Read Uab Meto YESAYA 5 Bible Online

YESAYA 5 - Uab Meto bible

YESAYA 5

¹Amnen nai au sit antom au soba in lene tua min kase. Au soba anmu'i lene tua min kase mese anbi tubu in un le namlia ma naspeti.

²In anfoi nain ma napoitan ale fatu. In ansen hau tua min kase le mabeti In nahakeb baki lape amnanut he nati' anpao. In anhani bola' mese bale hen mepu tua mina mtasa, oke te in anpao in fuan he namnatu, mes tua min kase nane in fuan mahai.

³Es nane te Au soba nak, “Hi al-al ki, tuafen Yerusalem ma Yehuda, mifek lasi neu Au lene tua min kase ma Au amsa.

⁴Sa' anteni ka es of Au he mo'e, mes sa' anteni le fe Au ka unaoba fa neu Au lene tua min kase nane? Nansa' in napoitan fuan mahai, ma ka fuan alekot fa onle Au upane ma ufnek?

⁵Au of unaoba lasi i neu Au lene tua min kase: Klabat le anfun natef nan of Au pukai ani, baki lape le naneo ma nahafo of Au utseleb ani, oke te ufetin mu'i fui he nale'un ma anhali nale'un nani.

⁶Au of ufetin ani he nati' ale nabfui anmoni anbin. Tua min kase in un of Au ka lefi fa, ma Au of ka usona fa. Mes Au ufetin he nati' katila ma kasunat ma hun an amu nan, ma Au of ukain nope he nati' kais nasanut ulan neune.”

⁷Natuin lene tua min kase UISNENO Akuasat Afinit nane es nonot Israel, ma atoni-atoni Yehuda nane hau tua min kase le In ansenan sin. Na'ko sin In napane ma nafek lasi amneot, mes al lasi maufinu. In napane ma nafnek he nati' sin namepan lasi amneot, mes al anbait antoti lasi amneot.

⁸Amle'ut neu ki le him sos ale ume ma misik ale lene hem sato hi mu'im! Fun ka lo anteni fa kan mu'i fa bale anteni neu atoni bian al hi mese kim es of hi mitua pah nane.

⁹Au nen UISNENO Akuasat Afinit ansup nak, “Ume-ume naek ma amasat le i of luman ma katit fa tuaf.

¹⁰Pah in afan of katit fa, lene tua min kase le in menuan hektar bo'mese al napoitan in oen liter bo'mese. Fini ane kase liter natun mese of al napoitan in afan nane ane kase liter bo'mese.”

¹¹Amle'ut neu ki! Na'ko nok-noka talantia anfai hi mepu nane al hi minu mninut amafut ma amafu piut.

¹²Anbi ale hi tolas sin hi mi'bae heo, biola, a'ke ma bobi ma mninut tua mina mtasa. Mes hi kan sian fa UISNENO In mepu ma sa' le In antao ma anmo'e nalali.

¹³Es nane te Au to le ka nahin fa sa'-sa' of anpo' sin ma anao onle atoni mapolin. Ale ana' aplenat ma to of sin anmate natuin amnahas ma meno.

¹⁴Nopu maten namkak nok menuan hen olo ale anaet anbi Yerusalem nok ale to le sin namlil anbi tolas.

¹⁵Of namaeba sin mese-mese, ma a'moko sin of nanebet sin.

¹⁶Mes UISNENO Akuasat Afinit In nalile ma naton In kuasat nok In antao ma anmo'e ale lasi amneot. Of In nalile ma naton In amneot anbi lef lasi amneot neu In to.

¹⁷Anbi bale kot le natsel ma namle'u nalali ale bibi ana' ma bibi kase of sin neku naba ma kan labu fa mnahat.

¹⁸Amle'ut neu ki le hi mo'e sanat piut-piut!

¹⁹Hi mak, “Maut nai UISNENO knino Israel nanaoba In lasi nok manoe nai! Maut he In nanaoba In salit nai, he nati' hit nit ma tahin.”

²⁰Amle'ut neu ki le hi mibaina lasi alekot ma anfani lasi amle'ut, lasi meusine anfani lasi mesokan, lasi menu anfani lasi min oni!

²¹Amle'ut neu ki le him tek hi aom amneot ma ahinet abainesit!

²²Amle'ut neu ki le hi minu tua mina mtasa nok matani! Hi atoni meo matani ki leka hi hem selo tua mina mtasa amafut!

²³Mes al neu he mipeni noni mate, hi mifetin atoni asanat, ma am eka ka asanat sin he napeni lasi amneot.

²⁴Him tite noina UISNENO Akuasat Afinit, ma hi mikle'at plenat Uisneno knino atoni Israel. Es nane te, on ane ta'u ma nab meto la anputu anmate anbi ai, onane amsa ho ba'am sin of anpunu ma nafo, ho tun sufa sin of anmeto ma anin of anfu neki sin.

²⁵UISNENO nato'an In to, In naloitan nalali neu hen kas sin. Tubu-tubu of nabeko; ale amates sin aon nitu of nahoebok anbi lanan-lanan on maklafu. Mes UISNENO fe nato' piut ma In of ankas piut.

²⁶UISNENO of In no'en uf-uf a'lot ma of sin nem lab labah.

²⁷Sin naloitan piut hen maken ma sin kan hae nahin fa. Sin kan tup nit fa ai kan sesa nit fa.

²⁸Sin as'anef na'aik ma sin tani klaot nakbet neu he makenat. Sin bikase ku'en on fatu ai, ma sin aklet haen naen matani on anin nautus.

²⁹Ale sin solalus sin nakunut on meo asu le anheke in osan, ma naen neki, ma katit es he nafetin nani.

³⁰Anbi neno nane anbi Israel ok-oke nahenu nok hanaf makenat onle tasi in a'lun. Amkiso nai, pah nane ok-oke nahenu nok mesokan ma nahenu nok nek masunu. Meusine anfani mesokan a'maten.