Read Uab Meto YESAYA 66 Bible Online

YESAYA 66 - Uab Meto bible

YESAYA 66

¹UISNENO nakua In a'an nak, “Neno tunan nane Au toko', ma pah pinan nane Au haek sin peni haef. Es nane te ume masan onme ka esle' ho he mufena neu Kau, ma bale masan onme ka le ho he mubalab he Au utua ka?

²Pah pinan ok-oke nane Au nukuk es anmo'e nani, ma es nane te ale sa'-sa' anbol. Mes Au lomik nane esle' atoni le nekan namneb, ma an au ale in sanat-sanat sin, fun namtau ma na'ki neu Kau.

³Mes to nane sin anmo'e natuin kun sin lomin; sin anlomi naluli ma nabes mes nok taos mainisit. Sin kan beti nahin fa lasi; sin anlolo bijae keso mes sin anlolo atoni ma natulu nok; sin natulu ane kase mes sin anlolo fafi ma natulu fafi in na' nok, sin notu atu fomeni ma nabes neu le'u mahuma.

⁴Es nane te Au amsa tao ma mo'e natuin Au lomik ma Au eki neu sin ale lasi mafena le sin namtausan. Natuin leka Au boin sin, katit fa es he natae; leka Au umolok, katit fa es he amnen. Sin lomi nesi hen laban Kau ma antao ma anmo'e amle'ut.”

⁵Amnen nai UISNENO In a'an, hoi hi le mimtausan ma mituin In, “Natuin hi nekam na'ki nahel neu Kau, anmu'i anbi hi nonot le an unu to'an neu ki ma sin kan lomi fa he namnono nok ki. Sin na'uab na'akan ki nak, “Maut nai UISNENO nalile ma naton In apinat, he nati' hai mit amlilat.’ Mes sin of namaebon.

⁶Amnen nai! Hanaf slutuf anaek anbi kot; nahan na'ko Ume knino; nane Au hanak le neki seunbanit neu musu sin!

⁷Au kot aknino on bife mese le he nahoni in nahoni nahun na'ko in naben menas; in nahoni anmone nahun na'ko in fe ka naben fa men mahonit.

⁸Sekau in nen nit lasi onle nane? Sekau in nit lasi anbol onane? Mes to Israel nahonis nalali sin anbi tabu Sion fe a naben men mahonit.

⁹Kais hi mak Au eki to antia tabu mahonit ma ka ufetin fa sin he nahonis sin.” Onle nane UISNENO nakua In a'an.

¹⁰Mimlil ma mimoke nai mok Yerusalem hoi hi ala ki le amnek mimnau in. Hi le amkul ma amkae natuin in so hi mimlil nok nek amlilat nai.

¹¹Hi of amnaben in alekon nane, on li'ana mese le ansusu anbi in ainaf susu.

¹²Natuin UISNENO nakua In a'an nak, “Of Au le neu ki halan pah on noe ansai; uf-uf sin a mu'in of neki nem neu ki on oe le ansai ma natsaku. Ho on li'ana le in ainaf nasusu ma naskau, ma ansai in piut anbi in aifan.

¹³Au of umela ki anbi Yerusalem, on ainaf mese le namela in anah.

¹⁴Leka hi mit lasi nane, of hi mimlil, ma mipeni matani ma aomina on hu mate. Onane te Au ate-ate sin of napeni Au kuasat ma Au musu-musu sin of sin naben Au to'as.”

¹⁵Namneo UISNENO of nem neki ai, In of ansae neu In aklet on anin nautus, hen polin In to'as, ma nasekekeb ki nok matani.

¹⁶Fun ale atoni le napeni sin nasanab on anlefi lasi neu sin neki ai ma suni, ma namfau le UISNENO namate sin.

¹⁷UISNENO nakua In a'an nak, “Ale atoni le naknino sin aokenu ma nao nabua neu bale-bale uisneno teta ma nabes neu sin, of sin namneku bua'-bua' nok atoni le sin nah sisi fafi ma ifo ma mnahat mainisit bian.

¹⁸Au uhin sin tenab ma sin mo'et sin. Au amu he ubuab atoni na'ko ale uf-uf. Anbi tabu sin nem nabua, sin of nit Au kuasat.

¹⁹Au of uhakeb taka' mese anbi sin atnankenu. Fauk-fauk na'ko sin Au of ufetin sin. Of Au sonu sin neu uf-uf anbi pah-pah a'lot le sin ka nen nit fa beno neu Kau ma fe ka nit fa Au apinat ma Au kuasat: sin anao neu Tarsis, Libia, ma Lidia neki sin ana' aklaot mahine, neu Tubal ma Yunani. Sin of naton Au apinat anbi uf-uf.

²⁰Na'ko pah-pah nane sin of neki nafani hi bia ma hi benu sin le hi uf mese on atnatas mese neu Kau. Sin of neki atoni-atoni nane neu Au tubu knino anbi Yerusalem sin ansae bikase, bikase luke mnanu ma bikase paha snaen, ma bian ansae aklet, onle atoni Israel neki fua tulu ane kase anbi bale alekot ma knino anbi Ume UISNENO.

²¹Ma Au of aiti fauk-fauk anbi sin hen fani Ana' fuat knino ma atoni Lewi.

²²On neno tunan fe'u ma pah pinan fe'u of anhake nabalah natuin Au kuasat, onane amsa hi sufam ma hi kanam of anhake nabalah.

²³Anbi funan fe'u ma anbi Neno Snasat to pah pinan ok-oke of sin nem he naluli ma nabes neu Kau anbi Yerusalem.

²⁴Leka sin anpoi ma sin anao, sin of antae nit atoni aon nitu le sin anlaban nalali Kau. Sibe le neku aon ta'un nitu maten nane of kan mate fa ma ai le notu sin of kan sifo namate fa; nane anfani mainisit neu atoni ok-oke.”