Read Uab Meto IMAMAT 26 Bible Online

IMAMAT 26 - Uab Meto bible

IMAMAT 26

¹UISNENO nakua a'an nak, “Kais hi moe uisneno teta ai mihakeb le'u mahuma ai ni fatu le malula hi miluli ma mibes neune. Hi Usi UISNENO es Au.

²Miliatas neno-neno Snasat ma neno-neno naek luli besa bian ma amtola blua le anbeti nateta he miluli mibesa neu Kau. Au UISNENO kau.

³Kalu hi moni mituin Au lekat lulut sin ma mituin Au plenat-plenat sin,

⁴of Au usanut ulan matom nok in tabu talante nain anfe in afan ma ale hau nafua.

⁵Hi nain in afan of nathoe anfin-fin talante leka antia in tabu hem seu tua min kase in fuan, hi fe amlefi ane kase. Ma leka tabu antia hem sen ane kase, hi fe amseu tua min kase in fuan. Of hi mu'i mnahat le nanokbon ma hi moni nok halan nekaf anbi hi pah.

⁶Au panat hi pah na'ko musu talante of nabe'i him tup nok tainine ma ka mimtausan fa sekau amsa. Mu'it-mu'it abulalut of Au uneku ani sin na'ko pah nane, ma of katit fa makenat anteni anbi hi pah.

⁷Hi of nabe'i mis hi musu-musu sin,

⁸nok atoni nim hi nabe'i mis atoni natun mese, ma nok atoni natun mese hi nabe'i mis atoni nifun mese.

⁹Of Au fe neu ki tetus ma of Au fe neu ki anah upuf namfau. Sa' le Au manta'en ulali neu ki Au mes unokab ani.

¹⁰Hi pah in afan of nathoe anfin-fini, talante nanokbon neu ton mese in nanan. Nesi na'ko nane hi mes nok a seke mipoitan nesif na'ko hi mnahat amna he nati' anmu'i bale he mipan hi mnahat fe'u.

¹¹Of Au utua oke ki anbi Au Um-ume, ma of Au ka tite ma ka polin ki fa.

¹²Of Au oke ki: Of Au fani hi Uisneno ma him fani Au nonot.

¹³Hi Usi UISNENO es Au, le Au eki ampoi mi'ko Mesir he nati' hi kam fani fa ate anteni. Kuasat le anhamu'i ki Au u ipu ulali, ma Au moe ki amfani atoni le nafetnon.”

¹⁴UISNENO nakua a'an nak, “Kalu hi kam nen Kau fa ma kam tao mituin fa Au plenat sin,

¹⁵him tanhai manta'en le Au moe oke ki ma ka mituin fa tfeka ma Au lekat lulut sin,

¹⁶of Au kas ki. Of Au fe amle'ut nem neu ki, menas ma maininit le ka nabe'i fa he naleko, talante hi matam anfolo ma hi moni ambi susal. Of him sen ma amlua mes hi ka miah fa in afan, natuin hi musu-musu sin of nem ma nis ma anbe'u ki ma nalali nani hi sa' le him sen.

¹⁷Of Au kas ki, talante hi musu-musu sin nis ma anbe'u ki ma atoni-atoni le kan lomi ki fa of naplenat ki. Hi of amfani mimtau nae le'uf talante hi maen, maski katit fa ali'ut le anli'u ki.

¹⁸Kalu hi mieku milali ale kasat nane ma hi amsa fe ka mituin Kau fa, kasat neu ki of Au sato kuni hitu anteni.

¹⁹Hi mimok'om anae le'uf, mes Au of is ma be'u ki. Ulan of kan sanu fa, talante hi nain anmeto ma manun on besi.

²⁰Ale hi haet hi susal kan mu'i fa in otan natuin nain of kan fe fa in afan ma ale sa' le him sen of ka nafua fa.

²¹Kalu hi fe amlaban Kau piut amsa ma kam lomi fa he mituin Kau, hi kasat of Au sato kuni hitu anteni.

²²Of Au fe neu ki mu'it-mu'it abulaut neu hi sonam hi atnanam. Mu'it-mu'it nane of anheke ma anpisu hi anah-anah sin, namate hi mu'it sin ma nalali ki, talante hi aim hi so'im anfani al faukah, ma lanan-lanan anbi hi pah anfani mnino.

²³Kalu hi mieku milali ale kasat nane mes hi fe kam nen Kau fa amsa, mes hi fe amlaban Kau piut,

²⁴of Au unoina ki ma kas ki kuni hitu nesi na'ko le anfini ma ankono nalali.

²⁵Of Au upoitan makenat anbi hi sonam hi atnanam neu he kas ki natuin him tanhai milali Au lasi manta'en oke ki. Ma kalu hi mibua anbi hi kot he mami neot ma hafot, of Au fe neu ki menas le ka nabe'i naleko fa, talante nok a seke mina'tom neu hi musu.

²⁶Hi of milali mnahat, talante bife bo'mese al anpake blua mnotu mese hen tunu utunu' le anbi sin. Mnahat nane of him bati, ma leka hi miah milali, hi fe amnaben mimnah piut amsa.

²⁷Kalu hi mieku milali ale susal nane mes hi fe amlaban Kau piut amsa ma kam lomi fa he mituin Kau,

²⁸of nok toas Au unoina ki, ma Au kas ki kuni hitu mafena nesi na'ko le anfini ma ankono nalali.

²⁹Hi of mimnah, talante him bukae hi anah-anah sin.

³⁰Of Au uskuku ule'un hi bale-bale fuat anbi tubu-tubu sin tunan, utseleb hi baki tulu bale hi motu atu fomeni, ma Au polin hi aom hitu neu hi hau le'u ma fatu le'u le Au utseleb ulali sin.

³¹Nok hanisit hi kot-kot sin Au ubaina sin, anfani fatu tutnae, hi bale-bale fuat Au uskuku ule'un ani ma hi fua tulu sin Au ka simo fa sin.

³²Hi pah of Au ule'un ani oke-oke, talante musu-musu le antoko anbi nane of sin naskek leka sin nit amle'un nane in mataen le'uf kun.

³³Au of upoitan makenat anbi hi pah ma usitib usana ki anbi pah-pah bian. Ale hi lene sin of mapolin, ma hi kot-kot sin hi mifetin sin ma anfani fatu tutnae.

³⁴Anbi tabu nane hi fe mapolin ki anbi hi musu-musu sin pah, hi nain le hi ka mifetin fa he nasnas anbi tabu hi fe mitua ambine, of mapolin ma napeni sona he nasnas.

³⁶Hi atoni-atoni sin le anbi bale mapolin anbi pah bian, of Au moe sin namtau bainesi, talante huu no' hanan le anin anfu amsa anmoe sin ma sin naen. Hi of maen onle anli'u ki anbi makenat, oke te ambel ai amtiklot maski kan mu'i fa musu le anhaumak ki.

³⁷Hi of maen ma ampastun es neu es, maski nak kan mu'i fa le anli'u ki. Ma of hi ka mibe'i fa hem laban hi musu-musu sin.

³⁸Hi of amate ambi bale mapolin, hi musu-musu sin anbi pah nane of nale'un ki.

³⁹Ala fauk na'ko ki le fe anmoni anbi hi musu sin pah of sin anmoni anbi susal natuin hi sanat kun ma sanat hi amaf sin.

⁴⁰Mes hi sanut mofut of an au sin sanat ma sanat sin be'i sin na'i le antumatan Kau ma anlaban Kau,

⁴¹talante Au fen ma laban sin ma li'u sin neu bale polin anbi pah sin musu-musu sin. Namuni te, leka hi sanut mofut sin naluli nalali ma sin nanaoba nalali kasat natuin sanat ma sin lasi laban,

⁴²Au of umnau Au lasi manta'en oke Nai Yakub, Nai Ishak ma Nai Abraham. Au of ufe'un Au lasi manta'en he fe pah nane neu Au to.

⁴³Mes pah nane nahunu na'ko nane mes nalumab fe na'ko in atuas sin, namneo-namneo nabe'i in nasnas. Ma Au nonot sin mes nanaoba nani ale kasat nane le Au usanut ani neu sin natuin sin kan lomi fa he natuin Au lekat lulut ma Au plenat-plenat sin.

⁴⁴Mes leka sin fe anbi musu sin pah amsa, of Au ka usaitan fa sin ai ka ule'un fa sin oke-oke. Natuin kalu Au ule'un sin, nane nak Au ufek Au lasi manta'en oke sin, fun natuin Au le i sin Usi, sin UISNENO.

⁴⁵Au of ufe'un lasi manta'en le Au tao ma moe oke sin amfenu, leka Au uton Au kuasat neu ale uf natuin Au eki Au nonot anpoi na'ko Mesir, he nati' Au fani sin Usi, sin UISNENO.”

⁴⁶Nane lekat lulut ma plenat-plenat le UISNENO anfe nani anbi Tubu Sinai in tunan in fafon neu Nai Musa he natiba neu to Israel.