Read Uab Meto YEREMIA 11 Bible Online

YEREMIA 11 - Uab Meto bible

YEREMIA 11

¹UISNENO nakua In a'an neu kau nak,

²“Amkiso nai ale lekat lulut antom lasi manba'an le Au tao ma mo'e ok Au to. Muton nai neu atoni Yehuda ma tuafen Yerusalem mak

³Au, UISNENO atoni Israel, Au fe kasat neu sekau le ka natuin fa Au lekat lulut antom Au lasi manba'an nane.

⁴Lasi manba'an nane Au tao ma mo'e ok sin amaf sin leka Au upoitan sin anpoi na'ko pah Mesir, pah le on bale kasat neu sin. Onane amsa Au uton ulali neu atoni Yehuda ma tuafen Yerusalem leka sin na'ki neu Kau, sin of anfani Au to ma sin Uisneno es Kau.

⁵Kalu sin antao ma anmo'e lasi nane ok-oke, of Au unokab Au lasi manba'an neu sin amaf sin, ma pah le sin natua anbine, of manesa ma maafa. Of Au fe ani neu sin.” Au utae: “Leko, UISNENO.”

⁶Oke te UISNENO nakua In a'an neu kau nak, “Amnao nai neu kot-kot anbi Yehuda, ma neu lanan-lanan anbi Yerusalem. Muton Au han manba'an i nai neu atoni-atoni anbi nane. Amlelu sin hen kiso ma natuin ale Au lasi-lasi manba'an sin.

⁷Leka Au upoitan sin amaf sin na'ko pah Mesir, Au umnauba sin nok matani he nati' sin na'ki neu Kau. Talan te neno i amsa Au fe umnauba Au to piut neu lasi nane,

⁸ma Au toti sin he na'ki neu Au lasi manba'an nane, mes sin kan lomi fa he nen ma kan lomi fa he na'ki neu Au lasi manba'an nane. Mes sin nakan fatu ma anmo'e amle'ut on afi ahun-hunut. Es nane te ale kasat le matui anbi lasi manba'an nane Au utiaba ani neu sin.”

⁹Oke te UISNENO nakua In a'an anteni neu kau nak, “Atoni Yehuda ma tuafen Yerusalem sin nekaf mese nalali neu hen laban Kau.

¹⁰Sin antao ma anmo'e sanat le sin amaf sin antao ma anmo'e le kan lomi fa he he na'ki neu Kau, sin nausi neu uisneno teta ma kan lomi fa he natuin Au plenat sin. Leko Israel ai Yehuda amsa sin antanhai Au lasi manba'an le Au tao ma mo'e nok sin amaf sin.

¹¹Es nane te, Au UISNENO, Au umnauba sin ak of Au usanut susal mafena neu sin ma sin ka nafetnon fa na'kone. Kalu sin ansakoi antoti tuntakus neu Kau, Au ka lomi fa he nen ma utnin sin.

¹²Oke te atoni Yehuda ma tuafen Yerusalem sin anao ma antoti tuntakus neu uisneno teta le sin nausi neune neki fua tulu. Ale uisneno teta nane ka nabe'i fa he nafetin sin anbi tabu susal ma mafena nem neu sin.

¹³Atoni Yehuda sin uisneno teta amfau le'uf, sin amfaukenu onle lanan-lanan anbi kot Yerusalem he natulu fua tulu neu uisneno teta Baal.

¹⁴Es nane te Yeremia kais hom onen toti neu sin ai hom toti tuntakus na'ko Kau neu sin! Kalu sin anbi susal ma antoti babat he Au bab sin, of Au ka lomi fa he nen sin.”

¹⁵UISNENO nakua In a'an nak, “Au to le Au nek ani sin anmo'e nalali lasi-lasi amle'ut. Sin ka nabe'i fa hen bi Au Ume knino. Sin natenab nak natuin sin anmo'e lasi manta'en, ma natuin sin natulu mu'it, nabe'i sin antite lasi amle'ut nane. Ait nok lasi nane sin nabe'i hen malin?

¹⁶Hae es Au ukanab sin hau bub fua mina anmu'i non matani, ma nafua fuan alekot. Mes, muni i nok hanaf slutuf matani of Au otu ani sin non ok-oke ma Au ipu ani ale sin atlaen ok-oke.

¹⁷Au es uhakeb Israel ma Yehuda, Au, UISNENO Akuasat Afinit. Mes muni i Au utenab ulali he fe amle'ut neu sin. Sin anmese es anmo'e le nane ok-oke, natuin sin anmo'e nalali amle'ut, esle' sin neki fua tulu neu Baal talan te Au uto'.”

¹⁸UISNENO naton neu kau tenab amle'ut na'ko au musu-musu sin.

¹⁹Au onle bibi kase fun au ka uhin fa neu sin neki kau neu bale lolot. Au ka uhin fa neu au es a fani salit tenab-tenab amle'ut. sin nak, “Aim hit tafae hau uf i leka in fe nabe'i napoitan fuan; hit tale'un tani he nati' atoni sin nikan nani in kanan.”

²⁰Oke te au onen toti ak, “Koi UISNENO Akuasat Afin-finit, ho afek lasi amneot Ko; Ho es amsu' ale nek tenab na'ko ale atoni. Au lasi i au una'at ani neu Ko. So nati' au saksi ani neu Hom seunbanin taos mo'et na'ko ale atoni-atoni nane.”

²¹Atoni-atoni na'ko kot Anatot sin ansinmak he au mate. Sin na'uab nak, “Kalu ho fe mutiaba UISNENO In han ba'an piut neu kai, of hai mimate ko.”

²²Es nane te, UISNENO Akuasat Afin-finit nakua In a'an nak, “Of Au fe kasat neu sin! Ale sin atoni munif sin of anmate anbi makenat nanan, ale sin anah-anah sin of sin anmaten amnahas.

²³Au utetab ulali tabu he fe amle'ut neu atoni-atoni Anatot, ma leka sin tabu kasat nane anbol, katit fa atoni mese amsa he nafetnon.”