Read Uab Meto YEREMIA 14 Bible Online

YEREMIA 14 - Uab Meto bible

YEREMIA 14

¹UISNENO nakua In a'an on i neu kau matom fauknais le matani le'uf,

²“Yehuda nekan nasusbon natuin in kot-kot sin hen maten. In atoni-atoni sin antup anbi nain ma ansakoi. Yerusalem anbai ma antoti hen bab in.

³Ale atuthae atoni amu'it anlelu sin he nami oe anbi me-me; sin nao neu ale oe hela mes katit fa oe. Nai' oe le sin neki sin neki nafani nok luman. Nok sanmakat ma kan mu'i fa afnekan sin anmae ma ankub sin human.

⁴Ulan kan sanuf ma nain anmeto anmate; amepu lene ankub sin human natuin kan mu'i fa afnekan.

⁵Hun katit fa anteni, es nane te lus ainaf anao kun. In nasaitan nani in ana le fe nahonis anbi mnela hufui.

⁶Bikase luke mnanu afuit anhake piut anbi tubu tunan, in matan anhae natuin kan mu'i fa hun; in nasnas ket-ketu on asu fui.

⁷Au to ansakoi nak, ‘Koi UISNENO, maski hai sanat sin anluku kai mes maski onane ambab kai fa matom nok Ho lasi manba'an. Hai misaitan milali Ko piut-piut; namneo-namneo, hai misanab neu Ko.

⁸Ho mese kum es amfani panet ma afnekan neu Israel, le mufetin kai na'ko ale amle'ut. Mes nansa' Ho onle atoni anao amnemat anbi hai pah, on atoni anao lanan le antup fai mese ma in anao anteni?

⁹Nansa' Ho onle atoni le in nekan namneku; onle meo pa'e le in ka nabe'i fa hen bab ma nafetin? Mes, namneo Ho es hai sonam hai atnanam, koi UISNENO! Ho to es kai, kais Ho musaitan kai!’ ”

¹⁰Antom uf nane UISNENO nakua In a'an nak, “Au nekak kan malin fa nok atoni-atoni nane le anlomi he naen na'ko Kau, le ka naplenat nabe'i fa sin aon. Au of ka nikan fa sin sanat, of Au kas sin natuin sin sanat.”

¹¹UISNENO nakua In a'an neu kau nak, “Kais amtoti Kau he Au bab atoni-atoni nane.

¹²Maski sin nanahok, Au ka lomi fa he nen sin sakoit he Au bab sin; maski sin natulu neu Kau fua tulu mnotu ma fua tulu ane kase, of Au ka malin fa ok sin. Mes, of Au ule'un sin eki makenat, amnahas, ma menas le natnani anbi me-me.”

¹³Oke te au ak, “Koi UISNENO Anesit Afinit, ho muhin ale Mafefa knino sin naton nalali neu to nak mes kan mu'i fa makenat, ai amnahas, natuin Ho manba'an mulali mak anbi pah i of anmu'i kun halan piut.”

¹⁴Mes UISNENO natae nak, “Ale Mafefa knino nane sin neki beno mo'el ma poi neki Au kanak; Au ka sonu fa sin, ma Au amsa ka fe plenat, ai hanaf neu sin. Ale lasi mnitas le sin naton nane ka na'ko Kau fa; sin lasi mnitas ka maota fa natuin sin antao ma anmo'e anmes kun.

¹⁵Sin na'uab neki Au kanak nak pah le i of makenat ka nem fa neune ai amnahas, mes Au ka lelu fa sin he naton lasi nane. Au, UISNENO Kau, Au uton neu ko, Yeremia, of Au he mo'e sa' ka neu ale Mafefa knino le Au ka sonu fa sin nane. Au of umate sin eki makenat ma amnahas.

¹⁶Atoni-atoni le ansimo ale sin mnitas nane amsa of Au umate sin eki makenat ma amnahas. Sin aon nitu of anpolin sin anbi lanan-lanan anbi Yerusalem ma katit fa es neu hen sub sin. Onle nane sin monin ma sin anah sin ma sin fenai sin. Of Au mo'e sin he sin naben sin mo'et amle'ut in amnekin.”

¹⁷UISNENO anlelu kau he uton au nek susal neu In to sin. Of Au he u'uab on i, “Maut he au kae kais usnas, manas fai au matnu ansai piut. Natuin au nonot napap anae le'uf ma ansutai susal mafena anaek.

¹⁸Leka au nao eu mnela, au it ale amates sin anmate natuin makenat. Au it anbi kot nanan susal mafena, atoni-atoni al akleot anmate natuin amnahas. Mafefa knino ma Ana' fuat knino sin nanaoba sin mepu ka nahin nok fa sa' le sin anmo'e.”

¹⁹Koi UISNENO, namneo-namneo Hom tite mulali Yehuda ma tuafen Sion Ho muto'an sin ka? Nansa' Ho ambeso kai nae le'uf onle nane talan te hai ka mileko amteni fa? Hai mami halan mes luman kun, ka maota fa hai mifnek neu he mileko, natuin al lasi mafena naek es esan.

²⁰Koi UISNENO, neu Ko hai misanab milalien. Hai am au hai sanat sin ma hai amaf sin sanat-sanat sin.

²¹Mumnai Ho lasi manba'an, kais Ho musi'u kai; Ho lasi manba'an mok kai kais Ho muneku. Yerusalem Ho bale toko apinat, kais Ho musi'u in.

²²Uf-uf bian sin uisneno teta ka nabe'i fa he nasanut ulan nok sin kuasat anmes. Hai panet ma afnekan al neu Ko. Ho mo'e ale lasi nane ok-oke anbol.