Read Uab Meto IMAMAT 3 Bible Online

IMAMAT 3 - Uab Meto bible

IMAMAT 3

¹Leka atoni mese natulu bijae mese neu fua tulu halan, bijae nane nabe'i keso, nabe'i ainaf, mes ka nabe'i fa hen mu'i in amle'un.

²Atoni le natulu bijae nane mes antao in niman neu mu'it nane in anakan ma anlolo anbi Um-ume UISNENO in enon. Ale Ana' fuat knino sanut mofut Nai Harun mes anpofi baki tulu in kabenan ha sin neki bijae nane in na'.

³Fua tulu halan le he natulu neu UISNENO, Ana' fuat knino mes natulu sisi na'ko bijae nane: balun le an amu taifen,

⁴akif nok in balun ma atef bian le leok le'uf.

⁵Ale nane ok-oke bua-bua nok fua tulu mnotu bian, mes notu nani sin anbi baki tulu in tunan. Fua tulu bukae nane in fon anhalin UISNENO in nekan.

⁶Kalu le natulu neu fua tulu halan nane bibi kase mese ai bibi, mu'it nane nabe'i keso, nabe'i ainaf, mes ka nabe'i fa hen mu'i in amle'un.

⁷Leka atoni mese natulu bibi kase mese, in mes neki neu Um-ume UISNENO.

⁸Anbi nane in mes antao in niman neu bibi kase nane in anakan oke te anlolo nani anbi Um-ume in enon. Oke te Ana' fuat knino mes anpofi baki tulu in kabenan ha sin neki na'.

⁹Fua tulu halan le he natulu neu UISNENO, Ana' fuat knino mes natulu sisi bian i na'ko bibi keso nane: in balun, in ikon ok-oke le anmu'i in balun ma anheli anpaumak nuif in kotin, balun le an amu nan in taifen,

¹⁰akif nok in balun ma bian le leok le'uf na'ko in atef.

¹¹Ana' fuat knino ameput nane mes notu ale nane oke anbi baki tulu in tunan on fua tulu bukae neu UISNENO.

¹²Kalu le natulu nane bibi mese, atoni le natulu nane mes neki neu Um-ume UISNENO.

¹³Anbi nane in antao in niman neu mu'it nane in anakan oke te anlolo anbi Um-ume UISNENO in enon. Ana' fuat knino mes anpofi baki tulu in kabenan ha sin neki na'.

¹⁴Fua tulu bukae le he natulu neu UISNENO, Ana' fuat knino mes natulu sisi bian na'ko bibi nane: balun le an amu nan in taifen,

¹⁵akif nok in balun ma bian le na leko na'ko in atef.

¹⁶Ana' fuat knino ameput nane mes notu nani oke anbi baki tulu in fafon. Fua tulu bukae nane in fon anhalin UISNENO In nekan. Mu'it nane in balun ok-oke neu UISNENO.

¹⁷Atoni Israel namneo-namneo ka nabe'i fa hen bukae mu'it in balun ai in na'. Lekat lulut nane antia nabal-bal ma mes atoni Israel mese-mese natuin nani he in natua anbi bale me amsa.