Read Uab Meto YESAYA 60 Bible Online

YESAYA 60 - Uab Meto bible

YESAYA 60

¹Amfen nai ma amfani meusine nai, hoi Yerusalem, natuin ho meusine honis nane in nemen; Uisneno antana ko neki In apinat.

²Mesokan ankub pah pinan, ma mesokan maten antobe pah pinan; mes UISNENO In pinan ansae nem anbi ki, In meusine le anhake nok ki natonon mat-mat anbi ki.

³Uf-uf sin nem ok-oke neu ho meusine, kesel sin nem neu ho meusine le ansae nem neu ko.

⁴Amkiso nai sa' le anbol anfun natef ko; to sin nauban hen fani nem neu ko. Ho anmone sin nem na'ko lo, sin naskau ho anfeto sin.

⁵Leka hom kiso lasi nane ho mumkak ma hom huma mo'e; ho nekam nasusbon mes ho malin. Ale uf-uf sin a maus sin neki nem neu ko, mu'if na'ko tasi bian nathoe neu ko.

⁶Ho pah nahenu nok bikase paha snaen, sin nem na'ko Midian ma Efa. Sin neki mnatu ma fomeni neu ko na'ko Syeba, fun sin naliatas UISNENO In taos In mo'et.

⁷Sin neki bibi ma bibi kase Kedar neu ko bibi kase keso na'ko Nebayot naloitan neu ko neu ho luli besa. Fua tulu nane anhalin UISNENO In nekan in neki amasat neu In Ume le nahenu nok apinat.

⁸Sa' esle' nane le naplel on nope fun on le kol otos pah panis le naplel hen fani neu in balan?

⁹Nane ale bnao le nem anhake anbi tasi ninen sin neki nafani to Uisneno na'ko pah a'lot. Sin neki noni muti ma noni mnatu he naliatas hi UISNENO; neu Uisneno Israel Knino Knao matani, le In antao ma anmo'e talan te antola In to.

¹⁰UISNENO nakua In a'an neu Yerusalem nak, “Atoni anao amnemat of nafena nafani ho baki lape, ma kesel sin of antuthae ko. Un-unu Au kas ko anbi Au to'as, mes muni i Au lomi ma a'nek ani ko.

¹¹Fai manas ho eno nasoitnon piut, he nati' mu'if na'ko uf-uf sin neki nem neu ko, nok sin kesel sin on atoni le anheke nan sin anbi makenat.

¹²Uf ma plenat le kan lomi fa he nausi neu ko, of sin namle'u ma namneku.

¹³Nasi Libanon in masan alekot of neki nem neu ko, hau nunu uf, aijaob ma hau kase, he namasab Au Ume ma he naleko, ma namasab bale le Au haek anteli anbine.

¹⁴Ahamu'it sin anah-anah sin nem naluli ma nabes neu ko, sin afi nasi'ut ko mes sin of naluli ma nabes, ma of antek ko nak, ‘UISNENO In kot’, ‘Sion, Uisneno Knino Israel In kot’.

¹⁵Ho of ka nasaitan ko fa ma ka nato'an ko fa, ma of ka nafetin ko fa he ho tena maten ko. Ho of amfani Au apinat nabal, bale amlilat talan te nabal.

¹⁶Uf-uf ma kesel sin of anpanat ma anpao ko, on ainaf mese le anpanat in anah. Es nane te ho muhin nai Au UISNENO Kau ho Afetin, ma namneo Uisneno Israel abe'it es ansoi Napoitan ko.

¹⁷Au eki noni mnatu he seka noni molo, ma noni muti he seka besi. Au fe noni molo he seka hau, ma he seka fatu. Ho pah of Au mo'e anfani pah halan ma tainine, ma ho ana' aplenat naplenat nok amneot.

¹⁸Of kat nane ateni fa anbi ho pah lasi bulalut, ma of kat nen ateni fa anbi ho kuan lasi le'uf. On baki lape Au of uhafo ko, ma hom pules Kau on ho Afetin.

¹⁹Manas of kan tana ko fa anbi ne-neno, ma fenan of kan tana ko fa anbi fa-fai. Natuin Au UISNENO Kau Au fani meusine abal-balat neu ko, Au tana nok apinat.

²⁰Manas of kan tes nit fa neu ko ma funan of ka na'pal nit fa neu ko. Natuin Au UISNENO Kau Au fani meusine abal-balat neu ko fun ho neno kulut nane namsopuen.

²¹Ho tuafen of anmo'e nok amneot, sin of anpal pah nane talantia nabal-bal. Sin anfani on hau tla'ef le Au sen ani, neu he naton Au.

²²Namneo teb to le an-ana ma nabau of anfani of anaet ma abe'it. Au UISNENO Kau of Au hake mat nok manoe, matom nok in tabu.”