Read Uab Meto YESAYA 54 Bible Online

YESAYA 54 - Uab Meto bible

YESAYA 54

¹Yerusalem, afi ahunut ho on bife le ankiu ma ka nahoni fa. Mes muni i muba' nai, ma amsi nai nok amlilat! Natuin ho anah sin amfau le'uf, nesin anbife le in mone ka nasaitan fa.

²Anmo'e ho um-ume balan anmenua; amkolan in tani sin ma amkus muhelan in kusat sin lek-leko!

³Fun of hom pe' ma amnao ma menua he neu ne'u ma li nok, ho sufam ho ka'um of natua uf-uf ma natua kot-kot le tabu i tena maten.

⁴Kais mumtau, of ka namaeba ko fa; ma of ka nasi'u ko fa ma of ho ka muskek ma ka mae ma kam ti'as fa. Ho of amnikan lasi munif le afi ho ka mu'ki fa; ma ho ka mumnau amteni fa ho lasi mo'el ma poi on bife banu.

⁵Ho Apakaet nane on ho mone neu ko, Uisneno knino Israel nane ho Afetin. UISNENO Akuasat Afinit, In kanan esle' nane. In Uisneno Akuasat pah pinan ok-oke.

⁶Israel, ho on bife munif mese le ankae natuin in mone nasaitan in. Mes Uisneno anboin nafani ko nak,

⁷“Al asmela mese Au usaitan ko; mes nahenu nok lasi manekat anaek Au aiti ufani ko.

⁸Al sumana mese Au utolo' Au humak neu ko natuin Au to'as fe anmaput-put. Mes nok lasi manekat nabal-bal Au nek ma umnau ko.” Onle nane ho Uisneno Asoit Afetin nakua In a'an neu ko.

⁹“On afi Au manta'en ok Nai Nuh nak oe sako nane of kan sae anteni fa hen kub pah pinan, onane amsa Au manta'en nak of Au ka uto'an ko fa anteni ai ka sali teni ko fa.

¹⁰Maski nuaf ma neten antainun, Au lasi manekat nane of kan tu' nit fa neu ko. Au lasi manta'en halan of Au na' piut,” UISNENO In a'an le In nek namnau ko.

¹¹UISNENO nakua In a'an nak, “Hoi Yerusalem, kot anukat, ho ka maota ko fa ma katit fa es he namela ko. Ho fatu naif of Au uhakeb ufani eki fatu-fatu maupa.

¹²Baki lape le Au ufena anfun natef kot Au ufena eki fatu maupa ma ho eno-eno sin eki fatu amtasa apinat, ma ho baki lape sin eki fatu amasat.

¹³Ale ho to sin ok-oke anfani Au asimo lasi, sin of anmoni nok halan nekaf anaek.

¹⁴Ho of nahakeb ko anbi amneot in un, na'lo na'ko lasi amtaus ma hamu'it.

¹⁵Leka sin nape' ho kot, Au es ka lelu fa sin, sekau amsa le nape' ho kot of sin naspae ma anmofu.

¹⁶Au es anmo'e apakae besi le anpese ai hen tutu besi makenat. Au amsa es uhakeb ana' aikan le anpakae besi makenat nane hen lolo ma namate.

¹⁷Mes ale besi makenat le antutu hen laban ko, of ka nis fa sa'-sa'. Ma ale lasi lukut anbi lef lasi maten of hom saksi muton ma musanab sin. Of Au fe lasi mnisat neu ale Au ate sin,” onle nane UISNENO nakua In a'an.