Read Uab Meto IMAMAT 4 Bible Online

IMAMAT 4 - Uab Meto bible

IMAMAT 4

¹UISNENO anlenu Nai Musa

²natiaba neu nonot Israel nak sekau am sekau le ka nok fa asafanu in nasanab natuin in antanhai plenat mese na'ko plenat-plenat UISNENO, mes he natuin lekat lulut i.

³Leka le asanab nane Ana' fuat knino Amnanut, talante nonot Israel nasanab nok, in mes natulu bijae keso tipu', mese le kan mu'i fa in amle'un neu UISNENO he nati' ansako in sanat.

⁴Bijae nane mes neki neu Um-ume UISNENO in eno. Ana' fuat knino Amnanut mes antao in niman neu mu'it nane in anakan, oke te anlolo anbi Um-ume in enon.

⁵Na'ko bijae nane in na' bian mes natam nani neu Um-ume in nanan.

⁶Oke te in mes anlep in aklulun neu na' nane in nanan ma anpisil hae' hitu anbi pilu ekat matan le an eka Ke'an Knino.

⁷Na'ko na' nane in bian mes an nose neu sunaf-sunaf anbi si'uf-si'uf baki tulu atu fomeni anbi Um-ume in nanan, ma in nesin nane mes anpofin neu baki tulu mnotu in un le anbi Um-ume in eno matan.

⁸Ana' fuat knino mes naiti bijae keso nane in balun ok-oke, esle' balun le an amu nan in taifen,

⁹akif nok in balun ma bian le na leko na'ko atef.

¹⁰Ale nane ok-oke mes notu nani sin anbi baki tulu fua tulu mnotu onle anbi fua tulu halan.

¹¹Mes sisi bijae nane, in pasu, in anakan, in haen, in taifen nok in tai-susun,

¹²nane ok-oke ma al bian le naikan nalali sin, mes neki sin anpoi na'ko um-ume. Anbi bale nane bijae nane mes notu nani anbi hau hopit anbi bale polin afu, nane bale le anbeti nateta nani neune.

¹³Leka le nasanab nane to Israel ok-oke natuin ka nok fa asafanu antanhai plenat mese na'ko plenat-plenat UISNENO,

¹⁴nok labah leka sanat nahine nani, to mes neki bijae keso tipu' mese neu Um-ume UISNENO matan. Mu'it nane mes natulu nani neu fua tulu sako sanat.

¹⁵Ale atopu to nane mes antao sin niman neu mu'it nane in anakan, oke te anlolo anbi bale nane.

¹⁶Ana' fuat knino Amnanut mes neki na' bian na'ko mu'it nane antam neu Um-ume in nanan.

¹⁷Anbi nane in mes anlep in aklulun neu na' nane in nanan ma anpisil hae' hitu neu pilu eka matan le an eka Ke'an Knino.

¹⁸Ma bian anteni anosen neu sunaf-sunaf anbi si'uf-si'uf baki tulu atu fomeni anbi Um-ume in nanan, ma in nesin nane mes anpofin neu baki tulu in un bale fua tulu mnotu la anbi Um-ume in enon.

¹⁹Mu'it nane in balun ok-oke mes maiti ma motu anbi baki tulu in tunan.

²⁰In mepun onle tulu tnatas bijae keso neu fua tulu sako sanat. Onle nane mepu Ana' fuat knino Amnanut natulu fua tulu neu sanat-sanat to, onane te sanat-sanat nane UISNENO of ansako nani sin.

²¹Oke te bijae keso nane mes neki anpoi, ma notu nani anbi Um-ume in kotin onle tulu bijae keso neu fua tulu sako sanat Ana' fuat knino Amnanut in sanat kun. Onle nane mepu natulu fua tulu sako sanat neu to.

²²Leka asanab nane ana' aplenat mese natuin ka nok fa asafanu antanhai plenat mese na'ko plenat-plenat UISNENO,

²³nok labah leka in nahine in sanat, in mes natulu bijae keso mese le kan mu'i fa in amle'un neu hen sako in sanat.

²⁴In mes antao in niman neu mu'it nane in anakan, oke te anlolo nani anbi baki tulu bian a'li, bale lolo mu'it neu fua tulu mnotu.

²⁵Ana' fuat knino mes anlep in aklulun neu mu'it nane in na' oke te anosen neu sunaf-sunaf anbi si'uf-si'uf baki tulu ma anpofin in nesin nane neu baki tulu in un.

²⁶Oke te mu'it nane in balun ok-oke mes notu nani anbi baki tulu in tunan onle fua tulu halan. Onle nane mepu Ana' fuat knino natulu fua tulu neu sanat ana' aplenat mese, onane te UISNENO of ansako in sanat.

²⁷Leka atoni mese na'ko to ana anmo'e sanat natuin ka nok fa asafanu antanhai plenat mese na'ko plenat-plenat UISNENO,

²⁸nok labah in nahine in sanat, in mes natulu bibi ainaf mese le kan mu'i fa in amle'un.

²⁹In mes antao in niman neu mu'it nane in anakan, oke te anlolo anbi baki tulu in bian a'li, bale lolo mu'it neu fua tulu mnotu.

³⁰Ana' fuat knino mes anlep in aklulun neu mu'it nane in na' oke te anosen neu sunaf-sunaf anbi si'uf-si'uf baki tulu ma anpofin in nesin nane neu baki tulu in un.

³¹Mu'it nane in balun ok-oke mes naiti onle anbi fua tulu halan. In balun nane Ana' fuat knino mes notu anbi baki tulu in tunan, he nati'e in fon nane anhalin UISNENO In nekan. Onle nane mepu Ana' fuat knino natulu fua tulu neu sanat na'ko to ana mese, onane te UISNENO of ansako atoni nane in sanat.

³²Leka atoni mese natulu bibi kase mese neu hen sako in sanat, bibi kase nane mes ainaf ma kan mu'i fa in amle'un.

³³In mes antao in niman neu mu'it nane in anakan, oke te anlolo nani anbi baki tulu bian a'li, bale lolo mu'it neu fua tulu mnotu.

³⁴Ana' fuat knino mes anlep in aklulun neu mu'it nane in na', oke te anosen neu sunaf-sunaf anbi si'uf-si'uf baki tulu, ma anpofin in nesin neu baki tulu in un.

³⁵Oke te mu'it nane in balun ok-oke mes naiti onle anbi fua tulu halan. In balun nane mes notu nani anbi baki tulu in tunan, bua-bua nok fua tulu bukae le natulu neu UISNENO. Onle nane mepu Ana' fuat knino natulu fua tulu neu sanat atoni mese, ma UISNENO of ansako in sanat.