Read Uab Meto IMAMAT 21 Bible Online

IMAMAT 21 - Uab Meto bible

IMAMAT 21

¹UISNENO anlenu Nai Musa he nati' natiaba plenat i neu ale Ana' fuat knino sanut mofut Nai Harun nak, “Ana' fuat knino ka nabe'i fa he nale'un in aon natuin in nok anbi luli besa ansub amates na'ko in biaf in benuf,

²somak kalu amates nane in ainaf, in amaf, in olif ai in tataf,

³ai in fetof le kan mamone fa, ma natua ume mese nok in.

⁴In ka nabe'i fa he nale'un in aon natuin in nok anbi luli besa ansub amates na'ko in fenai in biaf in benuf sin.

⁵Ana' fuat knino mese ka nabe'i fa hen eu monas in anakan aon bian ma ka nabe'i fa he napalan in konon ai napapa' in aon neki aikan he nalile ma naton neu in ankae ma ankul.

⁶In anfani Au ini le mabeti kun ma ka nabe'i fa he nale'un Au kanak. In natulu ma natnat fua tulu mnahat ai bukae neu Kau, es nane te in mes he knino kun.

⁷Ana' fuat knino mese ka nabe'i fa hen mafe nok bife amapaisa ai bife le ka ao teme fa ai le anmapolin, natuin Ana' fuat knino nane Au ini kun.

⁸Nonot Israel mes hen simo Ana' fuat knino on atoni le nateta nani in neu Kau natuin in natulu natnat fua tulu mnahat ai bukae neu Kau. Au UISNENO kau; Au le i knino kau ma Au uknino Au nonot.

⁹Kalu anbife na'ko Ana' fuat knino mese anfani bife amapaisa in nale'uf in amaf ma mes notu in talante anmate.

¹⁰Ana' Fuat knino Amnanut namepan nalali in nok antesi mina luli besa neu in anakan ma anpake in neki blua pake Ana' Fuat knino Amnanut neu in. Es nane te ka nabe'i fa he nafetin in nakfunu ansisa'e ai anpisu in blua pake on ataka neu in ankae ma ankul.

¹¹Natulu ma natnat nalali in neu Kau hen fani Au ini kun, es nane te ka nabe'i fa he nale'un in aon. In ka nabe'i fa amsa he nale'un Au Um-ume natuin anpoi na'ko nane hen tam neu ume le anmu'i amates le in aon nitun anbi nane, maski nak in amaf in aon nitun ai in ainaf kun.

¹³In al nabe'i anmafe nok bife ao temef na'ko in nonot kun. In ka nabe'i fa anmafe nok bife banu ai bife mese le mapolin, anbife amapaisa mese, of in antam amle'ut. Au UISNENO kau ma Au uteta ulali in anfani Ana' fuat knino Amnanut.”

¹⁵Kalu in antanhai lekat lulut nane, in anhenu le namneo aknino, of sin antam amle'ut. Au UISNENO kau Au uteta ulali in anfani Ana' Fuat knino Amnanut.”

¹⁶UISNENO naplenat Nai Musa

¹⁷he nati' naton lasi i neu Nai Harun nak, “Atoni mese na'ko ho sanut mofut le aon namle'u ka nabe'i fa he natulu natnat fua tulu mnahat ai bukae neu Kau. Nane nanaobon talante nabal-bal.

¹⁸Atoni le natulu ma natnat fua tulu ka nabe'i fa he in aon namle'u, esle' atoni afolot, ai ao ole, atoni le in human namle'u ai lokif taluf anbi in aon le namle'u,

¹⁹le in niman an ole ai in haen anse'al,

²⁰le in asa'un ankuubu ai atoni kol-kole, le in matan namen ai le namen men poko' ma le anboe in.

²¹Ale sanut mofut Ana' fuat knino Nai Harun le in aon namle'u ka nabe'i fa he natulu ma natnat fua tulu mnahat ai bukae neu Kau.

²²Mes nabe'i in nah mnahat ai bukae le natulu natnat, leko fua tulu mnahat ai bukae le aknino ai fua tulu mnahat ai bukae le knino le'uf kun.

²³Fun natuin atoni nane in aon namle'u, in ka nabe'i fa hen haumak pilu ekat le an eka Ke'an Knino ai baki tulu. In ka nabe'i fa he nale'un ale blua le nateta nalali sin neu Kau, natuin Au UISNENO kau, ma Au esle' uteta ale blua nane.”

²⁴Nane lekat lulut le Nai Musa natiaba neu Nai Harun ma in anah sin, ma neu nonot Israel ok-oke.