Read Uab Meto YESAYA 51 Bible Online

YESAYA 51 - Uab Meto bible

YESAYA 51

¹UISNENO nakua In a'an nak, “Amnen nai neu Kau, hoi hi le amlomi he nafetin ki ma hi le aim meu Kau ma amtoti he Au bab ki. Mimnau nai tubu fatu le nape'an ki na'kone, ma fatu mahani le anhani ki na'kone.

²Mimnau nai hi am uf Nai Abraham ma hi bei bi Sara; anbi tabu Au boin Nai Abraham, in kan mu'i fa anah, oke te Au fe neune tetus ma Au fe neune sufa ka'uf namfau.

³Yerusalem, of Au umela ko, ma al sin le natua anbi ho fatu tutnaes sin. Ho mnela hufui sin Au mo'e sin anfani etu, on le Eden, Au etu amasat ma maafa nane. Anbi nane sin of namlil ma namoke ma nasaeba tulu nekaf nok sit pules.

⁴Ampanat nai Au hanak, hoi Au nonot, amnen nai Au a'ak, hoi Au to. Au fe Au noina neu uf-uf, Au a'ak of antana sin.

⁵Lasi noina le Au fe neu ki in nem anhaumaken; Au tabu mnisat anhaumaken. Of Au uplenat ale uf-uf. Pah-pah a'lot sin anpao Kau piut ma nafnek neu Au mepu matani.

⁶Maiti nai hi matam amkiso obet neno tnanan ma amkiso nai neu pah pinan; obet neno tnanan of namneku on ai masu ma pah pinan of noe nani on kloe mna. Sin tuakenu of anmate on basin. Mes lasi aomina le Au fe of nabala piut talan te nabal, ma Au lasi mnisat of ka namsopu nit fa.

⁷Amnen neu kau, hoi Au nonot, hi mihin sa' le amneot; Au a'ak hi mipan anbi hi nekam. Kais mimtau kalu atoni pah pinan nasi'ut ki, kais miskek kalu sin nasi'ut ki.

⁸Sin of namle'u, onle ap-apu neku tainusat ma kauna neku abmuti. Mes lasi aomina le Au fe of nabala piut talan te nabal, ma Au lasi mnisat nane na'ko batnes neu batnes.”

⁹Amfen nai koi UISNENO, ambab kai nai, mufetin kai nai meki Ho kuasat. Amfen nai on afi un-unu anbi tabu Ho mumate bi Rahab ma mupau mumate kaun le'u tasi.

¹⁰Ho es mumeti tasi amsa, oe tasi mnanu le'uf. Ho mo'e lanan nao nok oe nane, he nati' atoni le Ho mufetin sin nabe'i anlak nokan.

¹¹Ma al sin le UISNENO nafetin sin of anfani ma antam neu Yerusalem nok hunun ma a'baf sin humkenu anmalin natuin lasi amlilat nabal-bal. Sin namlil ma namoke, susal ma mafena namneku nalalien.

¹²UISNENO nakua In a'an nak, “Au es umela ki. Nansa' ho mumtausan atoni pah pinan a'lafu, ma neu atoni pah pinan le anpolin sin onle hun?

¹³Nansa' hom nikan ho UISNENO ho Apakaet le In es na'ben obet neno tnanan ma nahakeb pah pinan? Nansa' talan te hom lilitai piut-piut neu ahamu'it in maunun le naloitan neu he nale'un? Namneo-namneo sin maunu le nane ka maota fa neu ko.

¹⁴Ale atoni le anheke sin anbi makenat of nafetin sin nok manoe; sin of kan labu fa bukae, ma of kan mate ma kan sub fa sin.

¹⁵Natuin Au le i UISNENO hi Uisneno, le nafena tasi talan te in okin anfoe. Au kanak nane Akuasat Afin-finit.

¹⁶Au es u'ben obet neno tnanan ma uhakeb pah pinan. Au ukua Au a'ak neu sion: Au nonot es ko; Au fe Au plenat neu ko ma Au uhafo ko eki Au kuasat.”

¹⁷Amnen nai, hoi Yerusalem, amfen nai! Kasat le UISNENO nasanut neu ko natuin In to'as hom sutai mulali talan te namsopu.

¹⁸Na'ko ho kua tuafenu katit fa es hen topu ko, ma na'ko atuasen anbi nane katit fa es hen tuntaku ko.

¹⁹Amle'ut nono nua of antoman ko; natuin makenat ho pah namle'u ma ho to sin anmaten amnahas. Katit fa esle' he nek namnau ko ma namela ko.

²⁰Anbi ale lanan ho to sin anbel natuin anole onle lus le antam anbi kleot in nanan. UISNENO In to'as nem neu sin, ma hi Uisneno anmaheke ma nabinan ki nok han maputu.

²¹Amnen nai al ki le anhamu'i ki, le anfaini-ni' on atoni amafut!

²²Hi UISNENO nakua In a'an nak on i, hi UISNENO le anpesi ki, nak, “Susal mafena le Au fe neu ki natuin Au to'as, of Au aiti ufani na'ko ki. Au to'as of namne, ma ka nabe'i fa he him sutai.

²³Hi susal mafena nane Au fe ani neu hi ahamu'it sin, le afi anlelu ki hi amtup anbi afu, ma anteli naklati ki, onle him fani lanan ma atoni anao nokan.”