Read Uab Meto YESAYA 62 Bible Online

YESAYA 62 - Uab Meto bible

YESAYA 62

¹Natuin Yerusalem of Au uuab ma umolok, natuin Sion ka nabe'i fa Au utena, talan te anfe lasi aomina neu in ma in lasi mnisat nane anpin on paku apinat anbi fa-fai.

²Hoi Yerusalem, uf-uf sin nit ho lasi mnisat, kesel sin nit ho mas apinat. Of antek ko neki kanaf fe'u, UISNENO In naknon kun es anfe ko kanaf nane.

³Hom fani sobe amasat anbi UISNENO In niman, pilu kesel anbi Uisneno In niman.

⁴Ho kanam of kan tek anteni fa nak ‘Bife Mapolin’, ma ho pah of kan tek anteni fa nak, ‘Le Anmeseon’. Ho of antek ko nak, ‘Le Uisneno Annek Nani’, ma ho pah ka kanab nak, ‘Le An manone Nalali’, natuin UISNENO anlomi neu ko, In anfani mone neu ko pah.

⁵On li'mone munif anlomi li'feto munif ao teme, onane ho Apakaet of anlomi ko. On amafet namlil neu in fenai, onane amsa Uisneno of namlil neu ko.

⁶Anbi baki lape Yerusalem Au uhakeb apaot, manas ma fai sin of ka natena fa, mes of sin onen toti piut namnau Uisneno neu lasi manta'en le In anmo'e nalali.

⁷Sin ka nabe'i fa he natena na'ko onen totis leka In fe ka nafena nafani fa Yerusalem, ma anmo'e in anfani makana anbi pah pinan ok-oke.

⁸UISNENO anmanta'en nalali nok supat ma of nanaoba nani nok In kuasat: “Au of ka fe teni fa ho ane kase neu ho musu; ma atoni anao amnemat ka nabe'i fa he minu anteni ho tua mina mtasa le ho mupeni natuin ho muhaebom matani.

⁹Mes hi le amabul hi lene in afan, of him bukae ma miliatas UISNENO; ma hi le amseu hi tua min kase in fuan, of hi minu tua mina mtasa in oen anbi Au po'an Au Ume knino.”

¹⁰Tuafen Yerusalem, him poi nai ma amnao mok eno sin, miloitan lanan nai neu atoni-atoni le anfani nem. Amtao ma mo'e nai lan opat, mipoitan in fatu sin, mihakeb nai pen-pene neu uf-uf.

¹¹UISNENO anfe In han ba'an i neu pah pinan ok-oke nak, “Muton nai neu to abit Sion, mak ‘Amkiso nai, UISNENO ho afetin In nanoebon nem! Atoni-atoni le In nafetin sin natuin In.’ ”

¹²Of nakanab sin nak: ‘To knino’; ‘To le UISNENO nafetin sin’. Of antek Yerusalem nak ‘Kot le UISNENO anlomi nani’. ‘Kot le ka nabe'i fa he UISNENO nasaitan anteni’.