Read Uab Meto YESAYA 55 Bible Online

YESAYA 55 - Uab Meto bible

YESAYA 55

¹UISNENO nakua In a'an nak, “Aim nai al ki hi ale amenot, minu nai, fun naloitan nalali oe neu ki. Aim nai al ki hi le ka mu'i fa noni, amsimo nai u tunu ka nok fa baen ma ambukae nai! Tua mina mtasa ma susu naloitan nalali neu ki amsimo nai nok lum-luman.

²Nansa' him sos ale sa' le ka neki fa alekot neu ki, ma hi mihaebom neu sa' le ka namsenab ki fa? Mituin Au plenat nai, he nati' him bukae alekot, ma amsimo bukae aminat.

³Amnen nai, hi Au to ki, aim nai meu Kau, of Au fe neu ki honis nabal-bal. Natuin lasi maneka ma lasi aki'at anbi lasi fef bela le Au mo'e ani nok Nai Daud, Au mo'e lasi mafutus fef bela UISNENO nok ki.

⁴Namneo, Au mo'e in ma anfani ana' aplenat ma meo pa'e, saksit na'ko Au kuasat neu uf-uf.

⁵Hi of amboin uf-uf anao amnemat, ma of sin nem neu ki nok manoe, natuin Au, hi UISNENO, Uisneno knino Israel, natuin Au uliatas ulali ki.”

⁶Mili'om amfani aim nai meu UISNENO leka hi fe mipeni In; mo'en nai In kanan leka In fe anhaumak ki.

⁷Atoni amle'ut so naleko in monin, ma nafe'un in tenab. Leko in nali'on anfani neu UISNENO, he nati' in napeni UISNENO In manekan amnaut. So leko in nali'on anfani neu hit Uisneno, natuin UISNENO ansako sanat nok nek amnaut.

⁸UISNENO nakua In a'an nak, “Au tenab ka on fa hi tenab, ma Au lanan ka on fa hi lanan.

⁹On neno tunan namnanu nesi pah pinan, onane te Au tenab namnanu nesi hi tenab, ma Au lanan namnanu nesi hi lanan.

¹⁰Fun on ulan ansanu nem na'ko neno tunan, ma ka neki anfani fa, somak napet pah pinan, fun pah pinan maafa ma namonib ale luat, ma nafua he nati' asenat ansen ma abukaet anbukae,

¹¹onane te Au a'ak le anpoi na'ko Au fefak, kan fani nem fa luman neu Kau, mes in nis ma anmo'e sa' le Au lomi ma natis ale sa' le Au utenab.

¹²Hi of misaitan Babel nok amlilat ma amoket, ma neki ampoi nok aomina. Nuaf ma neten of namlil fun anhunun ma ankoa, ma ale haunu anbi mnela of na'pasa ok-oke.

¹³Hau aijob of anseka kisan ma kasunat. Han sufa of anseka mau mnuke ma klabat. Lasi nane anbol he nati' Au kanak mateka; Au fe neu ki taka' UISNENO le of ka namneku fa.”