Read Uab Meto YESAYA 50 Bible Online

YESAYA 50 - Uab Meto bible

YESAYA 50

¹UISNENO nakua In a'an neu Israel nak, “Hoi Au to, ho mak Au li'u ko onle naimone mese le anli'u in fenai? Kalu onane, ho sul polin nane es me ka? Ho mak Au usosa ko, onle amaf mese nasosa in anah neu atoni atoti tusa? Kahaf! Anheke ko ma anpolin ko, natuin ho sanat ma ho tanhais.

²Nansa' na'ko Au nonot katit fa es he natae, anbi tabu Au amu ma Au boin sin? Ait sin natena natuin sin nak Au ka ube'i fa he soi upoitan sin ma ka ufetin sin fa ka? Namneo-namneo, natuin Au a'ak tasi anmeti, ale noe Au ubaina sin anfani mnela snaen, talan te ika-ika anmate ma nafo'.

³Obet neno tnanan Au ubaina ma anfani mesoka maten, Au tobe ani onle eki bale kulut ma kaet.”

⁴UISNENO Anesit Afinit nanoina kau he umolok, he nati' au molok namepan atoni ahaet sin. Anbi nok-noka In nafena au sinmakat he nen In noina neu kau.

⁵UISNENO anfe kau nek mahine; au ka uspiti ma ka u'lo na'kone.

⁶Au fe au kotik neu sin le anbeso kau; ma au su'ik neu sin le hen bok au konok. Au ka utolo' fa au humak leka sin nasi'ut kau ma nakinu kau.

⁷Natuin UISNENO anbab kau, talan te ka namaeba kau fa. Au uhelan au nekak he nati' au hake uhel; au uhin of ka namaeba kau fa.

⁸Natuin Uisneno anhaumak kau, In naton nak au ka usanab fa. Sekau anlomi hen tao ma anmo'e lasi nok kau ka? Aim nai hit atfen bua'-bua'. Sekau es hen laban kau ka? Amlelu in he nem anhaumak kau.

⁹Namneo-namneo, UISNENO Anesit Afinit In anpesi kau, sekau nabe'i he nasanab kau ka? Sekau es anluku kau mes namneku onle tainusat le ap-apu neku nani.

¹⁰Hi le mimtausan UISNENO, ma amnen In ate, lanan le him nao mokan oni mesokan, ma katit fa meusine le antana ki; mes hi miteb nai neu UISNENO; ma amsonlaitom nai meu hi Uisneno.

¹¹Hoi hi le amlomi he mile'un atoni bian, hi salit nane mes nale'un ki kun. UISNENO es anmo'e lasi nane anbol, mes anhamu'i ki nok mafena.