Read Uab Meto YESAYA 63 Bible Online

YESAYA 63 - Uab Meto bible

YESAYA 63

¹“Sekau ka es amnemat na'ko Bozra anbi Edom nane? In sobalu me', ma in bale pake nane mas apinat; in nao nok matain le'uf.” “Au UISNENO Kau Au nabe'i ufetin ma Au amu eki lasi mnisat.”

²“Nansa' ho bale pake nane me' amtasa, on sobalu atoni le anteli tua min kase in fuan?”

³“Au mes a'tam a'bi bale teli tua min kase fuan katit fa es anbi Au to le hen bab kau. Uf-uf Au teli sin anbi Au to'as in nanan, onle Au teli tua min kase in fuan. Sin na' nasfunon ma antoman Au sobalu, nale'un Au bale pake ok-oke.

⁴Au utetab ulali neno seunbanit, ma tabu fetin neu Au to.

⁵Au ami mes katit fa es hen bab Kau, Au sanmak neu katit fa es hen tuntaku Kau. Oke te Au be'ik Au matanik anmese es antuntaku Kau. Au to'as anbab Kau.

⁶Anbi Au to'as le anpin-pin, Au teli uklati ale uf-uf; Au ule'un sin, ma Au opan sin na' anbi afu.”

⁷Au he saksi uton UISNENO In manekan ma pules In natuin In taos In mo'et. Nok athoes In anfe tetus neu In to, natuin In nek namnau sin ma In manekan nane ka natfek nit fa.

⁸UISNENO nakua In a'an nak, “Namneo-namneo sin le nane Au to, anah-anah le ka nasusab Kau fa.” Es nane te In anfani afetin neu sin,

⁹In sutai sin susat. UISNENO kan sonu fa haef ai amneki hanaf; In neknon kun es nafetin sin natuin In manekan ma In nek mamun. In anpao ma anpanat sin piut na'ko afi ahun-hunut.

¹⁰Mes sin anlaban ma namenab UISNENO In nekan. Es nane te In ankoti sin ma anfani musu neu sin fun In neknon kun anmaken ma anlaban sin.

¹¹Oke te sin namnau afi batan ahunut, batan Nai Musa, ate UISNENO. Sin nak, “UISNENO In esme ka le antopu ale atukus le natuku In to nao nok tasi? UISNENO In esme ka le anfe In kuasat neu sin?

¹²UISNENO In esme ka le anhaek nok Nai Musa nok In niman abe'it, ma anpolo anbati oe anbi sin human he nati' In kanan mateka nabal-bal?

¹³UISNENO In esme ka le antuntaku sin ma sin nao nok oe in nanan? On bikase nao nok mnela snaen, sin kan pastun nit fa.”

¹⁴UISNENO neki sin neu bale snasat, onle anpo' mu'it he neku hun anbi mnela. Onle nane In ana' ma antopu In to, he nati' sin naliatas In kanan apinat.

¹⁵Koi UISNENO, amkiso nai na'ko neno tunan, na'ko Ho bale knino ma apinat. Ho lasi maneka ma Ho kuasat nane esme ka? Ho nek amnaut ma Ho nek mamun nane esme ka? Kais Hom eka ma amtu' lasi nane neu kai.

¹⁶Ait hai ka Ama es ko fa ka? Nai Abraham ma Nai Yakub ka nahin kai fa. Mes Ho koi UISNENO, hai Ama es Ko, hai afetin na'ko ahun-hunut.

¹⁷Koi UISNENO, nansa' Ho mufetin he hai amseke? Nansa' Ho mumanub hai nekam talan te hai ka mimtausan Ko fa? Muli'om amfani amu nai natuin Ho ate es kai natuin Ho to, Ho bale bela es kai.

¹⁸Nansa' Ho mufetin musu sin hen teli naklati Ho Ume, ma atoni-atoni nale'un Ho tubu knino?

¹⁹Hom tao ma mo'e kai onle Ho fe ka muplenat mit kai fa; onle Ho to knino ka es kai fa.