Read Uab Meto IMAMAT 7 Bible Online

IMAMAT 7 - Uab Meto bible

IMAMAT 7

¹Le i lekat lulut antom fua tulu seka lukit. Fua tulu nane knino le'uf kun.

²Mu'it neu fua tulu mes anlolo nani anbi bale lolo mu'it neu fua tulu mnotu, oke te in na' anpofin neu baki tulu in kabenan ha sin.

³Ana' fuat knino mes natulu nani anbi baki tulu in tunan mu'it nane in balun ok-oke esle': In ikon le anmu'i baluf, baluf le an amu in taifen, akif nok in baluf, ma bian le leok le'uf na'ko in atef.

⁵Mes notu nani ale nane ok-oke anbi baki tulu in tunan on fua tulu bukae neu UISNENO. Fua tulu nane neu fua tulu seka lukit.

⁶Atoni mese-mese anbi asal-nonot Ana' fuat knino nabe'i anbukae sisi tulu nane, mes sin anbukae anbi bale teta, natuin tulu nane knino le'uf kun.

⁷Neu fua tulu sako sanat ma fua tulu seka lukit, sin lekat lulut papmese, esle': Sisi mu'it le natulu nane pa' ma nama' Ana' fuat knino le natulu nani.

⁸Mu'it nane in pasu amsa neu Ana' fuat knino.

⁹Ale fua tulu bukae le notu anbi bale mnotu ai nahan anbi tasu ai le anse'i, anfani pa ma nama' Ana' fuat knino le natulu nani.

¹⁰Mes fua tulu bukae le ka nahan, leko le maselo nok mina ai le meto, nane ok-oke neu ale Ana' fuat knino sanut mofut Nai Harun, ma mes anbati natai anbi sin alsin.

¹¹Le i lekat lulut neu fua tulu halan le natulu neu UISNENO.

¹²Kalu fua tulu nane natulu neu ansimo manekat, nok mu'it nane mes natulu amsa utunu' le kan pake fa lalu haef. Utunu' nane nabe'i le mafaun na'ko ut le anselo nok mina bub fua mina, leko amsa utunu' meto manihis le anmo'e nok mina, ai utunu' le anmo'e na'ko ut nok mina bub fua mina.

¹³Naik na'ko nane natulu nani amsa utunu' le anmo'e anpake lalu haef.

¹⁴Na'ko utunu' huma mese-mese in bian mes natulu neu UISNENO, ma nane pa' ma nama' Ana' fuat knino le naiti na' mu'it nane ma anpofin neu baki tulu neu fua tulu halan.

¹⁵In sisi mes anbukae nani anbi neno mu'it nane natulu, akle'o amsa ka nabe'i fa he nahena talante noka anfani.

¹⁶Leka atoni mese neki fua tulu halan he nanokab in han manta'en, ai neu tulu nek amlilat, ka nabe'i fa hen bukae anbi neno nane amsa. In nesin nane nabe'i anbukae anbi neno noka fa.

¹⁷Kalu ante neno tenu fe anmu'i in nesin, sisi nane mes notu nani ok-oke.

¹⁸Mes kalu anbi neno tenu sisi nane hen bukae amsa, tulu nane of ka masimo fa ma ka neki fa tetus neu atoni nane, mes anfani amle'ut. Atoni le in anbukae sisi nane in nasanab, ma mes in ansutai in amnekin.

¹⁹Sisi le antom sa' amle'ut mes notu nani ok-oke ma ka nabe'i fa hen bukae. Sisi fua tulu halan al atoni le kan toman fa amle'ut es nabe'i hen bukae.

²⁰Kalu atoni anbukae sisi nane anbi tabu le fe in anbi amle'ut, of kan so'i fa in nonot UISNENO.

²¹Leka atoni mese in anbukae sisi tulu nane natuin in an on non neu sa' amle'ut mese, leko na'ko atoni ai na'ko mu'it, in amsa of kan so'i fa on nonot UISNENO.

²²UISNENO anfe neu Nai Musa lekat lulut i

²³neu nonot Israel. Bijae in balun, bibi kase ai bibi ka nabe'i fa him bukae.

²⁴Baluf na'ko mu'it le anmate kun ai natuin mu'it abulalut anheke ma anpisu ka nabe'i fa him bukae mes nabe'i ampake neu sutais bian.

²⁵Atoni le in bukae baluf na'ko mu'it neu fua tulu bukae neu UISNENO, kan so'i fa in on nonot Uisneno.

²⁶Atoni Israel, anbi bale-bale me in natua amsa, ka nabe'i fa hen bukae kolo in na' ai mu'it bian in na'.

²⁷Sekau le antanhai lekat lulut nane kan so'i fa in anteni on nonot UISNENO.

²⁸UISNENO anfe neu Nai Musa lekat lulut i

²⁹neu nonot Israel. Ma sekau neki fua tulu halan, mes anbati bian neu tulu tnatas le in ateta kun neu UISNENO.

³⁰In nek non kun an mes neki fua tulu bukae nane. Baluf ma sisi na'ko mu'it nane mes natulu nani on tulu tnatas etus tonas neu UISNENO.

³¹Ana' fuat knino mes notu baluf na'ko mu'it nane anbi baki tulu in tunan, mes in abasan nane pa' ma nama' ale Ana' fuat knino.

³²In pusun a'ne'u mes anfe nani on tuntakus ma babat a'teta kun

³³neu Ana' fuat knino le natulu nani na' ma baluf fua tulu halan nane.

³⁴Abasan ma pusun a'ne'u nane tuntakus ma babat a'teta kun le UISNENO naiti na'ko tulu tnatas etus tonas nonot Israel ma anfe nani neu ala Ana' fuat knino. Nane tuntakus ma babat Israel neu ale Ana' fuat knino talante nabal-bal.

³⁵Na'ko bukae le natulu ma natnat neu UISNENO, pa', ma nama' nane esle' anfe nani neu Nai Harun ma in anah-anah sin anbi neno namepan sin anfani Ana' fuat knino.

³⁶Anbi neno nane UISNENO anfe plenat neu nonot Israel he nati' na'ko sin tulu tnatas, pa' ma nama' nane neu ale Ana' fuat knino. Lekat lulut nane mes nonot Israel he natuin nani talante nabal-bal.

³⁷Onle nane lekat lulut neu fua tulu mnotu, fua tulu bukae, fua tulu sako sanat, fua tulu seka lukit, fua tulu naki'ab ma fua tulu halan.

³⁸UISNENO anfe plenat-plenat nane neu Nai Musa anbi Tubu Sinai anbi tabu In anlenu nonot Israel natulu natnat fua tulu anbi mnela snaen Sinai.