin neki ai; sin ka nabe'i fa he nafetin sin aon! Ai in pinan nane maput le'uf neu sin, ka onfa ai flae neu hen lal ai.

¹⁵Nane ale atae ahinet sin maota neu ki onane le sin nahaebon neu ko na'ko ho fe an-ana ko; sin mese-mese anao nasaitan ko, katit fa esle' nem hen bab ko.”