Read Uab Meto IMAMAT 13 Bible Online

IMAMAT 13 - Uab Meto bible

IMAMAT 13

¹UISNENO anfe neu Nai Musa ma Nai Harun lekat lulut i:

²Leka atoni mese in aon anmu'i akfua, ai hune, ai akbubu muti anbi in pasu le hen fani menas anbi in aon pasun le neki amle'ut, so mes neki in neu Ana' fuat knino sanut mofut Nai Harun.

³Ana' fuat knino mes antae atoni nane in aon le menas anpoi anbi in aon pasun. Kalu funuf anbi pasu bale menas atoni nane anfani muti, ma bale menas nane kalu in antam anesi na'ko pasu bale menas nane, atoni nane in napeni men poko le neki amle'ut. Ana' fuat knino mes nalile ma naton nak atoni nane amle'ut ma ka naleko fa.

⁴Mes kalu bale le namen masan muti ma kan tam fa mnanu na'ko pasu bale menas nane, ma funuf anbi bale menas nane amsa ka muti fa, atoni nane mes anpaisan nani nan neno hitu in a'lon.

⁵Anbi neno hitu namsopu, Ana' fuat knino mes antae anteni. Ma kalu anbi in tenab nak menas nane fe nabala ma kan fenus fa, atoni nane mes anpaisan in, nan neno hitu in a'lon anteni.

⁶Anbi neno hitu namsopu Ana' fuat knino mes antae nafani anteni, ma kalu bale menas nane in naleko ma kan fenus fa, Ana' fuat knino mes nalile ma naton nak atoni nane naknino.

⁷Mes kalu leka Ana' fuat knino nalile ma naton nalali nak atoni nane naknino mes menas atoni nane amfemus, in mes anfani he natef nok Ana' fuat knino.

⁸Ana' fuat knino mes antae anteni, ma kalu in menas namneo anfenus, atoni nane mes nalile ma naton nani nak amle'ut, in namen men poko le neki amle'ut.

⁹Atoni mese le namen men poko amle'ut mes neki nani neu Ana' fuat knino.

¹⁰Kalu natuin Ana' fuat knino in antae atoni nane in pasun anmu'i fu'un muti le on hune ma funuf anbi bale menas nane anfani muti,

¹¹atoni nane in namen men poko amle'ut. Ana' fuat knino mes nalile ma naton nak atoni nane amle'ut. Ka nabe'i fa hen paisan ai naikan in, natuin namneo nalali nak atoni nane in amle'ut kun.

¹²Kalu Ana' fuat knino in nit nak hune-hune muti nane anfenus na'ko atoni nane in anakan talante in haen,

¹³ma natuin in taes nak menas nane anfenus neu atoni nane in aon ok-oke ma in pasun ok-oke muti nalali, nak atoni nane in naknino.

¹⁴Mes kalu hune anpoi, Ana' fuat knino mes antae anteni.

¹⁵Kalu nane namneo hune, atoni nane mes nalile ma naton nani nak in amle'ut kun, natuin in namen men poko amle'ut.

¹⁶Mes kalu hune nane naleko ma anfani muti anteni, atoni nane mes he nao natef nok Ana' fuat knino,

¹⁷he nati' antae anteni. Kalu hune nane namneo in anfani muti nalali, Ana' fuat knino nalile ma naton nak atoni nane naknino.

¹⁸Kalu atoni mese in anmu'i bisu le naleko nalali,

¹⁹mes anbi in balan anpoi fu'un muti ai hune-hune muti masan me', atoni nane mes he nao he natef nok Ana' fuat knino he nati' antae in.

²⁰Kalu hune-hune nane onle antam nesin pasu le anfun nan hune-hune nane ma funu anbi bale menas nane anfani muti nalali amsa, Ana' fuat knino nalile ma naton neu atoni nane nak in amle'ut kun. Bisu nane menas ahunut na'ko men poko amle'ut.

²¹Mes kalu natuin Ana' fuat knino antae funu anbi bale menas nane kan fani fa muti ma bale nane kan tam fa mnanu nesi na'ko pasu anfun nan bale menas nane, al in masan nane fe fe'u, atoni nane mes anpaisan ai naikan in nan neno hitu in a'lon.

²²Kalu hune muti nane anfenus, Ana' fuat knino mes nalile ma naton neu atoni nane nak amle'ut natuin in namen men poko amle'ut.

²³Mes kalu hune muti nane ka nabaina fa ma kan fenus fa amsa, nane al bisu in balan, nalile ma naton neu atoni nane nak in naknino.

²⁴Kalu atoni mese antoman papa' mnotu, oke te pasu anbi papa' nane anfani muti ai muti namas me' amtasa,

²⁵Ana' fuat knino mes antae nani. Kalu funuf anbi bale menas nane anfani muti ma in papa' antam anesi na'ko pasu anfun nan bale menas nane, nane men poko amle'ut natnani nalali neu papa' mnotu nane, ma Ana' fuat knino mes nalile ma naton neu atoni nane nak in amle'ut kun.

²⁶Mes kalu funuf anbi bale nane kan fani fa muti ma bale nane kan tam anesi fa na'ko pasu anfun nan bale menas nane, al in masan nane fe fe'u, atoni nane mes anpaisan ai naikan nan neno hitu in a'lon.

²⁷Anbi neno hitu namsopu Ana' fuat knino mes antae nafani nani. Kalu hune nane anfenus, atoni na ne' in namen men poko amle'ut, ma mes nalile ma naton neune nak in amle'ut kun.

²⁸Mes kalu hune muti nane ka nabaina fa ma kan fenus fa, al in mas muti nane anesi, nane ka men poko amle'ut fa. Ana' fuat knino mes nalile ma naton neu atoni nane nak in naknino, natuin mas muti nane al papa' mnotu in balan.

²⁹Kalu atoni mese ai bife mese namen men poko

³⁰anbi in anakan ai in a'su'in, Ana' fuat knino mes hen tae in. Kalu bale menas nane onle antam anesi na'ko pasu anfun nan bale menas nane, ma nakfunu ai konon anbi bale nane anfani molo oke te ankolu, atoni nane namen men poko amle'ut ma mes nalile ma naton neune nak in amle'ut kun.

³¹Kalu natuin Ana' fuat knino antae nak bale menas nane kan tam anesi fa na'ko pasu le anfun nan bale menas nane, mes kan mu'i fa nakfunu ai konon le leko anbi bale nane, atoni nane mes anpaisan ai naikan in nan neno hitu in a'lon.

³²Anbi neno hitu namsopu, Ana' fuat knino mes antae nafani bale menas nane kan fenus fa ma kan mu'i fa nakfunu ai konon le molo anbi bale nane, nesi anteni amsa onle kan tam anesi fa na'ko pasu

³³anbi bale menas nane, atoni nane mes an eu in nakfunu ai in konon anfun natef bale menas nane. Oke te in mes anpaisan ai naikan in anteni nan neno hitu in a'lon.

³⁴Anbi neno hitu namsopu, Ana' fuat knino mes antae nafani anteni. Kalu in menas kan fenus fa ma bale nane onle kan tam anesi fa na'ko pasu anfun natef bale menas nane, atoni nane nalile ma naton nani nak in naknino ma mes anfasi in blua pake.

³⁵Mes kalu leka naton nalali nak atoni nane naknino nalali mes in menas anfenus,

³⁶Ana' fuat knino mes antae nafani anteni. Kalu menas nane namneo anfenus, ka nabe'i fa Ana' fuat knino antae anteni ai atoni nane in nakfunu ai in konon anfani molo, natuin namneo teb in namle'u kun.

³⁷Mes kalu natuin tenab Ana' fuat knino atoni nane in menas kan fenus fa, ma in nakfunu anmoni ai in konon leko anbi bale nane, menas nane naleko nalali, ma Ana' fuat knino mes nalile ma naton neu atoni nane nak in naknino.

³⁸Leka atoni mese ai bife mese anmu'i hune muti anbi in pasun,

³⁹Ana' fuat knino mes antae atoni nane. Kalu hune-hune nane atkisot on muti namsab-sab, al mahatas natlak neu in, ma naton neune nak in naknino.

⁴⁰Kalu atoni mese napeni hune anbi in kotin ai anbi in anakan antom mat, monas ai mois nane kan mo'e fa in anfani amle'ut.

⁴¹

⁴²Mes kalu fu'un muti me' amtasa anpoi anbi bale monas ai mois nane, in namen men poko amle'ut.

⁴³Ana' fuat knino mes antae atoni nane, ma kalu namneo anmu'i fu'un muti me' amtasa,

⁴⁴Ana' fuat knino mes naton neune nak amle'ut kun natuin in namen men poko amle'ut anbi in anakan.

⁴⁵Atoni mese le namen men poko amle'ut in mes anpake blua pake kloef ma nafetin in nakfunu ansisa'e. In mes antobe in human a pinan ma anhunun ma ankoa nak, “Amle'ut! Amle'ut!”

⁴⁶Leka in fe namen menas nane in antam atoni amle'ut ma mes natua anbi um-ume in kotin na'lo na'ko atoni-atoni bian.

⁴⁷Kalu napenu anbi blua pake ai lipa na'ko manafu ai pilu muti le anlapu',

⁴⁸ai anbi pasu ai sa' le anmo'e na'ko pasu,

⁴⁹ma lapu' nane masan mate ai masan me' amtasa, lapu' nane humaf le anfenus ma mes nalile ma naton nani neu Ana' fuat knino.

⁵⁰Ana' fuat knino mes antae blua nane, oke te anpaisan ai naikan nan neno hitu in a'lon.

⁵¹Anbi neno hitu namsopu in mes antae nafani anteni, ma kalu lapu' nane namneo anfenus a teb, blua nane amle'ut.

⁵²Ana' fuat knino mes notu nani blua nane, natuin lapu' nane humaf le anfenus, es nane te mes nale'un nani neki ai.

⁵³Mes kalu natuin Ana' fuat knino antae nak lapu' nane kan fenus fa anbi blua pake nane,

⁵⁴in anlenu he nati' blua pake nane anfase nani ma anpaisan ai naikan nani nan neno hitu in alon.

⁵⁵Oke te Ana' fuat knino mes antae nafani nani. Kalu lapu' nane kan fenus fa mes in masan nabala, blua pake nane fe amle'ut ma mes notu nani, maski lapu' nane napeni al anbi blua pake nane matan ai anbi in kotin.

⁵⁶Mes kalu natuin Ana' fuat knino in antae lapu' nane in namle'u nalalien, pa' le anlapu' na'ko blua pake nane mes anpisu nani.

⁵⁷Kalu namuni te lapu' nane anpoi anfani, nak lapu' nane anfenus, ma tuaf nane mes notu nani blua nane.

⁵⁸Kalu leka anfase lapu' anbi blua pake nane ma namneku, onane te blua pake nane mes anfase anteni, oke te blua nane namneo in naknino kun.

⁵⁹Onle nane lekat lulut neu amle'ut ai lapu' le napeni anbi blua pake ai lipa na'ko pilu muti ai manafu, ai anbi blua sa' le anmo'e na'ko pasu.