Read Uab Meto YESAYA 49 Bible Online

YESAYA 49 - Uab Meto bible

YESAYA 49

¹Amnen Kau nai, hoi pah-pah a'lot ampanat nai Au a'ak. UISNENO anboin kau nahunun na'ko fe ka nahonis kau fa. In beti kau nahun na'ko fe au bi au aina in apun.

²In anmo'e au uab sin nasik on suni, nok In nukun In nahafo kau. In nabaina kau on as'anef panan aikan, ma nalai nani anbi tuke he nati' anpake nani.

³In nakua In a'an neu kau nak, “Au ate es ko; of naliatas Kau natuin ho.”

⁴Mes au ak, “Au haet nane luman; au ulali au matanik nok lum-luman!” Mes au uhin UISNENO anpesi kau, Uisneno anseunbanin kau natuin au mo'et.

⁵Nahun na'ko fe ka nahonis kau fa, UISNENO anboin kau fani In ate, he nibun to Israel, he nati' sin anfani neu In. UISNENO anmo'e kau au makana kau, au matanik es Uisneno.

⁶UISNENO nakua In a'an neu kau nak, “Mepu naek mese anpao ko, hoi Au ate; ka al fa ho of meki mufani nesif na'ko Nai Yakub in sufan ma muleko mufani kanaf anaet uf-uf Israel, mes anmo'e ko amfani meusine neu uf-uf he nati' pah pinan ok-oke Au ufetin ani sin.”

⁷Uisneno knino afetin Israel nakua In a'an neu atoni le nasi'u nae le'uf, ma ale uf-uf le nato'an sin ma le anfani ate neu ale akuasat nak, “Kesel-kesel of nit Au mepu, sin of anfen ma au tola Kau. Ale akuasat lasi nane amsa, oke te naluli ma nabes.” “Nane anbol natuin UISNENO In anbeti nalali In ate; Uisneno knino Israel na'ko nabal-bal neu In lasi manta'en.

⁸UISNENO nakua In a'an neu In nonot nak, “Anbi neno Au lomi, of Au utae ko; anbi neno Au ufetin. Of Au bab ko, ma panat ko, ma au mo'e lasi manta'en neu uf-uf. Au uloitan pah le antainine ma anfani pah bale bela le natua nani.

⁹Atoni le natam sin anbi o'of Au lelu napoitan sin; abit mesokan Au upoitan sin neu meusine. Ma sin le anbi tubu monas of sin kan labu fa sa'-sa', fun naloitan bukae anbi ale lanan.

¹⁰Sin of kan meno fa ai ka namnah fa, ma manas of kan toman fa sin anbi mnela hufui. Natuin Au, Au nek umnau sin, ma of Au topu sin, ma tuntaku sin neu oe mata honis.

¹¹Of Au mo'e lanan nao nok nuaf, ale Au lan opa sin of Au unel ani.

¹²Au to sin nem na'ko lo, na'ko bian a'li, neno tesan, ma Sinim anbi bian a'ne'u.”

¹³Amsi nai hoi obet neno tnanan, amkoa nai hoi pah pinan, ale tubu sin amkoa nai nok amlilat! Natuin UISNENO In nem namela In to, In nek namnau In to le anhamu'i sin.

¹⁴Mes abiten Yerusalem nak, “UISNENO nasaitan nalali kit, hit UISNENO In nikan nalali kit.”

¹⁵UISNENO natae nak, “Nabe'i ka ainaf mese in nikan in anah, ma ka nek namnau fa in anhoni? Maski in nikan in anah, mes Au of ka nikan ko fa.

¹⁶Yerusalem, Au umnau ko piut; ho kanam Au lun ani anbi Au nimak nanan.

¹⁷Atoni-atoni le afi sin nafena ko sin of nem nok manoe ma le afi sin nale'un ko of sin anpoi ma sin anao kun.

¹⁸Maiti ho matam ma amkiso nai anfun natef, ho to sin al sin nabua ma sin nem neu ko. Natuin Au, Uisneno Amonit, Au ukua Au a'ak, namneo of ho muliabom natuin ho to sin onle bife fe'u le naliabon natuin in bale amasat.

¹⁹Ho pah anhufui ma tena maten, anfani bale ma'len le'uf, neu sin le ansinmak he natua anbine. Ma sin le anlomi he nale'un ko, sin anao na'lo na'ko Ko nalalien.

²⁰Li'ana-li'ana le nahonis sin anbi bale polin of sin nak neu ko nak, ‘Pah i ma'len le'uf neu kau, amfe kau bale he nati' au utua bi i.’

²¹Ma of ho mumolok anbi ho nekam mak, ‘Sekau ak es nahonis li'ana-li'ana nane neu kau? Ait au ka uneku ulali fa au anah sin, ma au ka uhoni teni fa? Naiti kau ma anpolin kau ma anli'u kau talan te au moni mes. Es nane te anah-anah nane sin na'ko me, ma sekau ka es nanaeba sin?’ ”

²²UISNENO Amnanut Afinit nakua In a'an neu In to nak, “Of Au fe taka' neu ale uf-uf ma sin of anfe nafani sin anah sin; sin of nasnono neki ho anmone sin, ma ho anfeto sin of natutlai sin.

²³Kesel sin of anfani amaf neu ko, ma ale usif fenai sin of sin anfani ainaf neu ko. Sin of naluli ma nabes ma antola ko ma nabaunon neu ko. Ma of ho muhin mak Au UISNENO Kau; sekau le nafnek neu Kau of ka namaebon fa.”

²⁴Fun hi mitoti mak, “Nabe'i ka nasik nafani bale sikan na'ko meo pa'e, ai nabe'i ka nasik nafani le anheke nan sin anbi makenat na'ko atoni amaufinut sin niman nanan?”

²⁵UISNENO natae nak, “Lasi nane es of anbol. Meo pa'e in atoni sin le in anheke nan sin anbi makenat of nasik nan nafani sin. Bale masikat anbi atoni amaufinut in niman le nasik sin anbi makenat of nasik nan nafani sin. Natuin Au eknok a'laban ho musu sin; of Au ufetin ho anah sin.

²⁶Of Au mo'e ho musu sin anmafun na', talan te sin malolo mafani es nok es. Ma ale to pah pinan ok-oke of sin nahin nak, Au, UISNENO ho Afetin; Abe'it Anesit Afinit, Nai Yakub in Uisneno, ho Asoit.”