Read Uab Meto YESAYA 48 Bible Online

YESAYA 48 - Uab Meto bible

YESAYA 48

¹Amnen nai, hoi Nai Yakub in sufan, Yehuda in sufan le anpake kanaf Israel, ho mak ho mutenab Uisneno Israel, ma hom sup meki UISNENO In kanan. Mes ho lasi supat nane ka namneo fa.

²Maski onane amsa ho muliabom mak kot knino in tuane es ko ma ho mak hom sonlaitom neu Uisneno Israel le antek nak UISNENO Akuasat Afinit.

³UISNENO nakua In a'an nak, “Amnen nai, hoi Israel! Lasi sa' le afi anbol, Au uton ulali neu ki na'ko neno ahun-hunut; sa' le Au uton, nok askeken Au unaoba ma utis ani.

⁴Au uhin nak ho nek manu ko, il mafaun ko ma nakfatu ko.

⁵Na'ko ahunut Au uhin ulalien; fe kan bol fa fe Au uton ulalien, he nati' kais ho mu'uab, mak nane taos mo'et na'ko ale le'u mahuma.

⁶Ale Au lasi beno le hom nen anbol nalalien; ho mes he muteb mak Au taos ma Au mo'et nane namneo. Au he uton a'teni ko lasi-lasi fe'u, ale lasi tolo' le fe ho ka muhin mani fa.

⁷Au fe a'tao ma mo'e ma ka na'ko fa un-unu; ho fe kam nen mit fa antom lasi nane, he nati' kais ho mumolok, mak ho muhin ale lasi nane ok-oke.

⁸Au uhin es kan sian ko fa, na'ko un-unu ho atanhais ko. Es nane te ho ka muhin mani fa ma hanaf mese amsa kan tia nit fa ho lukem.

⁹Au none Au to'as he nati' naliatas Au kanak, Au none ani neu ko, he nati' kais nale'un ko.

¹⁰Au su' ko anbi hamu'it in nanan, on naknino noni muti anbi ai ume hana in nanan.

¹¹Au mo'e lasi nane natuin Au kanak, natuin Au ka fe fa Au kanak he nale'un; Au apinat Au ka bati fa neu sekau amsa.”

¹²UISNENO nakua In a'an nak, “Amnen nai Israel, nonot le Au boin, ho Uisneno nabal-bal es Au. Au ahunut Kau, ma amunit Kau.

¹³Au nukuk es anpakae pah pinan ma Au es u'ben obet neno tnanan. Leka Au boin sin kankenu sin nem nok manoe.

¹⁴Mibua ok-oke nai ma amnen nai! Anbi ale uisneno teta katit fa es he namolok nak au to mabeti of nape' Babel; of in anmo'e sa' le Au lomi.

¹⁵Au es ukua Au a'ak ma Au boin in, Au es a topu in, talan te in nis ma anbe'u.

¹⁶Aim anhaumak Kau nai ma amnen nai, na'ko a'afi un-unu Au umolok nok muti monas; ma Au molok Au utis ani.” Tabu i UISNENO ansonu kau ma anfe neu kau In kuasat.

¹⁷Uisneno knino Israel ho Afetin, In nakua a'an nak, “Au UISNENO Kau ho Uisneno, le Au unoina ko sa' le maota, ma Au topu ko anbi lanan le he hom nao mokan.

¹⁸Bait hom nen ale Au plenat sin, onane te ho halan ma aomian nane on noe mese le kan meti nit fa, ma ho amneot nane on oki anbi tasi pesen le ka nasnas nit fa.

¹⁹Ho sufam sin amfaun of on snaen; Au panat sin talan te ka nale'un fa sin.”

²⁰Amnao nai ma maen nai na'ko Babel, muton nai beno i neu pah-pah. Muton nai nok han amlilat mak: “UISNENO nafetin nalali Israel, In ate!

²¹Tabu In antopu sin anao nok paha snaen, sin kan meno fa. UISNENO nape' tubu fatu ma oe ansai, na'ko fatu In natunu oe neu sin.

²²Kan mu'i fa lasi fetin neu atoni amle'ut.” UISNENO nakua In a'an onle nane.