Read Uab Meto YESAYA 7 Bible Online

YESAYA 7 - Uab Meto bible

YESAYA 7

¹Kesel Nai Ahas nane Nai Yotam anmone ma Nai Uzia upuf. Leka in naplenat Yehuda, makenat anbol. Nai Rezin Kesel Siria, ma Nai Pekah Nai Remalya anmone Kesel Israel, in nem ma nape' Yerusalem. Mes sin ka nis nan fa kot nane.

²Leka Kesel Yehuda in nen nak solalus Siria sin antam nem antia pah Israel on neka buat, in ma in to sin namtau anmate, talantia sin anlilitai on hau le anin nabeko sin.

³UISNENO nakua a'an neu Nai Yesaya nak, “Meki ho anah Nai Syear Yasyub ma amnao nai mutef mok Kesel Nai Ahas. Ho of mutef in anbi lolok tu'an nifu in fafon, bale ameput-ameput sin anhoi beti ma akloe.

⁴Mutonan kesel mak in mes he naloitan ma nabalbon mes nati' in tainine nabalah. In ka nabe'i fa he namtau ai in nekan namneku. Lasi to'as na'ko Kesel Nai Pekah ma Kesel Nai Rezin nok in solalus sin atoni-atoni Siria nane ka nesi fa na'ko amle'ut ai nuta tuka nua le namasu.

⁵Siria anmalokin nalali lasi nok Israel ma in kesel.

⁶Sin lomi he nape' Yehuda ma anhakatau in to sin he nati' anpesi sin, oke te naiti Nai Tabeel anmone hen fani kesel.

⁷Mes Au, UISNENO Kau, Au uton ak lasi nane of kan bol nit fa,

⁸natuin Siria ka nabe'i nesi fa Damsyik in kot ainaf, ma Damsyik in ka nabe'i nesi fa na'ko Kesel Nai Rezin. Mes anbi ton bo'ne am nim namuni, Israel of anpe' anbation talantia of kan hake nabe'i fa on uf mese.

⁹Israel ka nabe'i nesi fa na'ko Samaria, in kot ainaf, ma Samaria in ka nabe'i nesi fa na'ko Kesel Nai Pekah. Kalu hi ka miteb namneo-namnei neu Kau, namneo hi kam hake mibe'i fa.”

¹⁰UISNENO natiaba anteni a'at bian neu Nai Ahas nak:

¹¹“Amtoti nai he nati' ho UISNENO anfe neu to taka' mese, ai na'ko nopu nitu atoni amates, ai he na'ko fafon bale alatas.”

¹²Nai Ahas natae nak, “Au ka lomi fa he toti taka'. Au ka lomi fa he su' UISNENO.”

¹³Oke te Mafefa Knino Nai Yesaya nak, “Kalu onane, amnen nai hoi Kesel Nai Daud sufan! Ka nanokbon fa ka him su' lasi neka none atoni pah pinan, talantia him su' lasi neka none na'ko au Uisneno amsa?

¹⁴Tabu le i, UISNENO In neknon kun of anfe neu ko lasi taka' mese: Li'feto mese of naapu ma nahonis li'mone mese le nakanab in nak Imanuel.

¹⁵Leka in nanae ma nabe'i he naiti lasi fekat anmes, pah nane of nahenu nok alekot.

¹⁶Natuin nahunu na'ko neno nane he nem antia, pah nua en le sin kesel sin naplenat ma le ho mumtausan sin le nane of sin nasaitan pah nane ma pah nane of luman.

¹⁷UISNENO In of anfe kesel Asyur nem, oke te ho ma ho ume nanan sin ma ho to sin of hi mieku mok neno-neno le nahenu nok nek masunu anesi na'ko sa' le afi hi mieku mokan na'ko neno Israel ma Yehuda anpe' anbation.

¹⁸Anbi neno nane UISNENO of In no'en atoni Mesir ma atoni Asyur, oke te kesel pah nua en nane sin nem on akbeo pukan mese ma on oni le anpuknon nem anbi kef le'u ma anbi fatu bola' sin. Sin of antobe nan ale kisan ma katila ma ale bale hun ma naba.

²⁰UISNENO of anseb kesel Asyur he nati' anmo'e Israel onle atoni a'eut le an eu nani nakfunu ma ale funu anbi aon.

²¹Anbi neno nane, kalu atoni mese anpanat ma anhao bijae tipu mese ma al bibi nua,

²²susu na'ko mu'it nane of fa anesi neu atoni-atoni le fe namaika sin anbi pah nane. Namneo, of sin ninu susu ma oni hau.

²³Anbi neno nane lene-lene tua min kase le es-es te ansen hau tua min kase nifun mese ma le in upan noni muti nifun mese of kisan ma katila anmoni anbine.

²⁴Atoni le anao neu bale nane of he neki klaot ma as'anef, natuin pah nane ok-oke nahenu nok kisan ma katila.

²⁵Ma pah neten le anmepu ma ansen, nane amsa nahenu nok kisan ma katila, talantia atoni ka nabe'i fa he nao neu bale nane. Pah nane al maota anfani bale neu bijae ma bibi kase he neku hun ma naba anbine.”