Read Uab Meto IMAMAT 5 Bible Online

IMAMAT 5 - Uab Meto bible

IMAMAT 5

¹Fua tulu sako sanat mes he tatulu ma tatnat: Leka atoni mese nok mat-mat antoti hen fe saksit anbi alef lasi, mes kan fe fa saksit nok alekot neu sa' le in nit nalali, ai le in nen talante in mes ansutai in mo'et nane.

²Leka atoni mese nasanab natuin ka nok fa asafanu in antam neu amle'ut, natuin in le'o nalali sa' esle' neki amle'ut, onle mu'it le anmate, namuni te in nahine in mo'et nane.

³Leka atoni mese nasanab natuin ka nok fa asafanu in an ono sa' amle'ut le nem na'ko atoni, ma namuni te in nahine in mo'et nane.

⁴Leka atoni mese nasanab natuin ansup nok son-sona neu hen mo'e sa'et, ma namuni te in nahine in mo'et nane.

⁵Anbi ale lasi nane, atoni le nasanab nane so'nahin in sanat.

⁶Ma neu hen soi nan in sanat, in mes neki bibi kase mese ai bibi ainaf mese neu UISNENO. Ana' fuat knino mes natulu fua tulu nane he nati' atoni nane napeni sako sanat.

⁷Mes leka atoni le nasanab nane kan mu'i fa he nabalab bibi kase ai bibi neu hen soi in sanat, in mes neki kolo ot kase tipu', es neu fua tulu sako sanat, ma es anteni neu fua tulu mnotu.

⁸Kolo-kolo nane mes neki sin neu Ana' fuat knino. Ana' fuat knino mes natulu nahunun kolo le natetab neu fua tulu sako sanat. Kolo nane in to'an mes an neok ai an nia, mes ka nabe'i fa talante in anakan natfek.

⁹Mes anpisil kolo nane in na' neu baki tulu aon bian, ma in nesin anpisil napoitan neu baki tulu in un ma neu fua tulu sako sanat.

¹⁰Oke onane te Ana' fuat knino natulu kolo mese anteni neu fua tulu mnotu, matom nok lekat lulut. Onle nane mepu Ana' fuat knino natulu fua tulu neu sanat atoni nane, ma UISNENO of ansako in sanat.

¹¹Kalu atoni le nasanab nane kan mu'i fa he nabalab kolo otos mana' nua naifes ma ainfes ai kolo ot kase neu fua tulu sako sanat, in mes neki ut kilo mese. Ut nane ka nabe'i fa hen selo nok min bub fua mina ai nok min fomeni, natuin tulu nane fua tulu sako sanat, ma ka fua tulu bukae fa.

¹²Ut nane neki neu Ana' fuat knino. Ana' fuat knino mes naiti na'ko ut nane nima mese anfani taka' neu tulu nane ok-oke natulu nalali neu UISNENO. Utunu' nima mese nane mes notu nani anbi baki tulu in tunan on tulu tnatas bukae. Nane tulu tnatas sako sanat.

¹³Onane mepu Ana' fuat knino natulu tulu tnatas neu sanat atoni nane, ma UISNENO of ansako in sanat. Ut le anesi nane anfani Ana' fuat knino in-ini, onle tulu tnatas ane kase.

¹⁴UISNENO anfe neu Nai Musa lekat lulut i.

¹⁵Kalu atoni mese ka nok fa asafanu anmo'e sanat natuin ka nana'at fa ale tulu tnatas le natetab nani neu UISNENO, atoni nane mes neki tulu tnatas seka lukit. Tulu nane mes bibi kase mese ai bibi keso mese le kan mu'i fa in amle'un, ma anfe osaf natuin osaf le anbi Um-ume UISNENO.

¹⁶Atoni nane mes anbaen sa' le in nikan nani, ansato nok lekat bati bo'nua. Namuni te in mes nana'at mu'it nane neu Ana' fuat knino, ma Ana' fuat knino nane in natulu nani neu sanat atoni nane, ma UISNENO of ansako in sanat.

¹⁷Kalu atoni mese ka nok fa asafanu anmo'e sanat natuin antanhai plenat mese na'ko UISNENO In plenat-plenat sin, atoni nane nasanab ma mes ansutai in mo'et nane.

¹⁸Neu tulu tnatas seka lukit in mes neki bibi kase mese ai bibi keso mese le kan mu'i fa in amle'un ma anfe osaf natuin osaf le anbi Um-ume UISNENO. Ana' fuat knino nane in natulu nani neu sanat atoni nane, ma UISNENO of ansako in sanat.

¹⁹Nane tulutnatas seka lukit neu sanat le in anmo'e neu UISNENO.