Read Uab Meto YESAYA 58 Bible Online

YESAYA 58 - Uab Meto bible

YESAYA 58

¹UISNENO nakua in a'an nak, “Ambai muhelnom nai meki ho be'im ok-oke! Muton nai neu Au to antom sin sanat-sanat sin.

²Sin naluli nabes neu Kau neno-neno, ma ansinak le nahin Au lomik, onle sin anmo'e alekot ma na'ki neu Au plenat. Sin namolok nak sin anmalin he naluli nabes neu Kau ma sin ansinmak Au plenat le amneot.”

³To nane natoti nak, “Ma ota sa' hit ta lenok, kalu UISNENO ka nit kit fa? Ma ota sa hit tabaun hit aok kalu In kan sian nani kit fa? UISNENO nakua In a'an nak, “Namneo-namneo, leka hi fe minahom, hi mami lasi mnisat neu hi aom ma miseke hi ameput-ameput sin.

⁴Leka hi fe minahom, hi mipoitan matoes mabanat ma hi mo'e lasi abulalut. Hi mak oni natuin hi minahom hi mo'e Kau he nen hi onen totis?

⁵Kalu leka hi minahom, him beso hi aom; hi miluli hi nakam on hun in non. Hi mauf ma mi'ben kalo ma amkaki afu ma amtup ambine. Le him tek mak hi minahom esle' nane ka? Hi mak Au lomi ki nok hi mo'et le nane?

⁶Lasi tanahok le Au lomi esle' i: Amsefi nai kolen besi lasi hamu'it ma amsefi nai kolen besi lasi ka amneot, ma mifetin nai atoni-atoni aloi mafena.

⁷Ambati nai hi bukae neu atoni le namnah, amsimo nai atoni-atoni atoebakes anbi hi ume. Amfe nai tainusat neu atoni monas sin, ma kais amtite ho bia le hem bab in.

⁸Ma meosine of anbol neu ko onle manas anpe', ma ho papa' sin of naleko nok manoe. Of Au ok ko ma ufetin ko. Au ok ki ma uhafo ki na'ko snama sletu pah pinan.

⁹Leka kalu him onen, of Au simo hi onen totis. Leka kalu hi amsakoi neu Kau of Au utae ki. Kais amhamu'i hi bia hi benu sin, misnasab nai lasi musu ma lasi mile'uf es kanan.

¹⁰Leko hi amfe bukae neu atoni le sin namnah ma ambab atoni-atoni asutai hamu'it. Kalu hi mo'e onle nane, mesokan le anfun natef ki of anfani meusine onle manas le namtetu.

¹¹Of Au topu ki piut ma umsenab ki anbi pah ametos; of Au panat ki he nati' him aomin piut ma matani piut. Hi of on po'an le in oe nathoe, on oe mata honis le kan meti nit fa.

¹²Kot le a'lo le'ufen anfani atkuas of hi mifena mifani anbi in balan ahunut nane. Talan te of antek ki nak, ‘Uf le nafena nafani ale baki lape ma naleko nafani ume-ume le namle'u.’ ”

¹³UISNENO nakua In a'an nak, “Minaeb nai Neno Snasat on neno neu UISNENO. Kais hi mepu neu hi monim anbi neno nane. Miliatas nai neno nane on neno alekot; miliatas nai neno UISNENO ma kais hi amnao mioni; kais hi mepu hi mepu sin ma kais mimolok ale lasi luman.

¹⁴Of hi malin natuin hi miusi Kau. Of Au mo'e ki ma hi mipeni kan apinat anfun natef pah pinan. Of hi moni nok amlilat nok pah fef bela Nai Yakub in afan, hi ma uf nane. Au, UISNNEO Kau, Au ukua ulali Au a'ak.”