Read Uab Meto IMAMAT 19 Bible Online

IMAMAT 19 - Uab Meto bible

IMAMAT 19

¹UISNENO anlenu Nai Musa

²natiaba neu to Israel plenat i nak, “So nati' hi knino ki, natuin Au hi UISNENO knino kau.

³Atoni mese-mese mes namtau ma nasman neu in amaf ma in ainaf ma naliatas Neno Snasat onle Au uplenat ani. Au le'i hi UISNENO.

⁴Kais miluli ma mibes neu hau le'u ma fatu le'u. Kais hi mo'e le'u mahuma na'ko noni molo ma hi miluli mibes meune. Au le'i hi UISNENO.

⁵Kalu hi mitulu ma mitnat mu'it neu fua tulu halan, mituin lekat lulut le Au fe ani neu ki, he nati' Au simo fua tulu nane.

⁶Sisi mu'it nane mes hi miah mani anbi neno mu'it nane him lolo, ai anbi neno noka fa. Sisi le fe nabala anbi neno tenu te of motu mani ok-oke, natuin sisi nane ka naleko fa.

⁷Kalu hi miah sisi nane amsa, fua tulu nane Au ka simo fa.

⁸Sekau le nah sisi nane in nasanab natuin in kan tola fa sa' le nateta nani neu Kau. Kan so'i fa atoni nane on lukif taluf Au nonot.

⁹Kalu him ili ai him seki, kais him lefi ane kase le anmoni anbi hi lene in ninen, ma kaisa hi meki amfani he mibua ane kase saif leka him ili ai him seki milali.

¹⁰Kais him fani neu hi lene tua min kase neu he mibua tua min kase in fuan le nabala leka him seu anbi hae ahunut. Onane amsa tua min kase in fuan anmofu nalali kais hi maiti. Mihena sin neu atoni amamu'it. Au le'i hi UISNENO.

¹¹Kais hi mibak, kaisa mimoe ma amfuli es.

¹²Kais amanta'en natuin Au kanak kalu hi ka mitenab fa he minokab lasi manta'en nane, natuin nok nane hi mikle'at Au kanak. Au le'i hi UISNENO.

¹³Kais munisi ho bia ma ho benu ai musik sin bale. Atoni le anmepu anbi ki kaisa hi mitau in baen, ai he fai mese amsa kaisa.

¹⁴Kais amsukat atoni atono ai akosot ma kaisa amtao fatu astunas anbi atoni afolot sin matan. So him tola ma mimtau neu Kau, natuin Au le'i hi UISNENO.

¹⁵Hi mes nek amneot leka hi mifek lasi; kais ampesi atoni amamu'it ma kaisa mimtausan atoni amu'it.

¹⁶Kais minaoba han le'uf neu atoni-atoni hi nonot sin, he nati' hi kam tao ma mo'e fa lasi maten neu hi bia ma hi benu sin. Au UISNENO kau.

¹⁷Kais amnek nanan neu sekau amsa. Mileko lasi suli mok sekau am sekau amsa, he nati' hi ka misanab fa natuin atoni bian.

¹⁸Kais amseun banin lasi manek nanan ma kaisa muto'an atoni bian, mes amnek ma mumnau ho bia ma ho benu onle hom nek ma mumnau ho aom. Au UISNENO kau.

¹⁹Mituin Au plenat-plenat sin. Kais mibuaba mu'it huma nua he sin napeni ana'. Kais amsen fini huma nua anbi lene pisa mese. Kais ampake blua pake le antenu na'ko abas huma nua.

²⁰Leka atoni mese anmanta'en nak of nasosa in ate bife neu atoni bian hen mo'e in anfani onfe kliko, ma atoni le anlomi hen sos ate nane fe kan baen fa, oke te tuaf ahunut nane antup nabua nok ate nane, mes nafek lasi neu sin nua sin ma nasanab sin, mes ka nabe'i fa he namate sin, natuin maski onane amsa bife nane fe in ate.

²¹Atoni nane mes neki bibi kase keso mese neu eno matan Au Um-ume neu fua tulu seka lukit.

²²Ana' fuat knino mes natulu bibi kase nane anbi luli besa he naknino, he nati' sanat atoni nane ansako nani. Ma Au, UISNENO of asako ani sin sanat.

²³Leka him tam milali neu pah Kanaan ma him sen hau fua huma-huma anbi nane, anbi ton tenu ahunut ale hau nane in fuan him kiso sin on ka naleko fa ma ka nabe'i fa he hi miahan.

²⁴Leka antam ton ha ale hau fua nane mes mitulu mitnat on pules liatas neu Kau, hi UISNENO.

²⁵Leka antam ton nim oke te nabe'i hi miah hau nane in fuan. Kalu him tao ma mo'e ale lekat lulut nane, ale hi hau fua nane of nafua nesi anteni. Au le'i hi UISNENO.

²⁶Kais hi miah na'. Kais ampake le'u-le'u tolo'.

²⁷Kais am eu ho nakfunu anbi ho nakam in ninen ai am eu ho konom.

²⁸Kais amlun hi aom pasun he mo'e taka'-taka' ai mipapa' hi aom on ataka nak him kae ma amkul neu atoni amates. Au UISNENO kau.

²⁹Kais minebet hi anfeto sin nok hi mo'e sin anfani bife amapaisa anbi ume luli besa neu uisneno teta. Nok taos mo'et onle nane hi mile'un hi pah, ma taos mo'et amle'ut of naseke'on anbi nane.

³⁰Miliatas Neno Snasat ma amtola bale le nateta nani neu he miluli ma mibes neu Kau. Au UISNENO kau.

³¹Kais amnao hem toti fainekat na'ko atoni mnane le anmo'e malutas nok ale smanaf atoni amates. Kalu him tao ma mo'e lasi nane him fani amle'ut. Au le'i hi UISNENO.

³²Mimtau ma misman ma amtola atoni-atoni mnasi. nati'e him tola ma mimtausan neu Kau, natuin Au UISNENO kau.

³³Kais anmo'e lasi ka alekot neu atoni anao amnemat le natua anbi hi pah.

³⁴Amtao ma mo'e sin onle him tao ma mo'e neu atoni-atoni na'ko hi nonot ma amnek mimnau sin onle him nek mimnau hi aom. Mimnau natuin hi amsa afi hi moni on atoni anao amnemat anbi pah Mesir. Au le'i hi UISNENO.

³⁵Kais mimoe ai amfuli atoni bian nok him pake su'at, tnais le ka namneo fa.

³⁶Ampake tani su'at, tnais ma atai' le amneot. Au le'i hi UISNENO, ma Au eki ki ampoi milali na'ko pah Mesir.

³⁷Mituin nai ale lekat lulut ma Au plenat sin. Au UISNENO kau.”