Read Uab Meto YESAYA 59 Bible Online

YESAYA 59 - Uab Meto bible

YESAYA 59

¹Kais hi mak UISNENO In ole nae le'uf neu he nafetin ki, ai In antono neu he nen hi sakoit.

²Mes natuin hi tusa sanat sin es nane te In ka nen ki fa leka him onen toti neu In. Hi sanat-sanat sin es ansole anbati ki na'ko Uisneno.

³Hi misanab natuin hi mi'mo'e ma hi mo'e amle'ut, natuin hi maiti lasi nok matani ma mimate atoni.

⁴Hi mitlak hi lasi ka nok fa amneot ma mifek lasi ka nok fa amneot, hi mi'mo'e ma mifnek neu lasi luman: hi mitenab he mile'un atoni bian ma hi mo'e tusa sanat.

⁵Hi tenab-tenab amle'ut sin onle kaun koko malaso in teko. Kalu nape'an teko nane, kauna anpoi. Hi tenab nane ka maota fa neu ki, on bale pake le antenu na'ko nab-naba in kuna!

⁷Hi mitenab lasi amle'ut piut-piut, ma hi amlomi he minaoba nok manoe. Hi ka mimtau fa fun him lolo ma mimate atoni le ka nasanab fa. Hi mioni amnao ambi me, anbi nane bale natsel ma amle'ut anbol anbine.

⁸Hi ka mihakeb fa lasi neka bua, ma ale hi taos hi mo'et kan mu'i fa lasi amneot. Hi lanan nane apenut, ma atoni le natuin lanan nane sin of ka napeni fa ua alekot.

⁹To nane nak neu Uisneno nak, “Hai mihin milalien nansa' Ho ka mufetin kai fa na'ko atoni-atoni le anhamu'i kai. Hai ampao meusine, mes alkun mesokan.

¹⁰Haim apasai on atoni matfolo; ma haim pastun anbi manas namtetu on anbi fai atnanas; hai on atoni amates anbi atoni amonit sin.

¹¹Hai mimtau ma amkae; hai mami lasi amneot, mes katit fa; hai mipane ma mifnek lasi fetin mes luman kun.

¹²Namneo-namneo hai tanhais namfau anbi Ho humam ma Ho matam; hai sanat-sanat sin nasanab nafani kai. Namneo-namneo hai amnaben mit hai tanhais sin, ma hai mihin hai sanat-sanat sin.

¹³Hai amtanhai hai han manta'en ma amlaban UISNENO, ma kam lomi fa he mituin hai Uisneno. Hai amhamu'i atoni bian ma hai misanab; hai tenab anseke, ma hai uab nahenu nok poi ma mo'el.

¹⁴Lasi fekat amneot hai ampolin, ma lasi amneot in na'lo kun. Hai bale buat lasi amneot ka maso'ik fa, ma lasi nek matakun ka tapeni fa.

¹⁵Katit fa atoni amneot, ma sekau na'lo na'ko amle'ut, of amle'ut nis ma anbe'u in.” UISNENO In nit nalalien, ma In kan malin fa natuin katit fa lasi amneot.

¹⁶In anhaumak fun katit fa Atomatas ma katit fa amnesit. Es nane te In anpake In kuasat he nafetin ma anfe neu sin lasi mnisat.

¹⁷In anpake lasi amneot ma lasi fetin on sobalu besi ma sobe besi. In nahelnon he naleko ma hen seunbanin lasi amneot.

¹⁸In seunbanin In musu-musu sin matom nok sin taos sin mo'et. Nesi na'ko nane ale uf-uf anbi pah-pah a'lot of ka nafetnon fa na'ko In kasat.

¹⁹In kuasat ma In apinat nane ale atoni namtausan na'ko neno saen talan te neno tesan. In of nem on noe sako natuin anin anaek es anfu nani.

²⁰UISNENO nakua In a'an neu In to nak, “Of Au amu eu Yerusalem he ufetin ki ok-oke le hi mipis mi'ko hi sanat-sanat sin.

²¹Au uhakeb fef bela ok ki: Au fe Au kuasat ma Au a'ak neu ki talan te nabal-bal. Minoina hi anah-anah sin he nati' sin amsa nanoina nani neu sin sanut mofut na'ko tabu le i talan te nabal-bal.”