Read Uab Meto YEREMIA 10 Bible Online

YEREMIA 10 - Uab Meto bible

YEREMIA 10

¹To Israel, amnen nai han ba'an UISNENO neu ki.

²In nakua In a'an nak, “Kais mituin monit na'ko uf-uf bian, ma kais amlilitai leka him kiso ale taka' anbi neno atnanan le uf-uf nane sin namtausan.

³Taos mo'et ahun-hunut na'ko uf-uf le nane namneo-namneo ka maota fa. Sin nafae hau anbi nasi nanan ma anlelu apakae hau anmepu nani nok bale pakae ma anfani le'u mahuma.

⁴Oke te le'u mahuma nane sin anpake nani neki noni mnatu ma noni muti, oke te ankus nahelan neki kusat he nati' kais anmofu.

⁵Ale le'u mahuma nane namas on atoni anbi lene okan timun. Sin ka na'uab nahin fa, ka nao nahin fa, ma mes he taiti sin. Kais mimtausan sin, natuin sin ka nabe'i fa hen mo'e amle'ut neu ki; hen mo'e alekot amsa sin ka nabe'i fa.”

⁶UISNENO apinat, es ka namnes fa nok Ko, Ho kanam le'u knino kun ma nahenu nok kuasat.

⁷Sekau ka es kan lomi fa he namtausan Ko, kesel neu ale uf-uf? Lo namneo-namneo kun he neki tola neu Ko. Na'ko ale mahine ok-oke anbi uf-uf ma na'ko ale kesel sin ok-oke, katit fa es amsa le he nanes'on nok Ho aom, koi UISNENO.

⁸Sin akout ma amonot ok-oke natuin sin uisneno teta nane al hau kun, ka nabe'i fa nanoina le maota.

⁹Anlape in neki noni muti ma noni mnatu le ne'ki nem na'ko Spanyol ma kot Ufas, ale nane ok-oke na'ko mepu nimaf na'ko mahina sin ma apakaet noni mnatu. In bale pake nane na'ko kloe kanalu mnasi ma kanalu munif, atenus le antenu nane ateun mahine le antenu nalek-leko.

¹⁰Mes Ho, UISNENO amneot, Uisneno a'fe honis, kesel nabal-bal. Leka kalu Ho muto' pah pinan antainun, kalu Ho amfoe ma mubloli uf-uf kan hake na'ki fa. (

¹¹Hi, hoi Au to, hi mes miton neu sin mak ale uisneno teta le kan mo'e fa neno tunan ma pah pinan nane of nale'un nani sin. Of sin namneku na'ko pah pinan.)

¹²UISNENO anmo'e pah pinan neki In kuasat, ma anfatan pah neki In mahinen, ma In nauf na'ben neno atnanan neki In nekan mahine.

¹³In al anfe plenat, oenu na'lu anbi neno tnanan. Na'ko pah pinan anfun natef In anfe nope ma nem, ma In anmo'e limat ma nalim anbi ulan, ma In ansonu anin na'ko In bale tolo'.

¹⁴Sin nit ale lasi nane ok-oke, oke te atoni pah pinan nahin, nak sin amonot ma kan mu'i fa mahine. Apakaet noni mnatu sin human namneku, natuin le'u mahuma le sin anmo'e nane ka namneo fa ma kan mu'i fa smanaf.

¹⁵Ale le'u mahuma nane ka maupa fa, mes so tasi'u ma taakan sin. Leka in tabu antia sin mes namle'u.

¹⁶Uisneno Nai Yakub ka onfa ale le'u mahuma nane; In es antao ma anmo'e ale sa'-sa' ok-oke. In kanan nane UISNENO Akuasat Afinit; In anbeti nalali Israel anfani In to.

¹⁷Tuafen Yerusalem, anfun natef nan ki nalalien! Es nane te, miloitan ma mibalab nai!

¹⁸Hae esle' i UISNENO of anpolin nonot Yehuda ok-oke neu bale mapolin; hi al-al ki of naskuku nani ki. Nane han ba'an na'ko UISNENO.

¹⁹Tuafen Yerusalem amhunun nai mak, “Hai mipapa' nae le'uf ma hai ka mileko fa. Afi ahun-hunut hai mitenab mak susal mafena i hai mibe'i amsutai mani, mes kahaf.

²⁰Hai ume sin namle'u ok-oke, ma sin tani-tani sin natfek ok-oke. Katit fa es anteni he nabe'i nahakeb um-ume nane ma antao ale in akloe sin, natuin li'ana-li'ana sin anao nalalien.”

²¹Au utae ak, “Hit atomatas-atomatas sin le nane amonot kun. Sin kan toti fa fainekat na'ko UISNENO, es nane te sin ka nisan fa, ma hit tasanok teu me-me.

²²Amnen nai! Anmu'i han tonas nak uf mese na'ko aon bian a'li napoitan taisibu. In solalus sin of anmo'e kot-kot Yehuda tena maten ma kan mu'i fa le he natua anbine. Ale asu fui of natolo' anbi nane.”

²³Koi UISNENO, au uhin kan mu'i fa atoni mese amsa anmu'i kuasat hen lek kun in monin ai he na' ma antopu kun in lanan honis.

²⁴Munoina kai koi UISNENO, mes kais meki fisot ma tepos le namen matani le'uf. Kais amkas kai leka Ho fe muto', natuin of hai mimle'u ok-oke.

²⁵Ampolin nai Ho to'as neu uf-uf le ka nateb neu Ko fa, ma le kan lomi fa he naluli ma nabes neu Ko. Natuin nale'un nalali Ho to ok-oke ma naskuku naklati hai pah.