Read Uab Meto YESAYA 52 Bible Online

YESAYA 52 - Uab Meto bible

YESAYA 52

¹Amfen nai, hoi Yerusalem, amfen nai! Muhelan ho nekam nai! Ampake ho bale pake anaet nai! Hoi Yerusalem kot aknino, atoni amle'ut of kan tam anteni fa nao nok ho eno.

²Amfen nai mu'ko afu, hoi Yerusalem, amtekal mani afu le na'ki anbi ko. Amsefi mufetin nai kolen besi le anfutu ho neom, hoi tuafen Sion le anheke ki!

³UISNENO nakua In a'an neu In to nak, “Nasosa ki nok lum-luman, es nane te tabu i nafetin ki amsa nok lum-luman.

⁴Afi ahunut him nao meu Mesir ma mitua ambi nane on atoni anao amnemat. Namuni te Asyur anhamnes ki ka nok fa bekat mau'.

⁵Es nane te Au he mo'e sa' anteni ka anbi i? Atoni Babel anheke ki son-sona. Sin le anhamu'i ki namoko'on ma nasi'ut Kau piut-piut.

⁶Es nane te hi of miteb mak Au Uisneno Kau, ma anbi tabu nane hi of mihin mak Au es ukua ulali Au a'ak neu ki.”

⁷Of nok amlilat anaek hi mit Au haef; in anao anfun natef nuaf ma neki beno alekot, beno halan pah, beno lasi fetin neu Sion; in nak, “Uisneno nane hi Kesel kun!”

⁸Amnen nai, han koa amlilat apao kot, sin anhunun ma ankoa ok-oke! Natuin sin nit nok sin matan neu UISNENO ankoenon nem neu Sion.

⁹Amhunun ma miba' nai, hi fatu tutnae Yerusalem, natuin UISNENO namela In to ma nafetin Yerusalem.

¹⁰UISNENO nalile In kuasat, anbi uf-uf sin matkenu. Ma pah pinan ok-oke of ansaksi nani lasi fetin na'ko hit Uisneno.

¹¹Amnao nai! Misaitan kot Babel, hoi hi le misik meki bale Ume Uisneno! Kais him le'o bale amle'ut: Miknino hi aom nai nahunu na'ko hi hem nao.

¹²Hi of kam nao manap mis fa, ma ka on fa atoni le in naen. Natuin UISNENO of anbab ki: Uisneno Israel of nahafo ki na'ko pah pinan in tu'an ok-oke.

¹³UISNENO nakua In a'an nak, “Namneo-namneo, Au ate of in nis kun; of nalatan in ma namnanub in.

¹⁴Afi ahunut atoni amfaun naskek leka sin ankiso in, sin nale'un in human talan te in ka mas atoni fa.

¹⁵Mes muni i in anmo'e uf-uf naskek, kesel sin anmono anmaten natuin sin namkak. Sin of nit ma nahin, le afi ahunut sin ka nahin nani fa.”