Read Uab Meto YEREMIA 13 Bible Online

YEREMIA 13 - Uab Meto bible

YEREMIA 13

¹UISNENO anlelu kau he nao he sos tais tuk-tuka mese na'ko pilu muti fe'u he au pake, mes ka nabe'i fa he au lep anbi oe nanan.

²Oke te au nao ma sos tais tuk-tuka nane, ma au pake ani.

³Namuni te UISNENO nakua In a'an anteni neu kau nak,

⁴“Amnao nai neu Noe Efrat, ma mutolo' tais tuk-tuka nane anbi fatu sin a'bolan.”

⁵Fun anmatom nok plenat UISNENO au nao, ma utolo' tais tuk-tuka nane anhaumak Noe Efrat.

⁶Tabu fauk-fauk namuni na'ko nane UISNENO anlelu kau ma au nao teni neu Noe Efrat he aiti tais tuk-tuka nane.

⁷Au nao, ma upoitan tais tuk-tuka nane na'ko bale le au utolo' ani. Mes tais nane anmau anmate nalalien, ma namneo-namneo ka maota fa anteni.

⁸Oke te UISNENO nakua In a'an anteni neu kau, nak,

⁹“Onle nane taos le of Au mo'e neu atoni Yehuda ma tuafen Yerusalem. Of Au ule'un uskuku ani sin lasi neka moko nae le'uf nane.

¹⁰Uf amle'ut i sin nakan fatu nae le'uf ma kan lomi fa he natuin Kau. Sin naluli ma nabes neu uisneno teta. Es nane te sin of anfani on tais tuk-tuka le ka maota fa.

¹¹On tais tuk-tuka le anfutun nahelnon anbi apaket in atnanan, onane amsa Au utenab he nati' to Israel ma Yehuda anfutun nahelnok neu Kau. Nok nane te sin anfani Au to le anmo'e Au kanak mapules ma maliatas. Mes sin kan lomi fa he natuin Kau.”

¹²UISNENO nakua In a'an neu kau nak, “Yeremia, mutiaba Au a'ak neu atoni Israel mak ale kusi ale tua mina mtasa mitua mani sin meki tua mina mtasa talan te nahenu. Sin of natae nak, ‘Ait hai ka mihin fa ka neu ale kusi mese-mese of hai mitua mihenu sin meki tua mina mtasa?’

¹³Onane te ho mutonan sin mak atoni-atoni anbi pah i, kesel sin na'ko Nai Daud sufan, ale Ana' fuat knino, Mafefa knino, ma ale tuafen Yerusalem of Au utua uhenu ani sin eki tua mina mtasa talan te sin anmafu anmate.

¹⁴Oke te of Au utanab sin es nok es. Mnasi ma munif of Au mo'e sin onane Au ka nek ani fa sin. Of Au ule'un sin fun ka nek fa sin ai ka umnau fa sin. Au, UISNENO Kau, ukua ulali Au a'ak.”

¹⁵To Israel, UISNENO nakua nalali In a'an! Kais him neka naebom, amnen nai neu In!

¹⁶Ho mes muliatas ho UISNENO nahun na'ko In hen fe mesokan nem, ma ho haem hen pastun anbi tubu, nahun na'ko meusine le ho mufnek neune nabaina ma anfani mesokan.

¹⁷Kalu ho kam lomi fa hem nen, of au kae nok a'ten-tena. Nok nek susal au kae neu ho neka naeb nane. Au matnu of ansai natuin UISNENO In nato' ma neki sin ma anao onle nasik nan sin anbi makenat.

¹⁸UISNENO nakua In a'an neu Kau nak, “Amlelu kesel ma in kato hen sanu na'ko sin a'toko, natuin sin pilu noni amasat anmofu nalali na'ko sin a'nakan.

¹⁹Kot-kot Yehuda anbi neno aon bian a' ne'u anfun natef nan sin, ma katit fa esle' he nape' hen poi. Atoni Yehuda sin ok-oke neki sin ma anao neu bale polin.”

²⁰UISNENO nakua In a'an neu tuafen Yerusalem nak, “Amkiso nai! Hi musu-musu sin nem na'ko neno aonbian a'li. Esme ka atoni-atoni le mes hi minini ma mihafo sin ma hi minaeba sin nane.

²¹Of hi mak sa' kalu atoni-atoni le hi mo'e sin on hi bia hi benu sin nis ma anbe'u ki ma naplenat ki? Namneo teb of him naben menas on bife le he nahoni.

²²Oni hi mitoti nansa' ale lasi nane antoman hi aom, nansa' anpisu hi bale pake ma nale'un ki nok matani. Mihin nai ale lasi nane anbol natuin hi sanat a'nae le'uf.

²³Nabe'i ka atoni metan nabaina in pasu masan, ai meo fui naneku in a'koton? Oni kahaf! Onane amsa hi le anmo'e milali sanat of ka nabe'i fa he mo'e alekot.

²⁴Of Au usitab ma usana ki on anin anfu ane ut na'ko mnela hufui.

²⁵Nane hi monim le Au lek ani natuin him nikan milali Kau, ma hi miteb milali neu uisneno teta luman.

²⁶Of Au eknok pisu hi bale pake na'ko hi aom he nati' hi monas ki ma hi mae.

²⁷Au it ulali ki hi mo'e milali ale lasi le Au ka lomi fa. Au it ulali ki him li'u ale uisneno teta anbi tubu ma anbi lene, onle atoni mese ansinmak le'-le'uf neu atoni bian in fenai ai onle bikase keso ansinmak le'-le'uf neu bikase ainaf. Tuafeun Yerusalem, amle'ut neu ki! Of leka ka na' hi mifetnom mi'ko ale lasi amle'ut nane?”