Read Uab Meto IMAMAT 1 Bible Online

IMAMAT 1 - Uab Meto bible

IMAMAT 1

¹Na'ko In Um-ume, UISNENO no'en Nai Musa ma anfe neune lekat lulut

²le mes atoni Israel he natuin nani. Leka atoni mese natulu mu'it neu fua tulu mnotu neu UISNENO, in nabe'i natulu bijae, bibi kase ai bibi.

³Kalu le natulu nane bijae mese, mu'it nane mes he keso ma kan mu'i fa in amle'un. Bijae nane mes neki nani neu eno Um-ume UISNENO, he nati' UISNENO anlomi nan atoni nane.

⁴Oke te in mes antao in niman neu mu'it nane in anakan, ma in tulu tnatas nane of UISNENO ansimo nani neu hen sako in sanat.

⁵Oke te bijae nane mes anlolo nani anbi Um-ume nane in enon. Ale Ana' fuat knino sanut mofut Nai Harun mes natulu bijae nane in na' neu UISNENO, oke te anpofi baki tulu in kabenan ha sin anbi Um-ume in eno matan.

⁶Oke te atoni nane mes anpu' bijae nane in pasu ma anheli mu'it nane.

⁷Ale Ana' fuat knino mes napina ai anbi baki tulu in tunan oke te antao hau mnotu anbi in fafon.

⁸Ale sisi heli anfani tulu, nok bijae in anakan ma in balun amsa, sin mes antao nani anbi ai in fafon.

⁹Oke te atoni nane mes anboe bijae nane in taifen ma bijae nane in pusun, ma Ana' fuat knino le nanaoba mepu mes notu nani ok-oke. Fua tulu mnotu nane in fon anhalin UISNENO In nekan.

¹⁰Kalu le natulu nane bibi kase ai bibi, mu'it nane mes he keso ma kan mu'i fa in amle'un.

¹¹Atoni nane mes anlolo mu'it nane anbi baki tulu in aon bian a'li, oke te ale Ana' fuat knino mes anpofin in na' neu baki tulu in kabenan ha sin.

¹²Leka anheli nalali mu'it nane, ale sisi le anheli nane, nokin anakan ma in balun amsa, Ana' fuat knino mes antao nani anbi ai in fafon anbi baki tulu.

¹³Oke te atoni nane mes anboe mu'it nane in taifen ma mu'it nane in pusun. Oke te Ana' fuat knino mes natulu nani ok-oke neu UISNENO, ma notu nani anbi baki tulu in tunan. Fua tulu mnotu nane in fon anhalin UISNENO In nekan.

¹⁴Kalu le natulu nane kolo mese, mes kol otos ai kol kase tipu mese.

¹⁵Ana' fuat knino mes neki kolo nane neu baki tulu, oke te an neok kolo nane in to'an ai in neon ma notu in anakan anbi baki tulu nane in tunan. Kolo nane in na' mes anlisin anpoi neu baki tulu nane in aon bian.

¹⁶Asa'kaen nok in nesan ok-oke mes napoitan sin, oke te anpolin sin anbi baki tulu in aon neno saen afu balan.

¹⁷Oke te mes anpisu kolo nane anbi ninen un, mes in ninen ka nabe'i fa he natfek. Oke te kolo nane mes antunu nani anbi baki tulu in tunan. Fua tulu mnotu nane in fon anhalin UISNENO In nekan.