Read Uab Meto IMAMAT 25 Bible Online

IMAMAT 25 - Uab Meto bible

IMAMAT 25

¹Anbi Tubu Sinai in tunan in fafon UISNENO nakua a'an neu Nai Musa ma anlenu in

²he natiaba lekat lulut i neu to Israel. Leka him tam neu pah le of UISNENO anfe neu ki, hi mes amtola UISNENO meki lasi i: Anbi ton hitu ai ton Snasat ka nabe'i fa he hi mepu nain he mepu hi lene sin.

³Anbi ton ne' in a'lon hi mes amsen hi lene sin ma amlefi hi lene tua min kase sin tunken ma him abul mibua hi pah in afan.

⁴Mes anbi ton hitu ai ton Snasat nane nateta nani neu UISNENO. Es nane te anbi ton nane in nanan nain mes mafetin ma ka nabe'i fa he hi mepu. Kais amsen ale hi lene sin ma kaisa amlefi hi tua min kase sin tunkenu.

⁵Ma ane kase le anmoni anmes kun ai tua min kase na'ko hi tua min kase un le hi kam lefi fa, ka nabe'i fa him abul mibua ma mipan, natuin ton nane ton Snasat neu nain.

⁶Maski nak onane, nain nane of anfe in afan amsa neu he hi mibaina anfani mnahat neu ki, hi ate-ate sin, hi atoni-atoni le him baen sin, ma atoni-atoni anao amnemat le natua nabua nok ki.

⁷Ma neu ale mu'it le him hao sin amsa ma ale mu'it le anfui anbi hi pah. Ale sa' le pah nane in afan nabe'i hi miahan.

⁸Amso'i nai ton hitu no hitu, amfaune ton bo'ha am sio.

⁹Oke te anbi neno bo'mese fun hitu, nane neno sako sanat, amlenu atoni anpu to'is ai aknit anbi me-me anbi pah ok-oke.

¹⁰Hi mes ambeti miteta ton bo'nim nane, ma miton nai lasi fetin neu to ok-oke anbi pah in nanan. Anbi ton le nane hi blua sin ok-oke le him sos milali sin mes amfe mifani sin neu blua tuaf ahunut nane ai neu in sanut mofut sin.

¹¹Kais him sen hi lene. Ane kase le in anmoni anmese kun ai tua min kase in fuan anbi hi lene tua min kase le hi kam lefi fa ka nabe'i fa him nibun mibua ma mibela.

¹²Ton nane on ton le aknino neu ki. Hi al nabe'i miah sa' le in anmoni anmese kun anbi hi lene.

¹³Anbi ton le nane ale nain le nasosa nalali mes anfe nafani neu tuaf ahunut nain nane.

¹⁴Es nane te kalu hi misosa nain neu hi bia ai hi benu atoni Israel, ai him sos nain na'ko in, kaisa amoe sosa ma sau nane ka nok fa amneot.

¹⁵Osaf na'ko nain nane mes mifek mani natuin ton fauk in a'lon nain nane anfe in afan talante Ton Anfe nafani anbi amnemat.

¹⁶Kalu anso'i in ton namfau, osaf na'ko nain nane mafena. Mes kalu anso'i in ton ka namfau fa, in osan mes ma'kafa, natuin le nasosa nane al anso'i neu tabu abul ma sekit in amfaun.

¹⁷Kais amfuli ma mipoiba hi bia ma hi benu atoni Israel, mes nati' hi mimtausan hi Usi, hi UISNENO.

¹⁸Mituin nai ale lekat lulut ma plenat UISNENO, he nati' hi moni nok tainine anbi pah nane.

¹⁹Nain pah nane of anfe in afan talante hi mu'i mnahat nanokbon ma mitua anbi nane nok aomina.

²⁰Mes oni anmu'i le he natoti nak sa' le of he nah anbi ton hitu in nanan anbi tabu nain ka masena fa ma kan abul fa in afan.

²¹Anbi ton ne in nanan UISNENO of anfe tetus neu nain talante in afan nanokbon neu ton tenu.

²²Ma anbi tabu him sen hi lene anbi ton fanu, abul ma sekit na'ko ton ne' fe esan neu he hi miah. Nesi na'ko nane mnahat le hi miloitan of nanokbon talante tabu him nibun mibua nain in afan anbi ton nane.

²³Ka nabe'i fa hi misosa hi nain talante natfek, natuin nain nane ka hi ini fa, somak Uisneno ini. Hi al on atoni anao amnemat le mipeni meunuan neu hem pake nain nane.

²⁴Kalu nain pisa mese hi misosa, hi mes amsimo atoni ahunut in nain nane in kuasat he nati' in ansoi nafani nain nane.

²⁵Kalu atoni Israel mese anmofu anbi mamu'it talante nok a seke in nasosa in nain, in biaf in benuf le anhaumak nis nokan mes hen soi nain nane.

²⁶Kalu kan mu'i fa atoni neu hen soi nain nane mes tuaf na'ko nain nane anbi neno amunit in nabe'i ma anmu'i noni le nanokbon neu hen soi in nain,

²⁷in mes anbaen neu atoni le ansos nalali in nain upan papmese nok nain nane in afan anbi ton-ton amnemat talante Ton Anfe nafani anbi tabu amnemat. Nok nane te in napeni nafani in nain in-ini kun.

²⁸Mes kalu in ka nabe'i fa hen soi in nain, atoni asosat nane in anpal nain nane piut talante amnemat Ton Anfe nafani. Anbi ton nane nain nane mes anfe nafani neu in tuaf ahunut nane.

²⁹Leka atoni mese nasosa in ume mese anbi kot le anfun natef nan nok baki lape, in anmu'i kuasat hen soi in ume anbi ton mese in a'lon naubon na'ko neno le nasosa.

³⁰Mes kalu ume nane kan soi nafani fa anbi ton mese in kuasat namneku neu hen soi ume nane. Ume nane atoni le ansos ini nabala ma neu in sanut mofut sin. Anbi Ton Anfe nafani, ume nane kan fe nafani fa.

³¹Neu ume anbi kuan le baki lape kan fun natef nan fa in lekat lulut nanaobon papmese onle neu nain; tuaf ahunut anmu'i kuasat hen soi nan ume nane mes anfe nafani anbi Ton Anfe nafani.

³²Mes atoni Lewi anmu'i kuasat he lek-leka fe oke te nabe'i sin ansoi sin amu'in anbi kot-kot le anlek nani neu sin.

³³Leka atoni Lewi mese nasosa in ume anbi kot mese anbi kot nane ma in kan soi nani fa, ume nane mes anfe nafani neune anbi Ton Anfe nafani. Natuin ume atoni Lewi anbi sin kot-kot nane sin ini nabala kun anbi to Israel.

³⁴Mes mnela bale hum anhaumak kot-kot atoni Lewi ka nabe'i fa he nasosa. Nane atoni Lewi sin ini kun talante nabal-bal.

³⁵Leka atoni mese na'ko hi nonot le natua nok ki anmofu anbi nukat ma ka nanono nabe'i fa in amonin, hi mes amtuntaku in on atoni anao amnemat, he nati' in nabe'i hen moni piut nok ki.

³⁶Kais amtoti sufa na'ko sa' le him fe mlapat neu in, mes nati' hi mimtausan hi Uisneno, ma amfe menuan neu atoni nane he in moni nok ki. Kais hi maiti sufa na'ko mnahat le hi misosa neu in.

³⁷

³⁸Nane plenat na'ko hi Usi, UISNENO le In napoitan ki na'ko Mesir hen fe neu ki pah Kanaan, he nati' In anfani hi Uisneno.

³⁹Leka atoni mese na'ko hi nonot le natua nok ki anmofu anbi nukat talante in nasosa in aon on ate neu ki, atoni nane ka nabe'i fa he him lenu in hen meup mepu ate mese.

⁴⁰In mes natua nok ki on atoni mese le anmepu neu ki ma napeni upa talante Ton Anfe nafani.

⁴¹Anbi tabu nane in ma in anah sin nabe'i nasaitan hi ume ma anfani neu in-ini sin ma neu sin na'i ma sin be'i sin bale.

⁴²Atoni Israel nane ate-ate UISNENO; In es neki sin anpoi na'ko Mesir, ma es nane te ka nabe'i fa he nasosa sin on ate.

⁴³Es nane te atoni Israel le nasosa in aon neu ki ka nabe'i fa he hi moe sin nok mafena. So nati' hi mimtau neu hi Uisneno.

⁴⁴Kalu him lomi ate, hi nabe'i amsos na'ko uf-uf le natua nabua nok ki.

⁴⁵Hi nabe'i amsa amsos li'ana atoni anao amnemat le natua nok ki. Li'ana anao amnemat le nahonis sin anbi hi pah anfani hi in-ini,

⁴⁶ma nabe'i amsa him fe sin neu hi anah-anah sin hen fani sin ate anbi sin monin nanan. Mes hi bia hi benu atoni Israel ka nabe'i fa he hi moe sin nok mafena.

⁴⁷Leka atoni anao amnemat mese le natua nok ki anbi hi sonam hi atnanam anfani amu'it, ma anmu'i hi biaf mese atoni Israel anmofu anbi nukat talante in nasosa in aon on ate neu atoni anao amnemat nane ai neu in-ini sin,

⁴⁸atoni Israel nane anmu'i kuasat nabala neu hi hem soi in. Es na'ko in biaf naimone mese,

⁴⁹ai in babaf, ai in biaf na'ko in-ini sin ai atoni bian na'ko in biaf le anhaumak nok in nabe'i ansoi in. Ai namuni te in nabe'i ma anmu'i, in nabe'i ansos kun in aon anmes.

⁵⁰Ate nane mes nauab nok atoni le ansos nalali in. Sin mes hen so'i ton fauken na'ko in nasosa in aon on ate talante amnemat nafetin Ton Anfe nafani, oke te natetab osaf le hen soi in. Osaf nane mes natetab natuin so'it baen le anfe neu atoni ameput.

⁵¹Ate nane mes nafani osaf le ansos in aon anaen papmese onle anso'i baen atoni ameput mese anbi ton-ton le in fe ka nanaoba,

⁵²

⁵³onle in anmepu nalali on atoni ameput le anbaen anbi ton mese. In Usin ka nabe'i fa hen tao ma anmoe in nok mafena.

⁵⁴Kalu kan soi nan fa in neki lanan mese na'ko lasi nane, in ma in anah-anah sin mes nafetin sin anbi Ton Anfe nafani amnemat.

⁵⁵Atoni Israel mese ka nabe'i fa hen fani ate anbi in monin ok-oke natuin atoni Israel nane ate-ate UISNENO. UISNENO es neki sin anpoi na'ko Mesir.