Read Uab Meto YESAYA 9 Bible Online

YESAYA 9 - Uab Meto bible

YESAYA 9

¹Uf le anmoni anbi mesokan sin nit pina naek mese. Ma le namaika anbi pah amates In anfe pina nalim neu sin.

²UISNENO, Hom fe neu sin lasi amlilat anaek, Hom tao ma mo'e sin anhunun ma ankoa. Sin namlil natuin Ho lasi alekot, onle atoni le namlil anbi sekit ma abul, ai onle sin anbati sa' le sin nis anbi makenat in nanan.

³Ho maiti mulali sin baut mafena ma nepat anbi sin hanun ho maiti mulali. Ho mis ma ambe'u uf ahamu'it nane le sin na'nisi Ho nonot. Onle afi batan afinit leka Ho mis ma ambe'u solalus Midian.

⁴Solalus sin peni haef le naspap ma solalus sin sobalu le nahenu nok na', of anputu nani anbi ai.

⁵Fun nahonis nalali li'ana mese neu kit; ma anfe neu kit li'anmone mese. In of anfani ana' aplenat neu kit. Antek In kanan nak, “Afainekat Nekmahine”, “Uisneno Meo Pa'e”, “Amaf Abal-balat”, “Kesel Halan pah”.

⁶In naplenat on Kesel Nai Daud sufan, In kuasat le nane nae le'uf. In pah nahenu nok halan aomina; In aplenat nahakeb anbi lef lasi amneot ma amnonot na'ko neno le i talantia nabal-bal. UISNENO Akuasat Afinit namneo In of nanaoba nani.

⁷UISNENO In nanaoba nalali kasat neu plenat Israel.

⁸To Israel ok-oke ma tuafen Samaria of sin nahin nak UISNENO es anmo'e nani. Sin namoko'on ma a'neka naebon. Sin nak,

⁹“Ume-ume na'ko fatu bena natsel nalali, mes of hai mo'e ume-ume fe'u na'ko fatu putun. Ale hau bub fua mina nafae nalali sin, mes of haim seka sin meki aijob Libanon le mes le'uf kun.”

¹⁰UISNENO nahakeb nalali sin musu he nati' anlaban sin.

¹¹Uf Siria na'ko neno saen ma uf Filistin na'ko neno tesan nasikan Israel. Mes UISNENO fe nato' ma fe ankas sin piut.

¹²Mes Israel fe ka napis fa, maski UISNENO Akuasat Afinit ankas nalali sin; sin fa ka nate'un fa neu In.

¹³Es nane te al anbi neno mese UISNENO ankas ale atopu to Israel ma sin to. In an ote nafek sin anakan ma sin ikon.

¹⁴Sin anakan nane esle' amnisat-amnasit ma atoni a'moko sin, ma sin ikon nane esle' ale Mafefa knino anoni lasi mo'el le nasekeb to.

¹⁵Ale atopu to nane sin nale'un to ma nasekeb to.

¹⁶To le nane sin anpolin sin nek ateb ma sin monin namle'u ma ale sin uab nane amle'ut. Es nane te na'ko ale sin munif sin katit fa es amsa le UISNENO he nafetin sin. In ka nek namnau fa ale bife banu ma li'anmanat. Mes UISNENO fe nato' ma mes ankas piut.

¹⁷Lasi amle'ut to nane notu on ai le notu nani kisan ma katila. In pinan nane on nasi le anputu ma anpulan in masu.

¹⁸UISNENO Akuasat Afinit In nato' anae le'uf, ma In kasat nane on ai le anpin anae le'uf ma to nane anfani on bale mnotu le notu nani ok-oke. Katit fa es amsa le he nek namnau in biaf in benuf.

¹⁹Anbi pah nane ok-oke atoni nasik ma nah sa' le napeni he nah, mes sin ka namsen fa. Nesi na'ko nane sin neku sin biaf ma sin benuf es nok es.

²⁰Atoni Manasye ma atoni Efraim sin anmaken es nok es, oke te sin nabua ma anlaban Yehuda. Mes UISNENO fe nato' ma ankas sin piut.