Read Uab Meto YESAYA 61 Bible Online

YESAYA 61 - Uab Meto bible

YESAYA 61

¹UISNENO Anesit Afinit In kuasat anbi kau; In anbeti kau ma ansonu kau he eki beno alekot neu amamu'it sin ma uleko nek amenat le a'noe nain; ma uton lasi fetin neu abit kolen besi sin nak of nafetin sin nok manoe, ma neu sin abit o'of nak of nafetin sin.

²In ansonu kau he uton nak UISNENO In tabu antia he nafetin; he namela abit susal sin, ma hen seunbanin In musu-musu sin;

³hen fe amlilat ma amoket neu akaet me akulut sin; ma nabaina han kaet anfani han pules. Sin of on hau le UISNENO In neknon ansenan sin. Sin of antao ma anmo'e alekot ma amneot, talan te neki apinat neu UISNENO In kanan.

⁴Kot-kot le natsel nalalien of sin nafena sin ma bale-bale le tena maten of nahakeb sin.

⁵Hoi, Au to, atoni anao amnemat of antuthae ki; sin of natuku hi mu'it sin ma anmepu hi lene meto sin ma hi lene tua min kase sin.

⁶Hi of antek ki nak ate Uisneno ma nakanab ki nak Ana' fuat knino hit UISNENO. Hi of miah uf-uf sin a'mu'in ma of hi miliabom natuin sin a'maus.

⁷Natuin hi mipeni milali lasi mae kuni nua, ma hi mipeni le'uf ma si'ut, es nane te hi mipeni pah kuni nua anbi hi pah ma mipeni amlilat nabal-bal.

⁸UISNENO nakua In a'an nak, “Au nek umnau lasi amneot mes Au uto'an lasi hamu'it ma tanhais. Of Au baen ki eki lasi amneot, ma uhakeb lasi fef bela ok ki.

⁹Ho sufam mateka anbi me-me, ma antomat anbi ale uf-uf. Ma ale atoni le sin nit sin of antebes, nak Au fe tetus neu nonot i.”

¹⁰Yerusalem namolok nak, “Au umlil natuin UISNENO, au nekak namlil ma namoke natuin Uisneno. On amafet ma amamonet fe'u naimone ma fenai fe'u le anpake noason neki bale amasat, onane UISNENO antainus kau neki sobalu aomina ma sobalu fetin.

¹¹On fini le ankaki of anmoni ma anfani luat, onane UISNENO namonib lasi aomina ma ale uf of naliatas In.”