Read Uab Meto IMAMAT 12 Bible Online

IMAMAT 12 - Uab Meto bible

IMAMAT 12

¹UISNENO anfe neu Nai Musa lekat lulut i

²neu nonot Israel. Leka bife mese in nahonis li'anmone, anbi neno hitu in a'lon bife nane nanuni ai nakae, onle tabu in nit funan.

³Anbi neno fanu namsopu in anah nane mes hen hapi ai hen heli.

⁴Namuni na'ko neno bo'tenu am tenu anteni bife nane fe nanuni ai nakae natuin fe napoitan na'. In ka nabe'i fa hen le'o blua-blua le anpake neu luli besa ma ka nabe'i fa hen tam neu Um-ume UISNENO talante neno in naknino'on nane namsopu.

⁵Leka bife mese in nahonis li'anbife, anbi neno bo'es am ha in a'lon bife nane nanuni ai nakae, onle tabu in nit funan. Namuni na'ko neno bo'ne am ne' anteni bife nane fe nanuni ai nakae natuin fe napoitan na'.

⁶Leka neno in naknino'on namsopu, leko natuin nahonis nalali li'anmone ai li'anbife nane mes neki tulu tnatas neu Ana' fuat knino anbi Um-ume UISNENO in eno matan. Tulu tnatas nane bibi kase ana' mese fe ton mese neu fua tulu mnotu, ma kol kase ana' mese ma kol otos ana' mese neu fua tulu sako sanat.

⁷Ana' fuat knino mes nana'at in tulu tnatas neu UISNENO ma anmo'e luli besa neu hen sako nuni ai kae nane, talante in anfani knino. Nane esle' bife mese hen mo'e nani leka in nahoni nalali.

⁸Leka bife nane kan mu'i fa he naloitan bibi kase ana' mese, in mes neki kol kase ana' nua ai kol otos ana' nua: es neu fua tulu mnotu ma es anteni neu fua tulu sako sanat. Ana' fuat knino mes anmo'e luli besa neu hen sako lasi nuni ai kae na'ko bife nane, onane te in anfani naknino.