Read Uab Meto IMAMAT 22 Bible Online

IMAMAT 22 - Uab Meto bible

IMAMAT 22

¹UISNENO anlenu Nai Musa

²he natiaba plenat le i neu Nai Harun ma in anah sin nak, “Amtao ma mo'e nok alekot sa' le nonot Israel he natulu al neu Kau he nati' hi ka mile'un fa Au kanak aknino.

³Kalu atoni mese na'ko hi sanut mofut anbi amle'ut in nanan anhaumak ale tulu tnatas knino le nonot Israel nateta nani neu Kau in ka nabe'i anteni fa antuthae anbi baki tulu. Lekat lulut nane nanaobon talante nabal-bal.

⁴Atoni mese na'ko sanut mofut Nai Harun le namen men poko' amle'ut, ai in ahonin namen talante napoitan oe le ansai piut, mes nakain in he kaisa in anbukae fua tulu knino kalu fe ka nalile ma naton fa nak in naknino. Ana' fuat knino mese anfani amle'ut kalu in anle'o sa' esle' amle'ut natuin antoman aon nitu amates. In amsa antam amle'ut kalu in oe minif anpoi,

⁵ai anle'o mu'it ai atoni le antam amle'ut.

⁶Ana' fuat knino mese nok lanan me amsa in anfani amle'ut, in anfani amle'ut nabala talante neno antes. Ma leka neno antes nalali in ka nabe'i fa he nah bukae le natulu natnat neu UISNENO kalu in fe ka naniu fa.

⁷Leka neno antes nalali in naknino ma nabe'i in nah bukae nane natuin in bukae esle' nane.

⁸Nakain in amsa he nati' kaisa nah sisi mu'it le anmate anmes ai anmate natuin mu'it abulalut anheke ma anpisu. Kalu in nah sisi anne, in anfani amle'ut. Au UISNENO kau.

⁹Ana' fuat knino ok-oke mes natuin lekat lulut le Au fe ulali. Kalu kahaf, sin nasanab, ma of sin anmate, natuin antanhai ale lekat lulut le aknino nane. Au UISNENO kau, ma Au es uteta ani sin neu Kau.

¹⁰Tulu tnatas le nateta nani neu Kau al Ana' fuat knino in ume nanan sin le nane es nabe'i hen bukae, atoni bian ka nabe'i fa, maski atoni nane ume mese nok Ana' fuat knino ai atoni ameput le in anbaen anbi in ume nanan.

¹¹Mes ate-ate le Ana' fuat knino nane ansos sin neki in noni kun ai le nahonis sin anbi in ume nanan, nabe'i sin nah bukae na'ko Ana' fuat knino nane in pa' ma in nama'.

¹²Ana' fuat knino mese le in anfeto anmamone nok atoni ka Ana' fuat knino fa, ka nabe'i fa he nah tulu tnatas nane.

¹³Mes Ana' fuat knino in anfeto le anbanu ai le anmapolin ma kan mu'i fa anah oke te anfani neu in amaf in ume ma anfani in tuthaes nabe'i in nah mnahat pa' ma nama' na'ko in amaf. Ale Ana' fuat knino in ume nanan sin es nabe'i he nah tulu tnatas nane.

¹⁴Kalu atoni mese le ka Ana' fuat knino in ume nanan fa ka nok fa asafanu in nah bukae le natulu natnat neu UISNENO, in mes anseka nafani neu Ana' fuat knino ansato anteni nok lekat bati bo'nua.

¹⁵Ana' fuat knino-ana' fuat knino ka nabe'i fa he nale'un tulu tnatas le nateta nani neu Kau

¹⁶ma ka nabe'i fa sin nafetin he nati' atoni bian he sin nah nani mnahat nane. Lasi nane anmo'e atoni nane nasanab ma neki kasat nem neu in. Au UISNENO kau, ma Au es aknino tulu tnatas nane.”

¹⁷UISNENO anlenu Nai Musa

¹⁸anfe neu Nai Harun, in anah-anah sin ma neu to Israel ok-oke lekat lulut i. Leka atoni Israel mese ai atoni anao amnemat le natua nabala anbi Israel mes natulu natnat fua tulu hen baen in han manta'en, ai fua tulu nek alomit, mu'it nane mes keso ma ka nabe'i fa anmu'i in amle'un he nati' masimo.

²⁰Kais mitulu mitnat mu'it le anmu'i in amle'un natuin UISNENO kan lomi fa hen simo.

²¹Kalu atoni mese natulu natnat neu UISNENO fua tulu halan hen baen in han manta'en ai neu fua tulu nek alomit, mu'it nane ka nabe'i fa hen mu'i in amle'un, he nati' masimo.

²²Kais mitulu minat neu UISNENO mu'it le anfolo, le in nuif nat'ipu ai le napapa', le anmu'i bisu le naoe, le namen men poko' ai hune. Mu'it onle nane kaisa mitulu mitnat neu fua tulu bukae anbi baki tulu in fafon.

²³Neu fua tulu nek alomit nabe'i hi mitulu mitnat mu'it le in aon ka naleko fa; mes neu hem baen han manta'en mu'it onle nane ka masimo fa.

²⁴Kais mitulu mitnat neu UISNENO mu'it le in ahonin fuanen mahapi, an ote, napapa' ai mapolin. Lasi nane ka na be'i fa anbol anbi hi pah.

²⁵Mu'it le hi mipeni na'ko atoni anao amnemat ka na be'i fa he mitulu mitnat neu fua tulu bukae. Mu'it nane antam amle'ut ma ka masimo fa.

²⁶Bijae ana', bibi kase ana', ai bibi ana' le fe nahonis mes nabua nok in ainaf neno hitu in a'lon. Namuni na'ko nane te mu'it nane nabe'i ansimo in neu fua tulu bukae.

²⁸Kais mitulu bijae ainaf ai bibi kase ai bibi nok in ana' anbi neno mese.

²⁹Leka hi mitulu mitnat tulu tnatas fua tulu nekaf neu UISNENO, amtao ma mo'e nane natuin lekat lulut, he nati' hi fua tulu masimo.

³⁰Him bukae fua tulu nane anbi neno nane amsa, ma kaisa mihena akle'o amsa neu neno noka.

³¹UISNENO nakua a'an nak, “Mituin nai Au plenat-plenat sin; Au UISNENO kau.

³²Kais mile'un Au kanak le aknino. To Israel ok-oke mes naluli nabes neu Kau onle Aknino afin-finit matani. Au UISNENO kau ma Au mo'e ki amfani aknino.

³³Au eki ki ampoi mi'ko Mesir, he nati' Au amfani hi Uisneno, Au UISNENO kau.”