Read Uab Meto IMAMAT 18 Bible Online

IMAMAT 18 - Uab Meto bible

IMAMAT 18

¹UISNENO anlenu Nai Musa

²he natiaba neu nonot Israel plenat i nak, “Au, le'i hi UISNENO.

³Kais hi mo'e mituin taos mo'et atoni Mesir, bale afi hi mitua ambine, ai atoni Kanaan, le tabu le i Au eki ki neune.

⁴Mituin nai Au plenat-plenat sin ma amtao mituin nai sa' le Au uplenat ani neu ki. Au, UISNENO Uisneno es hi.

⁵Mituin nai lekat lulut ma ale plenat le Au fe neu ki. Kalu hi mo'e mituin onane, hi of mipeni aomina. Au, UISNENO.”

⁶UISNENO anfe lekat lulut i nati'. Kais amtup mubua mok bife mese na'ko ho biaf ma ho benuf sin.

⁷Kais amtup mubua mok ho aina, ho ama in fenai, natuin in le nane ho ama ini kun.

⁸Kais mukle'at ho ama natuin amtup mubua mok ho ama in fenai bian anteni.

⁹Kais amtup mubua mok ho feto ai anfeto le nok ho aina, leko le nanaeb in anbi ume mese nok ko ai le nanaeb in anbi ume bian.

¹⁰Kais amtup mubua mok ho upuf; lasi nane of neki mae neu ho aom.

¹¹Kais amtup mubua mok ho feto le ama mese mes aina teta ai aina mese mes ama teta, natuin in amsa ho feto.

¹²Kais amtup mubua mok ho ain liko, leko ho ama in fetof ai ho aina in olif.

¹⁴Kais amtup mubua mok ho baba in fenai natuin in amsa ho ain liko.

¹⁵Kais amtup mubua mok ho nanef

¹⁶ma kais amtup mubua mok ho tata in fenai.

¹⁷Kais amtup mubua mok li'anfeto ai upuf na'ko bife mese le afi hom tup mubua mok in. Oni nane ho ini sin, ma nane taos mo'et le ka naleko fa.

¹⁸Kais amafe mok ho fenai in biaf ai in benuf leka ho fenai in fe anmoni.

¹⁹Kais amtup mubua mok bife mese leka in funan fe nem, natuin in fe antam amle'ut.

²⁰Kais amtup mubua mok atoni bian in fenai; toas mo'et nane natam ko anbi amle'ut.

²¹Kais muna'at ho anah mese he natulu natnat leka naliatas Molokh, natuin toas mo'et nane nakle'at Uisneno kanan, ho UISNENO.

²²Atoni mone ka nabe'i fa hen tup nabua nok atoni mone; Uisneno nek nanan taos mo'et nane.

²³Atoni mone ai bife, ka nabe'i fa hen tup nabua nok mu'it, taos mo'et amle'ut nane natam ki anbi amle'ut.

²⁴Kais mile'un hi aom nok ale taos mo'et nane, natuin nok taos mo'et nane uf-uf le natua anbi Kanaan nahun na'ko ki sin nale'un nalali sin aoken. Es nane te UISNENO anli'u sin, he nati' nabe'i hi mitua pah nane.

²⁵Sin antao ma anmo'e nalali taos mo'et le neki amle'ut nane, talante sin pah anfani amle'ut. Es nane te UISNENO ankas sin ma kan kolan fa sin natua anbi nane. Mes hi ka nabe'i fa hem tao ma mo'e ale toas mo'et nane. Hi al-al ki, atoni Israel ma atoni anao amnemat le nabala nok ki, mes natuin lekat lulut ma plenat UISNENO,

²⁸he nati' In kais ankas ki ma anli'u ki na'ko pah le nane onle atoni-atoni le ka nahin fa UISNENO, le natua nahunun ki anbi nane.

²⁹Hi mihin nak sekau le antao ma anmo'e taos mo'et le neki amle'ut nane ka nabe'i anteni fa anso'i in on lokif taluf nonot Uisneno.

³⁰Es nane te UISNENO nakua a'an nak, “Mituin nai lekat lulut le Au fe ani neu ki ma kais anmo'e mituin taos mo'et atoni-atoni le natua pah Kanaan nahunu na'ko ki. Kais mile'un hi aom nok him tao ma mo'e taos mo'et amle'ut nane. Au le'i hi UISNENO.”