Read Uab Meto YESAYA 6 Bible Online

YESAYA 6 - Uab Meto bible

YESAYA 6

¹Anbi ton Kesel Nai Uzia anmate, au kiso it UISNENO. In antunon anbi In toko amnanut ma apinat. In sobalu betkone nane an amu nan Ume UISNENO ok-oke.

²Ahake neno tunan apinat anhake anfun natef nan In, es-es manine ne. Sin ankub sin human neki nua, ma sin ankub sin aon neki nua ma naplele neki nua.

³Ma sin anmahaman es nok nak, “Knino, knino, knino, Knino le'uf UISNENO Akuasat Afinit. Pah pinan nahenu nok in mas apinat.”

⁴Sin hankenu anmo'e teli Ume UISNENO nane nabeko, ma Ume UISNENO nane nahenu nok ai masu.

⁵Oke te au nak, “Amle'ut neu kau! Kan mu'i fa panet ma afnekan neu kau anteni fun au lulu alahit kau natuin sanat, fun au umaika a'bi to lulu alahit ma asanat sin atnanan. Maski onane, au matak sin nit nalali Kesel, UISNENO Akuasat Afinit!”

⁶Nalali te ahake neno tunan mese naplel nem neu kau ma anbi in niman in neki ai flae le in naiti neki besi habi ai na'ko baki tulu in tunan.

⁷Ma in antao antom au fefak ma in nak, “Flae le i an ono nalali ho lulum. Tabu le i UISNENO naneku nalali ho tusa ma ansako nalali ho sanat.”

⁸Oke te au nen UISNENO nakua a'an nak, “Au of he sonu sekau ka? Sekau ka es of anfani hit amneki beno?” Au utae ak, “Au es kau i. Amsonu kau nai!”

⁹Oke te In anlelu kau ma au nao eki a'at i neu to: “Hi of amnen piut, mes hi ka mihin fa. Hi of mit piut-piut, mes hi ka mihin fa neu sa' le of anbol.”

¹⁰Oke te In nakua a'an neu kau nak, “Am ek mumate nai tenab na'ko atoni-atoni nane, mutono sin luken ma mufolob sin matken, he nati' kais sin nit, sin nen ai sin nahin, oke te sin nali'on anfani nem neu Kau ma sin naleko anfani.”

¹¹Au utoti nak, “Talantia leka ka ale lasi i nanaobon, koi UISNENO?” In natae nak, “Talantia nale'un nani ale kot-kot sin ma katit fa tuaf anbine, ume-ume ka natua anteni fa sin, ma pah nane anfani luman ma anhufui,

¹²ma tuafen anbi kot-kot nane of Au li'u upoitan sin neu bale a'lo, talantia pah nane ok-oke lum le'uf kun.

¹³Anesi na'ko nane, leka anbi atoni bo'mese fe anmu'i atoni mese fe natua anbi pah nane, of nale'un in amsa. Mes on nunuh leka nafae nani fe anmu'i in tolon le natol fun nasuni ma napae anbine, fun onane amsa mes anmu'i fe nesit na'ko uf nane le of anfani nonot knino ahunut.”