Read Uab Meto YEREMIA 1 Bible Online

YEREMIA 1 - Uab Meto bible

YEREMIA 1

¹Sulat i nahenu nok uab na'ko Nai Yeremia Nai Hilkia anmone, Ana' fuat knino mese na'ko Anatot anbi pah Nai Benyamin.

²UISNENO nakua In a'an neu Nai Yeremia anbi tabu Nai Yosia Nai Amon anmone Kesel Yehuda nanaoba plenat nan ton bo'es am tenu.

³Namuni na'ko nane te UISNENO nakua In a'an hae fauk anteni neune, na'ko tabu Nai Yoyakhim Nai Yosia anmone nanaoba plenat antia ton bo'es am mese Nai Zedekia Nai Yosia anmone nanaoba plenat. Anbi fun nima ton nane amsa tuafen Yerusalem naiti neki sin neu bale polin.

⁴UISNENO nakua In a'an neu kau nak,

⁵“Nahun na'ko Au fe ka mepu ko fa anbi ho aina apun, ma nahun na'ko fe ka nahonis ko fa, Au beti ulali ko ma Au aiti ko hem fani Mafefa knino neu uf-uf.”

⁶Au utae ak, “Koi UISNENO Alatan Amnanut, au ka u'uab uhin fa natuin au fe munif kau.”

⁷Mes UISNENO natae nak, “Kais ho mu'uab mak ho fe munif ko. Kalu Au sonu ko neu sekau amsa, ho mes hem nao, ma ale sa' le Au lelu he muton, mes ho mutiaba mani neu sin.

⁸Kais ho mumtausain sin, natuin of Au ok ko he uneo ma uhafo ko. Au, UISNENO Kau, ukua ulali Au a'ak!”

⁹Nalali onane te UISNENO nanona In niman, ma In ana' au fefak ma In nak, “Amnen nai ma muton nai a'at le Au u'uab sin le i.

¹⁰Neno i Au fe neu ko kuasat neu uf-uf ma neu ale plenat — kuasat he mubelat ma mutseleb, hem nunu ma mule'un he mufena ma amsen.”

¹¹UISNENO natoti kau nak, “Yeremia ho mit sa' ka?” Au utae ak, “Hau toef na'ko badam, koi UISNENO.”

¹²“Namneo,” UISNENO nakua a'an onane, “Au panat he nati' ale sa' le Au u'uab anbol ma natonon.”

¹³Oke te UISNENO natoti anteni kau nak, “Ho mit amteni sa' ka?” Au utae ak, “Anbi aon bian a'li au it nai' mese in nesan na'lot ma al akle'ot nat'op nem neu i.”

¹⁴UISNENO nakua In a'an nak, “Na'ko aon bian a'li lasi amle'ut of ansai ma antoman ale tuafen abit pah i.

¹⁵Of Au lelu ale uf anbi aon bian a'li he nem he naplenat Yerusalem. Ale baki lape le anfun natef kot i nok eno naek in nesu sin ma ale kot Yehuda ok-oke of sin nasik nani.

¹⁶Of Au kas Au to, natuin sin nasanab ma ankoti Kau. Sin natulu nalali fua tulu neu ale uisneno teta bian, ma anmo'e ale le'u mahuma ma naluli nabes neune.

¹⁷Muloitan ma mubalbom nai, Yermia! Amnao nai ma mutiaba nai neu sin, ale plenat le Au utiaba neu ko. Kais mumtausan sin, he nati' kais Au mo'e ko ho mumtau amnesein teni leka hom hake anbi sin humkenu.

¹⁸Amnen nai! Tuafen kuan le i of sin anlaban ko, es ale Kesel Yehuda, ale ana' aplenat sin, ale Ana' fuat knino sin, ma ale to sin. Mes neno I Au fe neu ko be'it matani he nati' hom laban sin. Ho of amfani onle kot mabaki lape, onle ni besi ma baki lape noni molo. Sin of kan be'u ko fa, natuin Au ok ko, ma Au uhafo ko. Au UISNENO Kau, ukua ulali Au a'ak.”