Read Uab Meto YESAYA 65 Bible Online

YESAYA 65 - Uab Meto bible

YESAYA 65

¹UISNENO nakua In a'an nak, “Au uloitan he utae Au to, mes sin kan onen toti neu Kau fa. Au lomi he nati' sin na'eku nok Kau, mes sin ka nami Kau fa. Nonot nane sin kan boin fa Au kanak, maski Au uloitan he utae sin! Au es Kau i!

²Au uloitan piut he simo Au to, mes sin lomi hen laban Kau. Nonot nane antao ma anmo'e amle'ut ma sin natuin kun sin tenab anmese kun.

³Sin antao ma anmo'e Kau talan te Au uto' piut-piut natuin sin neki fua tulu anbi ale sin lene sin neu uisneno teta ma notu atu fomeni anbi ale sin baki tulu sin.

⁴Anbi fa-fai sin anao neu ale nuat ma naukel hen toti ua leko na'ko sman nitu. Sin nah sisi fafi ma ninu oef amainisit nane.

⁵Sin namolok nak, ‘Amnao mi'lo kai nai, kais amle'o kai natuin hai knino kai ma mi'lo mi'ko ki!’ Au nekak ka na'oni fa leka Au kiso sin taos sin mo'et! Au to'as neu sin on ai le ka masifo fa.

⁶Lasi kasat neu sin matui nalalien anbi Au humak ma Au matak. Namneo of Au ka utena ubala fa. Au of seunbanin sin taos sin mo'et amle'ut,

⁷natuin sin sanat ma sin amaf sin sanat. Sin nasi'ut Kau ma sin notu atu fomeni neu uisneno teta anbi neten sin bale fuat. Au of seunbanin sin matom nok sin taos sin mo'et anbi batan afinit.”

⁸UISNENO nakua In nak, “Tua min kase in fuan fe anmu'i in oen ka mapolin fa, mes anmo'e anfani tua mina mtasa. Onane amsa Au to of Au ka ule'un fa sin ok-oke, natuin anbi sin fe anmu'i le naluli ma nabes neu Kau.

⁹Natuin atoni Israel fauk-fauk na'ko Yehuda sufan of Au fe neu sin tetus, ma sin sufan of natua Au pah ma Au nuaf sin. Atoni-atoni le Au beti sin mes sin naluli ma nabes neu Kau of sin natua anbi nane.

¹⁰Au to of sin naluli ma nabes neu Kau; sin bikase ma sin bijae of neku hun anbi Mnela Saron ma Nonof Akhor.

¹¹Mes ka on fa nane monit na'ko atoni-atoni le nasaitan Kau ma sin nikan Sion, Au nuaf knino, le natulu fuat neu Gat ma Meni, uisneno teta mnisat ma uaf.

¹²Hi al-al ki mes amate ok-oke on tulu masikat. Natuin, leka Au, boin ki, hi ka mitae Kau fa, ma leka Au umolok, hi kam nen Kau fa. Him lomi hem laban Kau ma amtao ma mo'e amle'ut.

¹³Mes namneo-namneo, atoni le naluli ma nabes neu Kau sin of anbukae, mes hi of mimnah. Sin mes ninun, mes hi of amneo piut. Sin mes namlil, mes hi of mipeni lasi mae piut.

¹⁴Namneo-namneo sin of anhunun nok nek amlilat, mes of him kae nok nek nu'ut.

¹⁵Mes Au to mabeti of anpake hi kanam on sukat: ‘So nati' UISNENO Alatan Amnanut namate ki onle sin!’ Mes atoni le na'ki neu Kau of Au fe neu sin kanaf fe'u.

¹⁶Mes sekau anbi pah nane le antoti athoen neno, Uisneno aki'at of anfe neu sin tetus. Ma sekau le anlomi hen sup, of ansup natuin Uisneno aki'at In kanan. Natuin susal nukat ahunut namneku ma manikan nalalien.”

¹⁷UISNENO nakua In a'an nak, “Au fatan ma mo'e neno tunan fe'u ma pah pinan fe'u. Ale lasi unu of manikan ma ka mamnau anteni fa.

¹⁸Mimlil ma mimoke nai talan te nabal-bal natuin sa' le Au mo'e. Au mo'e Yerusalem fe'u nahenu nok amlilat, ma in tuafen namlil ma namoke.

¹⁹Au amsa of umlil natuin Yerusalem, ma umoke natuin in tuafenu. Anbi kot nane kan mu'i anteni fa kaet, ma katit fa han sakoit hen toti tuntakus.

²⁰Sin anah-anah sin katit fa amates anbi tabu fe sin nabaun, ma sin mnasi sin of napeni ua mnanu. Ma atoni le anmoni nan ton natun mese of onle fe munif, ma le anmate nahunu na'ko nane onle napeni sukat na'ko Kau.

²¹Sin of nahakeb ume ma sin natua anbine; ma atoni bian of ka natua fa anbi nane. Sin of ansen lene tua min kase ma sin ninu tua min kase in oen; mes atoni bian of ka ninu fa. Au to of napeni ua mnanu on hau uf, ma sin anbukae sin mepu in afan.

²³Ale sa' le sin anmepu of maupa, ma sin anah-anah sin of kan maten fa nok askeken. Sin ma sin anah sin of Au fe neu sin tetus talan te nabal-bal.

²⁴Nahunu na'ko sin antoti, Au utae sin; nahunu na'ko sin fe ka nasopu fa sin onen totis, Au unokab ulali sin onen totis.

²⁵Asu fui ma bibi kase sin ana of sin nekun hun bua'-bua'; meo asu of neku ane kase ta'u on bijae, ma kaun koko ka neki fa amle'ut anteni. Anbi Au nuaf knino ok-oke, katit fa esle' he nale'un es ai anmo'e amle'ut.”