Read Uab Meto YESAYA 57 Bible Online

YESAYA 57 - Uab Meto bible

YESAYA 57

¹Atoni alekot ma aknino anmate, ma katit fa esle' he nahin ma ankiso sin. Leka sin anmate nalali, sin nafetnok na'ko amle'ut ma sin nasnas nok halan.

³Mes hi, to asanat, aim nai he Au ufek hi lasi! Hi ka mileko amnesin fa ale anmo'e ela amle'ut sin, atoni amapaisa ma akaket sin!

⁴Hi manis sekau ka? Hi misi'ut sekau ka? Ai hi ka sanut mofut ki fa na'ko anmo'e sin ma alaban sin?

⁵Hi miluli mibes neu uisneno teta amliat ma mifetin hi aom anbi lasi sinmakat amle'ut anbi hi hau le'u sin un. Him sub hi anah sin anbi nenu sin ninen, ma anbi fatu bola' sin.

⁶Es nane te hi maini fatu maeki na'ko noe nane. Nane hi pa' ma hi nama' es la nane! Neu fatu-fatu le nane him op tua mina mtasa ma mitulu ane kase punen ahunut. Hi mak Au malin ok ale lasi nane?

⁷Hi amnao meu nuaf-nuaf sin tunan he mitulu fua tulu ma minokab hi sinmakat amle'ut.

⁸Him tao hi le'u mahuma nek sinmakat amle'ut anbi hi ume eno. Hi misaitan milali Kau. Hi mipoitan hi bale pake sin ma hi amsae meu hala tupa le anmenuab nani hem tup mok bife le hom baen mani hen tup nok ko, oke te hi minokab hi sinmakat amle'ut.

⁹Him pake mina ma fomeni, oke te amnao miluli mibes neu Molokh. Him sonu haef neu pah-pah a'lot, fun hi amnao meu bale atoni amates.

¹⁰Hi mami piut ma mihaebom piut neu ale uisneno teta. Hi mak sin nabe'i anfe neu ki matani fe'u, talan te hi kam ole fa.

¹¹UISNENO nakua In a'an nak, “Sekau ka uisneno teta nane le anmo'e ki hi mimtau, talan te hi mi'mo'e ma hi ka mimnau Kau fa? Ai hi ka miluli meu Kau fa anteni natuin a'lo le'ufen Au ka kiso ki fa?

¹²Mes Au uton neu ki; hi mo'et amneot nane luman, ma ale hi taos alekot nane ka maota fa neu ki.

¹³Kalu him ambai, maut he ale le'u mahuma nane nafetin ki! Anin of au fu naen neki sin ma nam neku. Mes atoni le nahaofton anbi Kau of sin napeni pah nane on bale bela ma naluli nabes neu Kau anbi Au ume.”

¹⁴Anmu'i amolok nak, “Amtao ma miloitan lanan nai neu Au to sin, maiti ampolin ale eka kebata.”

¹⁵Natuin Uisneno Amnanut Afin-finit ma aknino, Akuasat nabal-bal, nakua a'an nak on i, “Au utua bi bale alatas ma knino, mes Au utua bi atoni-atoni nek baun ma nek aklati le an au sin sanat, he uleko ufani sin be'in ma matanin ma sin lasi afnekan.

¹⁶Au ka usanab fa Au to talan te nabal-bal; Au ka uto'an fa Au to piut-piut, he nati' sin asmanan kais anole anfini, natuin Au es umonib sin.

¹⁷Sin sanat sinmakat apenut anmo'e Kau talan te Au uto'an sin, es nane te Au usanab sin ma Au koti sin. Mes sin nakan fatu ma es-es anbeti kun sin lanan.

¹⁸Au it ulali sin taos sin mo'et, mes of Au uleko sin amsa. Au of tuntaku ma bab sin ma umela akaet akulut sin.

¹⁹Of Au fe halan nekaf neu atoni ok-oke, neu ahaumakat ma a'lot sin. Of Au uleko Au to.

²⁰Mes atoni amle'ut onle tasi an oki ma anpes kan tainine fa. In nonon nane ansai neki maklafu ma klofo.

²¹Kan mu'i fa halan nekaf neu atoni asanat,” UISNENO nakua In a'an.