Read Uab Meto IMAMAT 8 Bible Online

IMAMAT 8 - Uab Meto bible

IMAMAT 8

¹UISNENO nakua a'an neu Nai Musa nak,

²“Amboin ma mo'en Nai Harun ma in anah-anah sin ma meki blua pake Ana' fuat knino, mina luli besa, bijae keso tipu' mese neu fua tulu sako sanat, bibi kase keso nua ma utunu' poni mese le ka nok fa lalu haef.

³Oke te amlenu nonot Israel al-al sin nabua anbi Au Um-ume in enon.”

⁴Nai Musa in antao ma anmo'e sa' le UISNENO anfe plenat neune. Anbi tabu nonot nabua nalali anbi bale nane,

⁵Nai Musa nak neu sin nak, “Le au tao ma mo'e anbi tabu le i nane UISNENO In aplenat.”

⁶Oke te in anlenu Nai Harun ma in anah-anah sin anfonat neu mat ma anboe sin aoken.

⁷Oke te in antao bale pake Ana' fuat knino neu Nai Harun: sobalu, pasu futu ma sobalu bet kone. Ma efod amsa le anfutun neu in atnanan nok futus na'ko pilu malule.

⁸Oke te antao tobe basaf neu Nai Harun, ma neu tobe basaf in nanan nane natam Urim ma Tumim neune.

⁹Oke te antao pilu futu nakaf neu Nai Harun in anakan, ma anbi pilu futu nakaf nane antao bale pake mnatu, le anfani taka nak Nai Harun anfani UISNENO ini. Nai Musa anmo'e ale lasi nane ok-oke natuin plenat UISNENO neu in.

¹⁰Oke te Nai Musa naiti mina luli besa ma anosen neu Um-ume UISNENO ma ale sin blua ok-oke. Nok nane te ale nane ok-oke nateta nani neu UISNENO.

¹¹Akle'o na'ko mina nane anpisil hae hitu neu baki tulu fafon, ma ale in blua ok-oke, ma neu nifu lape in fafon amsa ma in un. Nok nane te ale nane ok-oke nateta nani neu UISNENO.

¹²Oke onane te Nai Musa naki'ab Nai Harun nok lanan antosi mina luli besa akle'o neu in anakan.

¹³Oke te in anlenu Nai Harun in anhen anfonat neu mat. In anpake sin neki sobalu ma pasu futu. Oke te antao pilu futu nakaf neu sin anakan onle UISNENO naplenat nani neu in.

¹⁴Namuni te Nai Musa naiti nan bijae keso tipu' mese neu fua tulu sako sanat. Nai Harun nok in anhen antao sin nimken neu mu'it nane in anakan.

¹⁵Oke te Nai Musa anlolo mu'it nane ma naiti in na' bian. Na' nane in anosen neki in aklulun neu sunaf-sunaf anbi baki tulu nane, he nati' baki tulu nane nateta nani neu Uisneno. Na' le anesi anpofin nani neu baki tulu in un. Onle nane mepu baki tulu nane naknino ma nateta nani neu UISNENO.

¹⁶Na'ko bijae le fe anlolo nane, Nai Musa naiti in balun ok-oke le an amu in taifen, akif nok in balun ma bian anteni le leok le'uf kun na'ko in atef. Ale nane notu nani sin ok-oke anbi baki tulu in fafon.

¹⁷Mes sisi bijae nane, in pasu, in taifen nok in tai susuf sin, bijae nane noba temen al bian naikan sin notu sin anbi um-ume kotin onle UISNENO naplenat nani.

¹⁸Namuni te Nai Musa naiti bibi kase keso neu fua tulu mnotu, oke te Nai Harun ma in anah sin antao sin niman neu bibi kase nane in anakan.

¹⁹Nai Musa anlolo bibi nane ma in na' anpofin neu baki tulu in kabenan ha sin.

²⁰Oke te mu'it nane anheli ma in taifen nok in haen anboe sin neki oe. Anakan, baluf, ma in nesin na'ko sisi bibi kase nane notu nani sin neu fua tulu mnotu anbi baki tulu in fafon onle UISNENO naplenat neu in. Fua tulu nane in fon anhalin UISNENO In nekan.

²²Oke te Nai Musa naiti bibi kase keso mese anteni neu fua tulu namepan Ana' fuat knino. Nai Harun ma in anah sin antao sin nimken neu bibi nane in anakan,

²³oke te Nai Musa anlolo bibi nane. Nalali te in naiti na' na'ko mu'it nane ma anosen neu Nai Harun in luken non a'ne'u, neu aklulun ainan niman a'ne'u, ma aklulun ainan haen a'ne'u.

²⁴Namuni te in anlenu Nai Harun in anah sin anhaumak, oke te in anosen na' akle'o amsa neu sin luken non a'ne'u, neu sin aklulun ainan niman a'ne'u, ma sin aklulun ainan haen a'ne'u. Na' le anesi anpofin neu baki tulu kabenan ha sin.

²⁵Nai Musa naiti baluf bibi kase nane, in ikon le mabaluf, ale baluf le an amu nan in taifen, bian anteni le leok le'uf na'ko in atef, akif nok in baluf nok in haen a'ne'u.

²⁶Na'ko poni le matua nok utunu' ka nok fa lalu haef le natulu natnat nalali neu UISNENO, Nai Musa naiti utunu' mafaun le anmo'e na'ko mina ma utunu' manihis mese. Utunu' nane antao neu baluf in fafon ma bibi kase in pusun a'ne'u.

²⁷Ale nane ok-oke antao nani sin neu Nai Harun ma in anah sin niman, oke te sin natulu on fua tulu etus tonas neu UISNENO.

²⁸Nalali te Nai Musa naiti bukae nane na'ko sin ma notu anbi baki tulu in fafon, nok fua tulu mnotu neu tulu tnatas he namepan. Fua tulu bukae nane in fon anhalin UISNENO In nekan.

²⁹Oke te Nai Musa naiti bibi kase nane in abasan ma natulu nani on tulu tnatas etus tonas neu UISNENO. Nane pa' ma nama Nai Musa na'ko bibi kase keso le natulu nani neu luli besa namepan Ana' fuat knino. Ala nane ok-oke Nai Musa anmo'e nani onle UISNENO anfe plenat neune.

³⁰Nalali te Nai Musa neiti bian na'ko mina luli besa ma bian na'ko na' le anbi baki tulu in fafon, oke te anpisil neu Nai Harun ma in anah sin ma neu sin bale pake. Nok lasi nane Nai Musa nateta sin ma sin bale pake neu UISNENO.

³¹Namuni te Nai Musa nak neu Nai Harun ma in anah sin nak, “Mihan sisi nane nai anbi eno mat Um-ume UISNENO. Natuin plenat UISNENO, hi miah mani anbi nane nok utunu' fua tulu mepan le anbi poni in nanan.

³²Sisi ma utunu' le anesi mes hi motu mani ok-oke.

³³Anbi neno hitu in nanan hi ka nabe'i fa misaitan Um-ume UISNENO talante luli besa namepan ki nane in nanokbon.

³⁴UISNENO naplenat he nati' sa' le hit mo'e anbi neno i amsa so nati' atmoe tani piut. Nok luli besa nane hi sanat-sanat sin ansako sin.

³⁵Anbi neno hitu in nanan, manas ma fai, hi mes mibala anbi eno mat Um-ume nane he nati' hi mo'e sa' le UISNENO naplenat neu ki. Kalu hi ka mo'e mani fa, of hi mate. Nane le UISNENO naplenat nani neu kau.”

³⁶Oke te Nai Harun ma in anah sin anmo'e nani ale nane ok-oke le UISNENO naplenat nao nok Nai Musa.