Read Uab Meto IMAMAT 27 Bible Online

IMAMAT 27 - Uab Meto bible

IMAMAT 27

¹UISNENO anfe neu Nai Musa

²lekat lulut i neu to Israel. Leka he natulu atoni mese neu UISNENO hen soi tulu manta'en mese le anbeti nateta nani, nabe'i ansoi atoni nane neki noni fauk-fauk

³matom nok osaf le nanaobon anbi Um-ume UISNENO: — ton 60 nekin sae: atoni — noni muti 15 bife — noni muti 10 — anbi ton 20-60: atoni — noni muti 50 bife — noni muti 30 — anbi ton 5-20: atoni — noni muti 20 bife — noni muti 10 — ton 5 nekin sanu: atoni — noni muti 5 bife — noni muti 3

⁸Kalu atoni le anmo'e tulu manta'en nane atoni amamu'it kun neu hen baen osaf le natetab nani, in mes neki atoni le natulu nalali neu UISNENO nane neu Ana' fuat knino. Ana' fuat knino nane mes natetab osaf le ansanu nesi anmatom nok atoni nane in a'be'in.

⁹Leka tulu manta'en nane antom mu'it alekot le nabe'i ansimo on tulu tnatas neu UISNENO, atoni le anmo'e tulu manta'en nane ka nabe'i fa hen seka neki mu'it bian, natuin ale sa' le natulu natnat neu UISNENO anfani UISNENO ini kun. Kalu in anseka amsa, mu'it nua en nane anfani UISNENO ini.

¹¹Mes kalu tulu manta'en nane antom mu'it amle'ut le ka nabe'i fa masimo on tulu tnatas neu UISNENO, atoni le anmo'e tulu manta'en nane mes in neki mu'it nane neu Ana' fuat knino.

¹²Ana' fuat knino of natetab in osan natuin mu'it nane in amnekin. Ma osaf le natetab nalali nane osaf maten.

¹³Kalu atoni nane anlomi hen soi in mu'it, in mes anbaen in osan ansato neki lekat batis bo'nua.

¹⁴Leka atoni mese nasosa in ume mese neu UISNENO, Ana' fuat knino natetab in osan natuin ume nane in amnekin. Osaf le natetan nalali nane osaf maten.

¹⁵Kalu atoni nane anlomi hen soi in ume, in mes anbaen in otan ansato neki lekat batis bo'nua.

¹⁶Leka atoni mese natulu in nain bian neu UISNENO, in osan mes natetab natuin fini amfaun le hen sen neu nain nane. Neu ane kase kilo bo'nua in osan noni muti bo'mese.

¹⁷Kalu nain nane natulu na'ko Ton Anfe nafani, in osan mes anbaen ok-oke.

¹⁸Kalu nain nane natulu anbi tabu Ton Anfe nafani namsopu, Ana' fuat knino mes antai in osan natuin ton amfaun le fe esan talante amnemat Ton Anfe nafani, oke te natetab osaf le makafa anesi.

¹⁹Kalu atoni le natulu lene nane anlomi hen soi nafani, in mes anbaen in osan ma ansato neki lekat batis bo'nua.

²⁰Kalu in nasosa lene nane nok in kan soi nahunun fa na'ko UISNENO, in kan mu'i fa kuasat anteni hen soi in lene nane.

²¹Anbi amnemat Ton Anfe nafani, lene nane anfani UISNENO ini te nabal-bal, ma kan fe fa neu ale Ana' fuat knino.

²²Kalu atoni mese natulu neu UISNENO lene mese le in ansos nalali,

²³Ana' fuat knino antai in osan natuin ton amfaun le fe esan talante amnemat Ton Anfe nafani. Oke te atoni nane mes anbaen in osan anbi neno nane amsa. Noni nane anfani UISNENO ini.

²⁴Anbi Ton Anfe nafani, mes anfe nafani lene nane neu in tuaf ahunut ai neu in sanut mofut sin.

²⁵Ale osaf le natetab nane natuin osaf le nanaobon anbi Um-ume UISNENO.

²⁶Mu'it le nahonis nahunun nane UISNENO ini, es nane te ka nabe'i fa he natulu neu fua tulu nek lomit. Bijae ana', bibi kase ana' ai bibi le nahonis nahunun nane UISNENO ini.

²⁷Mes mu'it le ka naleko fa le nahonis nahunun nabe'i ansoi natuin osaf le nanaobon anbi Um-ume UISNENO, ansato neki lekat batis bo'nua. Kalu kan soi fa, mu'it nane nabe'i nasosa neu atoni bian natuin osaf le nanaobon anbi Um-ume UISNENO.

²⁸Ka nabe'i fa atoni mese amsa nasosa ai ansoi sa' le anbeti nateta nani ka nok fa uab molok neu UISNENO, leko nane atoni, mu'it ai nain. Nane UISNENO ini ante nabal-bal.

²⁹Nesi na'ko nane atoni le anbeti nateta nani neu UISNENO neu he nale'un ka nabe'i fa hen soi; mes namate in.

³⁰Lekat batis bo'es na'ko pah in afan ok-oke, leko ane kase ai ale hau fua, nane neu UISNENO.

³¹Kalu atoni mese anlomi hen soi pah afan bian, in mes anbaen in osan le nateta nalali ma ansato neki lekat batis bo'nua.

³²Mese na'ko bijae bo'mese nane UISNENO ini. Kalu amso'i mu'it nane, mana' mese na'ko mu'it bo'mese nane UISNENO ini.

³³Tuaf na'ko mu'it nane ka nabe'i fa ambeti me esle' leko, me es ka naleko fa. In amsa ka nabe'i fa hen seka. Kalu in anseka amsa, mu'it nua en nane anfani UISNENO ini ma ka nabe'i fa hen soi.

³⁴Nane plenat-plenat le UISNENO anfe anbi Tubu Sinai in tunan in fafon neu Nai Musa he natiaba neu to Israel.