Read Uab Meto IMAMAT 11 Bible Online

IMAMAT 11 - Uab Meto bible

IMAMAT 11

¹UISNENO anfe neu Nai Musa ma Nai Harun lekat lulut i

²neu nonot Israel. Ale mu'it le anmoni anbi meto le natamu ai nakniti ma in a ku'en an sebion nane leko ma nabe'i he hi miah.

⁴Kais hi miah sisi bikase paha snaen, ifo pah panis ai ukum pah panis. Mu'it nane amle'ut natuin maski natamu ma nakniti, mes a ku'en ka sebion fa.

⁷Kais hi miah sisi fafi. Mu'it nane amle'ut, natuin maski in a ku'en ansebion, mes in ka nakniti fa.

⁸In sisi ka nabe'i fa he hi miahan ma in aon amates ka nabe'i fa he him le'o natuin mu'it nane amle'ut kun.

⁹Hi nabe'i he miah ale ika le in aknufan manihis ma le in aknufan mafaun.

¹⁰Mu'it le anmoni anbi oe nanan mes kan mu'i fa aknufan he manihis ai mafaun nane amle'ut, es nane te ka nabe'i fa he hi miahan, ma in aon amates ka nabe'i fa he him le'o.

¹³Anbi ale kolo-kolo, le antek sin le i ka nabe'i fa he hi miah sin natuin amle'ut kun ai ka leko fa: kolo teme naek, kutlu', ale kolo teme, isu, kolo ka', kolo pah asnaen, kolo teme tasi, kolo to'amnanu funu muti ai molo ma kolo to'amnanu bian, bibi fui ma a ba'u.

²⁰Ale kauna kiba ma sabuit ma bian anteni onle nane ma manine nane le'uf kun ma ka naleko fa,

²¹somak le antoklet.

²²Es nane te fokat, kil-kilo ma fokat mas mate nabe'i he hi miahan.

²³Mes ale kauna bian le manine ma le anlaba' nane amle'ut ma ka naleko fa.

²⁴Atoni mese antam amle'ut ma ka naleko fa talante neno antes kalu in an onon neu mu'it amates le i: mu'it le anmu'i ku'en, somak mu'it le ku'en nasei'on ma nakniti, ma mu'it mahae ha ma anmu'i knusaf. Sekau in neki mu'it amates onle nane in mes anfase in blua pake, mes in fe amle'ut ma ka naleko fa talante neno antes.

²⁹Ifo ai nafo nain, ifo naek, ifo ana', leso ana', ma ale be'o ai leso ma mu'it le in pasun makatila, baijafa, leso ana', bu'u ana', biklu'u le anseka masan namnes nok hau le antapson anbine nane amle'ut ma ka naleko fa.

³¹Sekau anle'o mu'it nane in anfani amle'ut talante neno antes.

³²Kalu mu'it nane in aon amates anmofu neu blua mese in fafon, blua nane in anfani amle'ut ma ka naleko fa. Lasi nane neu ale blua na'ko hau, pilu, pasu, ai kolo, ma blua nane ka nabe'i fa he him pake. Blua nane mes naaeka nani anbi oe nanan, mes lo ka naleko fa nabala talante neno antes.

³³Leka mu'it amates nane anmofu anbi tasu nain, ale sa' anbi tasu nain nane amle'ut ma ka naleko fa, ma tasu nain nane mes nape' nani.

³⁴Mnahat ai bukae le antoman oe na'ko tasu nain nane anfani amle'ut, ma mninut le anbi tasu nain nane amsa anfani amle'ut ma ka naleko fa.

³⁵Mu'it amates nane in antoman sa' es nane in amle'ut ma ka naleko fa. Bale mnotus na'ko nain le antoman mu'it amates nane mes nape' nani natuin amle'ut ma ka naleko fa.

³⁶Somak oe mata, ai oe nopu, ale bian anfani amle'ut ma ka naleko fa kalu antoman mu'it amates.

³⁷Kalu mu'it amates nane anmofu anbi fini le hen kakin, fini nane naleko nabala.

³⁸Mes kalu fini nane fe naaeka anbi oe nanan, oke te mu'it amates nane anmofu ma antoman, fini nane amle'ut ma ka naleko fa.

³⁹Sekau an onon neu mu'it amates le naleko anfani amle'ut talante neno antes.

⁴⁰Atoni le in neki ai le in nah mu'it amates nane mes hen fase in blua pake, mes in namle'u nabala talante neno antes.

⁴¹Ale mu'it ai kauna le anao nabua anbi nain, leko le anlaba' le mahae ai le mahae amfaun, nane amle'ut ma ka naleko fa ma ka nabe'i fa he hi miahan.

⁴³Kais hi mile'un hi aom natuin hi miah mu'it onle nane.

⁴⁴Hi Au UISNENO Uisneno es kau, es nane te ampanat nai he nati' hi miknino mibala, natuin Au knino kau.

⁴⁵Au UISNENO kau Au es upoitan ki na'ko Mesir, he nati' nabe'i Au fani hi Uisneno. So nati' hi knino ki, natuin Au knino kau.

⁴⁶Nane lekat lulut neu mu'it, nok ale kolo, ma mu'it le anmoni anbi oe nanan ma le anmoni anbi nain.

⁴⁷Hi mes nabe'i ambeti me es alekot ma me es amle'ut, neu mu'it me es nabe'i he hi miahan ma mu'it me esle' ka nabe'i fa he hi miahan.