Read Uab Meto YESAYA 8 Bible Online

YESAYA 8 - Uab Meto bible

YESAYA 8

¹UISNENO nakua a'an neu kau nak, “Maiti nai fatu tui naek mese, oke te amtui nai meki tuis-tuis nok aknino. ‘Masikat le Manoe le'uf, Lasi bakan le lab le'uf.’

²Mo'en atoni nua le hom palsai sin anfani saksi, es Ana' fuat knino Nai Uria ma Nai Zakharia, Nai Yeberekya anmone.”

³Tabu fauk namuni te au fenai naapu. Leka nahonis hai anah, UISNENO nakua a'an neu kau nak, “Mukanab in mak ‘Masikat le Manoe le'uf, Lasi bakan le Lab le'uf.’

⁴Natuin nahunu na'ko li'ana nane fe ka nanae fa neu he nauab nak ‘Ama’ ma ‘Aina’, ale maus Damsyik ok-oke ma ale bale masikat Samaria of naiti neki sin neu kesel Asyur.”

⁵UISNENO nakua a'an anteni neu kau,

⁶In nak, “Uf le i antite oe alekot na'ko ana Noe Syiloah, ma namlil nok Kesel Nai Rezin ma Kesel Nai Pekah.

⁷Es nane te Au, UISNENO Kau, of Au fe kesel Asyur ma in solalus sin ok-oke he nati' sin nape' Yehuda. Sin of anao mat onle Noe Efrat le ansai nok matani ma ansako ale kefan.

⁸Sin of nem neu Yehuda on noe sako le ansae antia sin neon ma ankub ale sin sa'-sa' ok-oke.” Uisneno no'kan kit! In ninen le nakobon naneo hit pah.

⁹Mibua ok-oke nai nok lilitais, hoi ale uf ok-oke! Amnen nai, hoi pah pinan in heun ok-oke! Miloitan nai he maken, mes nok nekaf lilitais! Miloitan mibalab nai, mes nok lilitais!

¹⁰Mitenab ma mihakeb nai mepu le hi he mepu, mes ale nane of in luman kun. Maiti nai lasi fekat, mes of kan mu'i in otan, natuin Uisneno In nok kai.

¹¹UISNENO anheke kau ma anfe neu kau lasi mnauba he nati' kais au nao utuin lanan le uf nane sin anao nokan. In nakua a'an nak,

¹²“Kais him tek mak malokin lasi le uf sin antek nak malokin lasi, ma lasi sa' le sin namtausan kaisa hi mimtausan.

¹³Mimnau nai natuin Au, UISNENO Akuasat Afinit Kau Au knino Kau. Al Au mese es ho he mumtausan Kau.

¹⁴Natuin Au knino knao matani Kau, Au fani fatu astunas neu to Yehuda ma to Israel, ma mekut ma kleot neu Yerusalem tuakenu.

¹⁵Atoni namfau le of nastun ma anbel ma napapa'. Ma of sin antam anbi kleot ma mekut in nanan.”

¹⁶Hi, au asimo lasi ki mes hi mipan ma ampanat a'an le Uisneno anfe neu kau.

¹⁷UISNENO natolo' nalali In aon na'ko Nai Yakub in sufan, In nonot, mes au uteb ma ufnek neu In.

¹⁸Au es kau i ma au anah-anah sin le UISNENO anfe kau sin. UISNENO Akuasat Afinit le In es naplenat anbi Tubu Sion, ansonu kai hem fani taka' neu to Israel.

¹⁹Mes atoni-atoni le anlelu ki he mitoti fainekat na'ko ale mnane sin le sin anmalobe ma namutu. Atoni-atoni nane of sin nak, “Ait ka nabe'i fa he hit tatoti ale sman nitu na'ko ale atoni amates sin neu monit atoni honis?”

²⁰Mitae sin mak on i, “Amnen nai noina UISNENO! Atoni le namolok ma kan tom fa nok noina nane, kan mu'i fa panet ma afnekan.”

²¹Atoni-atoni anukat ma le namnah of sin naoinson anbi pah nane. Natuin sin namnah, sin nato' talantia sin ansukat sin kesel ma sin Uisneno. Sin hen kiso anao neu me amsa, ai hen baisenu neu fafon,

²²ai naluli neu pah pinan sin of ka nit fa sa'-sa' al susal mafena ma mesokan fun hakataus le anheke natam sin anbine. Of anpolin natam sin neu bale mesokan le neki hakataus nane.

²³Mes kan tia fa nabal-bal pah nane naeku ma natef nok susal ma mafena nane. Pah Zebulon ma Naftali sin tuaken le afi natua anbine UISNENO afi nanebet sin. Mes anbi batan amnemat, In of anfe apinat neu pah nane ok-oke na'ko Tasi Tnana anao neu neno saen talantia Noe Yordan in aon bian, ma talantia Galilea le atoni anao amnemat natua anbine.