Read Uab Meto IMAMAT 20 Bible Online

IMAMAT 20 - Uab Meto bible

IMAMAT 20

¹UISNENO anlenu Nai Musa

²he naton lasi i neu to Israel nak, “Ale atoni anbi ki ai atoni anao amnemat le nabala nok ki le natulu in anah neu Molokh, ale to mes anpoli in neki fatu talante in anmate.

³Atoni le natulu in anah neu Molokh, nale'un Au Um-ume ma in nale'un Au kanak le aknino. Of Au kas in ma Au ka so'i teni fa in on lokif taluf Au nonot.

⁴Kalu to antobe sin matan neu taos mo'et atoni nane ma ka nanaoba fa lasi maten neu in,

⁵Au eki nok of Au kas in, in ume nanan sin, ale atoni le sin nasaitan Kau ma naluli nabes neu Molokh. Of kan so'i anteni fa sin on lokif taluf Au nonot.

⁶Atoni le in nao ma antoti fainekat neu mnane le anmo'e malutas ale smanaf atoni amates of Au kas sin ma Au ka so'i teni fa sin on lokif taluf Au nonot.

⁷Ampanat nai he nati' hi knino, ki piut natuin Au UISNENO es kau.

⁸Mituin nai Au plenat-plenat sin, natuin Au UISNENO kau le Au beti uteta ki neu Kau.”

⁹UISNENO anfe lekat lulut i nak, “Atoni le ansukat in amaf ai in ainaf mes namate nani in. In anmate natuin in sanat kun.

¹⁰Leka atoni Israel mese anmapaisa nok atoni mese in fenai le sin fe nonot mese, in ma bife nane mes namate sin.

¹¹Atoni mese le antup nabua nok in amaf in fenai bian, in nale'un in amaf in-ini kun. Atoni nane ma bife nane mes namate sin. Sin anmate natuin sin sanat kun.

¹²Leka atoni mese antup nabua nok in nanef, sin nua sin mes namate sin. Sin anmapaisa nalali, ma sin anmate natuin sin sanat kun.

¹³Leka atoni mese antup nabua nok atoni bian, sin anmo'e taos mo'et amle'ut ma le'uf, ma sin nua sin mes namate sin. Sin anmate natuin sin sanat kun.

¹⁴Leka atoni mese anmafe nok bife mese ma nok bife nane in ainaf, sin tenu sin mes notu sin talante anmate, natuin sin toas mo'et nane kan matom fa. Toas mo'et onle nane ka nabe'i fa hen moni anbi ki.

¹⁵Leka atoni mese antup nabua nok mu'it, atoni ma mu'it nane mes anlolo sin.

¹⁶Leka bife mese antup nabua nok mu'it, bife ma mu'it nane mes anlolo sin. Sin anmate natuin sin sanat kun.

¹⁷Leka atoni mese antup nabua nok in fetof ai nok in fetof le amaf mese mes es-es in ainaf kun ai ainaf mese mes es-es in amaf kun, kan so'i fa sin anteni on lukif taluf Au nonot. Sin anmo'e nalali taos mo'et le kan matom fa, ma mes sin ansutai in amnekin.

¹⁸Leka atoni mese antup nok bife mese le in funan fe nem, kan so'i fa sin anteni on lokif taluf Au nonot.

¹⁹Leka atoni mese antup nok in babaf, sin nua sin mes ansutai tanhais nane in amnekin.

²⁰Leka atoni mese antup nabua nok in babaf in fenai, in nale'un babaf. Atoni ma bife nane sin mes ansutai in kasat. Talante sin anmate mes ka napeni fa anah.

²¹Leka atoni mese in nasik nan in biaf ai in benuf in fenai, in nale'uf in biaf ma in benuf nane ma anmo'e taos mo'et le kan matom fa. Talante sin anmate mes ka napeni fa anah.”

²²UISNENO nakua a'an nak, “Mituin nai ale lekat lulut ma Au plenat, he nati' kaisa anli'u ki na'ko pah Kanaan, le Au eki ki neune.

²³Kais amkiso mituin halat uf le natua ma namaika anbi nane. Sin nale'uf Kau nok ale sin taos sin mo'et amle'ut. Es nane te Au li'u sin, he nati' nabe'i him tam neu pah nane.

²⁴Pah amu'it ma maafa nane Au manta'en ulali neu ki, es nane te Au fe ani neu ki anfani hi ini kun. Hi Usi UISNENO es Au le Au beti aikan ki na'ko uf-uf bian.

²⁵Es nane te hi mes ambeti nok amneot mu'it alekot na'ko mu'it ka alekot. Kais hi miah mu'it le ka alekot. Mu'it nane Au uton ak ka naleko fa, es nane te kalu hi miah of him fani amle'ut.

²⁶Hi Au beti aikan ki na'ko uf-uf bian he nati' him fani Au ini kun. Fun hi mes aknino ki natuin Au UISNENO kau, ma Au knino kau.

²⁷Atoni mese-mese ai bife le anmo'e malutas nok ale smanaf atoni amates mes ampoli meki fatu talante anmate. Atoni nane anmate natuin in sanat kun.”